Nteh chĭng n’gŭr răm ta nâm si têh nđĭr ƀư lĕ lvang trong Trần Quang Khải, ta Quảng trường 10/3, nkual ƀon têh Buôn Ma Thuột, n’gor Dak Lak bah đêt bri duh r’ôl yan wai tâm ăp nar lễ mhe rlău. Nău njroh xoang uĕh kơt geh nău wăch rgum nuĭh ƀon lan n’hanh năch pâl nđaih hăn rlău rlu jâng uănh. Wa Nguyễn Thị Oanh, năch ta ngor Nam Định nkoch:

Hăn pâl mâp saơ nteh chĭng Tây Nguyên jêng gâp uănh dâl. Chĭng Tây Nguyên lah uĕh ngăn, lam dak geh ta Tây Nguyên geh chĭng. Chĭng gông Tây Nguyênta ăp ntŭk n’gŭr răm da dê.

Bôk nău ƀư tŭr chĭng n’hanh tâm nđŭr nghệ thuật đah bôk nău “Đất nước trọn niềm vui” lah nău ƀư bah Trung tâm Văn hóa-Thể thao nkual ƀon têh Buôn Ma Thuột ƀư ta Quảng trường nkual ƀon têh di rơh rlu lễ 30/4 n’hanh 1/5 năm aơ, Đah nău tŭr chĭng, mboăt n’hôm rnoi mpôl đêt bah ăp rmôt nghệ nhân mom bah buôn Ky, buôn Kŏ Tam, Câu lạc Mprơ then nkual ƀon têh Buôn Ma Thuột, njroh đồng diễn bah câu lạc bộ Di sản ao dai Việt Nam n’gor Dak Lak, Vũ đoàn Doremi Kid... lĕ jêng du bôk nghệ thuật âk ntil n’hanh n’gŭr răm. Wa Trương Ngọc Bảy, ta xă Ea Kuăng, nkuăl Krông Pắk, n’gor Dak Lak tât uănh bôk nău lah:

Geh ăp rnoi mpôl đêt, nuĭh Ê Đê, nuĭh Tày n’hanh ăp rnoi mpôl đêt êng geh nău uĕh êng bah khân pơng. Jâng văn hóa nĕ lah nău ntô̆ n’hao bah nuĭh ƀon lan, jêng tâm nđŭr ăp jâng văn hóa an nuĭh ƀon lan mpôl hên nar lơ gĭt văn hóa têh lơn.

Mô knŭng ta Quảng trường 10/3, tâm rơh rlu lễ 30/4 n’hanh 1/5 mhe rlău âk nkual pâl nđaih ta Dak Lak ƀư da dê ăp nău kan văn hóa nghệ thuật geh nău uĕh êng văn hóa Tây Nguyên, kơt: tâm nđŭr chĭng gông, mprơ then đàn tính, ƀư mboăt n’hôm, ngêt ndrănh yăng, sa ndơ sa ăp rnoi nuĭh Ê đê, M’nông, Lào,... lĕ ƀư an năch ăp ntŭk  ŭch n’hanh uĕh.

Nô Lý Thế Quân, năch ta nkual ƀon têh Hồ Chí Minh an gĭt, gâp dŭt ŭch đah bôk nău tŭr gông lŭ n’hanh mboăt n’hôm rnoi mpôl đêt tât Đường sách cà phê Buôn Ma Thuột tâm rơh pâl nđaih Dak Lak rơh aơ.

Gâp saơ nkô̆ nău đơn đah ăp ntil ndơ jêng geh nău uĕh, saơ nău uĕh văn hóa nkual neh, lơnm lah văn hóa bah nuĭh Ê đê. Tă bah ăp bâr mprơ, nău mprơ ntoh lư lah ăp bâr mprơ bah ăp băl dŭt dăng, dŭt lah nteh, dŭt lah bri nor. Nău aơ gâp saơ ta ntŭk êng mô geh.

Mô knŭng năch pâl nđaih bah ăp ntŭk êng ma ăp nuĭh ƀon lan dôl rêh ta Dak Lak saơ ndrăt n’hanh uĕh đah ăp nău ƀư văn hóa nghệ thuật Tây Nguyên dơi ƀư tâm ăp nar bah năp. Yuh Trần Thị Đan Phương, ta phường Tân Lập, nkual ƀon têh Buôn Ma Thuột an gĭt:

Du rơh rlu jŏ nar yơn rnăk wâl gâp gŭ tray Buôn Ma Thuột, gŭ tay tâm jay bah nơm n’hanh djăt uănh văn hóa kiău ma. N’hanh saơ kiău ma nơm geh dŭt âk ntil ndơ uĕh kơt nĕ. Mpŏng lah Dak Lak he mbra geh âk nău kan uĕh kơt nĕ lơn tay an âk rnăk wâl, geh âk rnăk wâl mô geh ndơ n’hanh geh rnăk wâl khân pơng ŭch uănh tay ri mô hôm rvê n’hanh saơ răm m’ak.

Lah nkual neh âk văn hóa đah 49 rnoi nuĭh gŭ rêh ndrel, bah meng ăp nău geh mpeh nău uĕh bri dak ri nău uĕh văn hóa bah ăp rnoi nuĭh ta ntŭk lah ntŭk uĕh êng bah pâl nđaih Dak Lak. Joi ƀư nău geh nĕ, mô knŭng tâm rơh lễ mhe rlău, ma ntŭk kan ƀư pâl nđaih ta Dak Lak năm bah năp lĕ janh ƀư ăp nău ƀư ngăn gay wăch rgum n’hanh dô̆t jâng năch pâl nđaih tât pâl nđaih ta ntŭk. Bah ăp ntrong ƀư aơ pơk luh ăp nău geh an pâl nđaih Tây Nguyên joi ƀư nău uĕh văn hóa ntŭk gŭ rêh ntŭk uĕh êng đah ăp nkual neh Cao Nguyên duh sial./.