Ôi ntri (26/4) ta nkual ƀon têh Buôn Ma Thuột, Cục ntrŭt ntrôl ngăch tăch rgâl - Bộ Công Thương kan nsum đah UBND n’gor Dak Lak ƀư tâm nchră ntrŭt ntrôl ngăch tăch rgâl n’hanh hun hao tăch n’gluh n’glăp nkual Tây Nguyên.

Tâm nchră ƀư tĭng trong pơk sŏng dăng nkre đah mâp na nê̆, nta trong dơh an âk mpưm kruanh rđău kan ăp n’gor ta Tây Nguyên, ăp hiệp hội ntil ndơ tăch, doanh nghiệp, ntơh măt ăp nhih pah kan, mpôl kan tăch rgâl tâm n’hanh bah dih dak tât râng. Wa Vũ Bá Phú, Cục trưởng Cục ntrŭt ntrôl ngăch tăch rgâl - Bộ Công thương lah rjăp, Tây Nguyên lah nkual neh geh tăm âk ntil tơm wăng sa khlay têh hvi, lơn lah tơm jong nar, tơm sa play. Du đêt ndơ tăch n’gluh mpeh  rmôt dâk bôk  năp tâm nkual tâm ban kơt lam ntŭr neh kơt cà phê, tiêu, chanh rse, điều. Rnoh hvi neh tăm ăp ntil tơm dak si khlay kơt: sâm Ngọc Linh, sâm rse, sêt linh chi gŭr, đinh lăng, hà thủ ô, đương quy, kao hòe… dôl hun hao ngăch đŏng, jêng ăp nkual tăm tơm dak si rgum ta Tây Nguyên.