Bai ngon tô thứ 2 mự 8/5/2017

Pàng hội trùng ường 5 chự mẳn kỷ luật vạy Đảng pẹk xằư hằn hanh

Chếp chằư lỏ khót pák đảy lài côn dần xủ chơ tô họt vịa Uỷ bàn kiểm trà Trùng ường gian chằm nị chị bók phạt mằư cán bộ nưng lỏ Uỷ viền bộ chính trị nuống pan họt phít thứk nẳng Tập đoàn Dầu khí phén mương Việt Nàm. Cón nặn lài cán bộ đàng dệt chức quyên cánh ma dặng hiu cọ đảy cờ quàn kiểm trà xùng nhất khòng Đảng vạu chảnh ók chơ pộ nuống pan họt nả vịa cán bộ hư va vịa dệt hại họt nặm bể nẳng bưởng trùng…

Cuồng 5 pì, tênh cá Đảng cọ phạt mằư kỷ luật chi áo họt 1.400 tổ chức Đảng cánh cài 74 păn đảng viền nẳng chu cấp. Cuồng số đảng viền chuốp kỷ luật, mi 82 tỉnh uỷ viền cánh piêng chức; cài 1.500 huyện uỷ viền cánh piêng chức; dáo 3 păn đnảg viền chuốp kỷ luật toi luông cách chức; cài 8.700 côn chuốp ók khói đảng cánh cài 4.300 cán bộ, đảng viền đảy phạt mằư toi tặt pùn khòng pháp luật.

Luông uồn pa khòng Nghị quyết Trùng ường 4 khoá 12 lỏ đảy tó xôn cẳn tơn pít xùi xìa pưng vịa dệt báu đì, lưn xưa lỏ kìn mảm húp, dệt nham pường xìa lạ. Phó giáo sư tiến sĩ Đào Duy Quát, cón nị lỏ phó Bàn thường trực Ban tư tưởng, vằn hoá trùng ường nhẳn danh: VỊa phạt mằư san chu vịa báu đì cuồng nả vịa cán bộ cánh san chu án kình tế nắc nà, cọ gian mưa khoẹ tủm pua đảy luông tin chưa khòng cán bộ đảng viền cánh dần mương đối cắp pàng xôn chinh pít xùi xìa nạn kìn mảm húp, dệt nham pường khay nị.

Tẳng tánh Đảng lỏ tẳng tánh luông tin chưa khòng dần mương xắư Đảng. Kìn mảm húp dệt nham pường chính lỏ nưng cuồng pưng cốc pài dệt dón luông tin chưa khòng dần mương đối cắp Đảng. Pưa xương nặn, cận phạt mằư xư mình pưng cán bộ đảng viền phít thứk, tà va lỏ nẳng cấp đằư./.

                                      Lại Hoa-Nội chính- TTT-Anh dịch

ꪉꪮꪙ ꪶꪕ ꪖꪳ 2 ꪣꪳ 8.5.2017

ꪜꪱꪉ ꪶꪭꪥ ꪊꪉꪴ ꪹꪮꪉ 5 ꪋꪳ ꪢꪽ ꪀꪲ ꪩꪺꪒ ꪼꪫ ꪒꪱꪉ ꪵꪜꪀ ꪻꪎ ꪬꪽ ꪵꪭꪉ

꫃ꪊꪚ ꪻꪊ ꪨꪷ ꪄꪮꪒ ꪜꪱꪀ ꪼꪒ ꪨꪱꪥ ꫛ ꫄ꪤꪙ ꪎꪴ ꫄ꪋ ꪶꪕ ꪭꪮꪒ ꪫꪀꪸ ꪮꪫꪲ ꪚꪱꪙ ꪀꪣꪸ ꪊꪱ ꪊꪉꪴ ꪹꪮꪉ ꪤꪱꪙ ꪊꪣꪾ ꪙꪲ ꪋꪲ ꪚꪮꪀ ꪡꪱꪒ ꪻꪢ ꪀꪱꪙ ꪶꪚ ꫜ ꪨꪷ ꪮꪫꪲ ꪪꪙꪸ ꪶꪛ ꪊꪉꪲ ꪋꪲ ꪠꪒꪲ ꪖꪀꪳ ꪘꪺꪉ ꪝꪱꪙ ꪭꪮꪒ ꪋꪴ ꪫꪀꪸ ꪘꪉꪰ ꫄ꪕꪚ ꪒꪫꪱꪙ ꪹꪤꪱ ꪄꪲ ꪵꪠꪙ ꪹꪣꪉ ꪫꪒꪸ ꪘꪱꪣ. ꪀꪮꪙ ꪙꪽ ꪨꪱꪥ ꪀꪱꪙ ꪶꪚ ꪒꪱꪉ ꫃ꪥꪒ ꪊꪀꪳ ꪁꪫꪙꪸ ꪵꪀꪉ ꪣꪱ ꪥꪉꪰ ꪬꪫꪲ ꪁꪷ ꪼꪒ ꫄ꪀ ꪀꪫꪱꪙ ꪀꪣꪸ ꪊꪱ ꪎꪉꪴ ꫄ꪐꪒ ꪄꪮꪉ ꪒꪱꪉ ꪹꪫꪱ ꪵꪊꪉ ꪮꪮꪀ ꫄ꪋ ꪶꪝ ꪘꪺꪉ ꪝꪱꪙ ꪭꪮꪒ ꪘꪱ ꪫꪀꪸ ꪀꪱꪙ ꪶꪚ ꪭꪳ ꪫꪱ ꪫꪀꪸ ꫃ꪥꪒ ꪭꪱꪥ ꪭꪮꪒ ꪙꪣꪾ ꫃ꪚ ꪘꪉꪰ ꪹꪚꪉ ꪊꪉꪴ.

ꪀꪺꪉ 5 ꪜꪲ ꫃ꪕꪉ ꪀꪱ ꪒꪱꪉ ꪁꪷ ꪡꪱꪒ ꪼꪢ ꪀꪲ ꪩꪺꪒ ꪤꪱꪫ 1.400 ꪶꪔ ꪊꪀꪳ ꪒꪱꪉ ꪵꪀꪉ ꪀꪱꪥ 74 ꪝꪽ ꪒꪱꪉ ꪪꪙꪸ ꪘꪉꪰ ꪋꪴ ꫄ꪀꪚ. ꪀꪺꪉ ꪶꪎ ꪒꪱꪉ ꪪꪙꪸ ꪊꪺꪚ ꪀꪲ ꪩꪺꪒ  ꪣꪲ 82 ꪔꪉꪲ ꪮꪫꪲ ꪪꪙꪸ ꪵꪀꪉ ꪝꪉꪸ ꪊꪀꪳ; ꪀꪱꪥ 1.500 ꪭꪫꪙꪸ ꪮꪫꪲ ꪪꪙꪸ ꪵꪀꪉ ꪝꪉꪸ ꪊꪀꪳ; ꪤꪱꪫ 3 ꪝꪽ ꪒꪱꪉ ꪪꪙꪸ ꪊꪺꪚ ꪀꪲ ꪩꪺꪒ ꪕꪮꪥ ꪩꪺꪉ ꪵꪀꪀ ꪊꪀꪳ; ꪀꪱꪥ 8.700 ꫛ ꪊꪺꪚ ꪹꪮꪱ ꪮꪮꪀ ꪄꪮꪥ ꪒꪱꪉ ꪵꪀꪉ ꪀꪱꪥ 4.300 ꪀꪱꪙ ꪶꪚ ꪒꪱꪉ ꪪꪙꪸ ꪼꪒ ꪡꪱꪒ ꪻꪢ ꪕꪮꪥ ꪕꪒꪰ ꪜꪙꪴ ꪄꪮꪉ ꪠꪱꪚ ꪩꪺꪒ.

ꪩꪺꪉ ꪜꪙꪴ ꪄꪮꪉ ꪈꪲ ꪀꪫꪒꪸ ꪊꪉꪴ ꪹꪮꪉ 4 ꪄꪫꪱ 12 ꪨꪷ ꪼꪒ ꪀꪽ ꫄ꪕꪙ ꪜꪒꪲ ꪎꪥꪴ ꪎꪸ ꪝꪉꪳ ꪫꪀꪸ ꫃ꪥꪒ ꪹꪚꪱ ꪒꪲ ꪩꪙꪳ ꪹꪏ ꪨꪷ ꪙꪱꪙ ꪀꪙꪲ ꪢꪱꪣ ꪬꪚꪴ ꫃ꪥꪒ ꪑꪱꪣ ꪹꪜꪉ ꪎꪸ ꪩꪱ. ꪠꪷ ꪤꪱꪫ ꪏꪳ ꪔꪙꪸ ꪎꪲ ꪒꪱꪫ ꪥꪥꪲ ꪀꪫꪱꪒ ꪀꪮꪙ ꪙꪲ ꪨꪷ ꪠꪷ ꪚꪱꪙ ꪹꪖꪉ ꪋꪀꪳ ꪚꪱꪙ ꪔꪳ ꪹꪔꪉ ꪪꪽ ꪬꪫꪱ ꪊꪉꪴ ꪹꪮꪉ ꪐꪽ ꪵꪥꪉ: ꪫꪀꪸ ꪡꪱꪒ ꪻꪢ ꪏꪱꪙ ꪋꪴ ꪫꪀꪸ ꪹꪚꪱ ꪒꪲ ꪀꪺꪉ ꪘꪱ ꪫꪀꪸ ꪀꪱꪙ ꪶꪚ ꪵꪀꪉ ꪏꪱꪙ ꪋꪴ ꪮꪱꪙ  ꪀꪉꪲ ꫃ꪔ ꪘꪀꪰ ꪘꪱ, ꪥꪱꪙ ꪹꪣ ꪵꪅꪀ ꪁꪷ ꪔꪣꪴ ꪝꪺ ꪼꪒ ꪩꪺꪉ ꪕꪙꪲ ꪹꪋ ꪄꪮꪉ ꪀꪱꪙ ꪶꪚ ꪒꪱꪉ ꪪꪙꪸ ꪵꪁꪉ ꫄ꪤꪙ ꪹꪣꪉ ꪶꪒꪥ ꪀꪚꪾ ꪜꪱꪉ ꪶꪏꪙ ꪋꪉꪲ ꪜꪒꪲ ꪎꪤꪴ ꪎꪸ ꪙꪱꪙ ꪀꪙꪲ ꪢꪱꪣ ꪬꪚꪴ ꫃ꪤꪒ ꪑꪱꪣ ꪹꪜꪉ ꪼꪅ ꪙꪲ.

ꪔꪉꪰ ꪵꪔꪉ ꪒꪱꪉ ꪨꪷ ꪔꪉꪰ ꪵꪔꪉ ꪩꪺꪉ ꪕꪙꪲ ꪹꪋ ꪄꪮꪉ ꫄ꪤꪙ ꪹꪣꪉ ꪻꪎ ꪒꪱꪉ. ꪀꪙꪲ ꪢꪱꪣ ꪬꪚꪴ ꫃ꪥꪒ ꪑꪱꪣ ꪵꪜꪉ ꪊꪉꪲ ꪨꪷ ꫜ ꪀꪺꪉ ꪝꪉꪳ ꪶꪀꪀ ꪜꪱꪥ ꫃ꪥꪒ ꪤꪮꪙ ꪩꪺꪉ ꪕꪙꪲ ꪹꪋ ꪄꪮꪉ ꫄ꪤꪙ ꪹꪣꪉ ꪶꪒꪥ ꪀꪚꪾ ꪒꪱꪉ. ꪹꪝ ꪹꪏꪉ ꪙꪽ ꫄ꪁꪙ ꪡꪱꪒ ꪻꪢ ꪏꪳ ꪢꪉꪲ ꪝꪉꪳ ꪀꪱꪙ ꪶꪚ ꪒꪱꪉ ꪪꪙꪸ ꪠꪒꪲ ꪖꪀꪳ ꪔꪱ ꪫꪱ ꪨꪷ ꪘꪉꪰ ꫄ꪀꪚ ꪻꪒ.

                                                        TTT- ꪕꪮꪉ ꪵꪯꪉ ꪥꪀꪲ