꫄ꪊꪚ ꪙꪣꪾ ꪥꪳ ꪮꪱꪙ 600 ꪠꪷ ꪋꪴ ꪕꪀꪲ ꪎꪱ ꪶꪠꪉ ꪼꪔ ꪚꪀꪷ

        5 ꪜꪲ ꪀꪱꪥ ꪣꪱꪶ ꫃ꪕꪉ ꫃ꪢꪒ ꪣꪲ 182 ꫛ ꪭꪳꪤ ꪏꪉꪸ ꪘꪮꪣ ꪀꪣꪾ, ꪣꪲ ꪩꪺꪉ ꪭꪴ ꪏꪉꪸ ꪓꪱꪥ ꪭꪮꪀ ꪁꪷ ꪼꪒ ꪔꪫꪙꪸ ꪹꪩꪀ ꪨꪷ ꪶꪓꪥ ꪪꪙꪸ ꪥꪳ ꪮꪱꪙ ꪵꪀꪉ ꪼꪒ ꪹꪮꪱ ꪼꪜ ꫃ꪥꪒ ꪠꪷ ꪊꪴ ꪕꪀꪲ ꪮꪫꪲꪥ  ꪚꪱꪙ ꫄ꪤꪙ ꪹꪣꪉ ꪎꪱ ꪘꪉꪷ 21 ꪭꪫꪙꪸ ꪁꪒꪷ ꪄꪮꪉ ꪔꪉꪲ ꪼꪔ ꪚꪀꪷ ꪶꪭꪣ ꪣꪲ ꪨꪱꪥ ꪹꪊꪱꪌ ꪓꪙꪸ ꪚꪙꪸꪶ ꫄ꪎꪙ ꪨꪱ, ꪩꪫꪱ ꪀꪱꪥ ꪵꪀꪉ ꪮꪙꪸ ꪚꪱꪥ. ꫄ꪡꪙ ꪨꪱꪥ ꪝꪉꪳ ꪶꪓꪥ ꪪꪙꪸ ꪥꪳ ꪮꪱꪙ ꪀꪚꪾ ꪝꪀꪷ ꪵꪭꪉ ꪘꪮꪣ ꪀꪣꪾ, ꪭꪉꪷ ꪻꪊ ꪫꪽ ꪥꪮꪀ ꪁꪷ ꪐꪽ ꪵꪥꪉ ꪼꪒ ꪩꪺꪉ ꪮꪺꪙ ꪝꪱ, ꪀꪫꪱꪘ ꪨꪲ ꪀꪺꪉ ꪵꪊꪀ ꪑꪣꪸ ꪨꪷ ꪠꪷ ꪊꪴ ꪕꪀꪲ ꪮꪫꪲꪥ ꪚꪱꪙ ꫄ꪤꪙ ꪹꪣꪉ ꪎꪱ; ꪨꪱꪥ ꪩꪺꪉ ꫃ꪥꪒ ꪎꪴ ꪅꪫꪱ ꪭꪮꪀ ꪶꪁꪉ ꫃ꪉ ꪎꪉꪴ ꪻꪎ ꪫꪀꪸ ꫃ꪤꪒ ꪹꪥꪙ ꪹꪏꪉ ꪩꪺꪉ ꪵꪔꪉ ꪩꪉꪸ ꪶꪔ ꪹꪨꪙ ꪘꪉꪷ ꪙꪣꪾ ꪑꪙꪴꪶ ꪔꪉꪲ ꪨꪱꪥ ꪹꪊꪱ, ꪜꪀꪴ ꪘꪷ ꪚꪱꪒ ꪶꪓ ꪘꪉꪷ ꫄ꪊꪙ ꪮꪙꪸ ꪔꪉꪲ ꪮꪙꪸ ꪚꪱꪥ , ꪩꪺꪉ ꪜꪀꪴ ꪀꪷ ꪕꪱꪣ ꫄ꪖꪒ ꪘꪉꪷ ꪢꪱꪙ ꫄ꪖꪙ , ꪏꪲ ꪣꪱ ꪁꪱꪥ - ꪩꪱꪫ ꪀꪱꪥ ꪼꪒ ꫄ꪀꪚ ꪮꪫꪲꪥ ꪊꪉꪲ ꪁꪫꪙꪸ ꪵꪀꪉ ꫄ꪤꪙ ꪹꪣꪉ ꪓꪸ ꪹꪠꪉ ꪚꪙꪲ ꪢꪱꪥ ꪐꪽ ꪵꪥꪉ ꪎꪉꪴ.

          ꪬꪱꪀ ꪫꪱ, ꪀꪺꪉ ꪥꪱꪙ ꫄ꪊꪚ ꪙꪣꪾ ꪥꪳ ꪮꪱꪙ, ꪩꪺꪉ ꪭꪴ ꪋꪱꪉ ꪢꪱ ꪕꪱꪉ ꪋꪫꪙꪸ ꪶꪣꪙ, ꪬꪱꪀ ꪫꪱ ꫃ꪭ ꪣꪲ ꪀꪉꪲ ꪉꪣꪸ ꫃ꪥꪒ ꪫꪀꪸ, ꪹꪚꪱ ꪭꪴ ꪁꪫꪱꪣ ꪹꪋ ꪙꪮꪥ ꫛ ꫃ꪭ ꪭꪴ ꫄ꪅꪉ ꪵꪀꪉ ꪈꪣꪾ ꪜꪙꪴ ꪀꪺꪉ ꪫꪀꪸ ꪢꪱ ꪼꪄ ꪝꪉꪳ ꪩꪺꪉ ꫃ꪥꪒ, ꪝꪉꪳ ꫃ꪒ ꪮꪱꪙ, ꪩꪺꪉ ꪭꪴ ꪊꪱꪉ ꪼꪫ ꪀꪮꪚ ꪖꪮꪥ ꪶꪭꪣ ꪁꪫꪱꪣ ꪎꪷ ꪼꪫ, ꪀꪺꪉ ꪝꪉꪳ ꪫꪀꪸ ꫃ꪥꪒ ꪘꪉꪷ ꪓꪸ ꪹꪠꪉ ꪹꪏꪉ ꪙꪽ ꪫꪀꪸ ꪊꪮꪉ ꪵꪭꪉ ꪻꪬ ꪝꪉꪳ ꪎꪱ ꪁꪒꪷ ꪁꪉꪴ ꪄꪮꪉ ꪝꪉꪳ ꪶꪓꪥ ꪪꪙꪸ ꫃ꪭ ꪼꪒ ꪨꪱꪥ.

          ꪘꪉꪷ ꪜꪱꪉ ꪭꪮꪚ , ꪨꪱꪥ ꪶꪓꪥ ꪪꪙꪸ ꪁꪷ ꪹꪪꪱ ꪄꪙꪳ ꪨꪱꪉ ꪣꪮꪙ ꪄꪮꪉ ꪹꪊꪱ, ꪵꪮ ꪹꪮꪱ ꪝꪀꪷ ꪵꪭꪉ ꪘꪮꪣ ꪀꪣꪾ ꪎꪚꪳ ꪔꪱꪣ ꪎꪮꪉ ꪵꪭꪉ ꪻꪬ ꪓꪸ ꪹꪠꪉ, ꪎꪮꪉ ꪣꪱ ꪢꪮꪉ ꪁꪮꪉ ꪵꪮ ꪵꪕꪒ ꪕꪉꪸ ꪚꪮꪙ ꫃ꪥꪒ ꪫꪀꪸ, ꪼꪒ ꪹꪄꪱ ꪚꪙꪸ ꫃ꪊ ꪼꪫ ꪮꪙꪸ ꪻꪊ ꫃ꪥꪒ ꪫꪀꪸ.

          ꪫꪀꪸ ꪻꪬ ꪝꪸ ꪙꪮꪉ ꪘꪮꪣ ꪀꪣꪾ ꪣꪲ ꪩꪺꪉ ꪭꪴ ꪏꪉꪸ ꪼꪜ ꪀꪱ ꪶꪠꪉ ꪝꪷ ꪨꪱꪥ ꪥꪱꪀ ꪋꪱ ꪨꪷ ꫄ꪁꪙ ꪬꪱ. ꪥꪱꪙ ꪼꪜ ꪘꪱ, ꪝꪉꪳ ꫄ꪀꪚ ꪣꪲ ꪊꪀꪳ ꪁꪫꪙꪸ ꫄ꪁꪙ ꪎꪚꪳ ꪔꪱꪣ ꪔꪣꪴ ꪝꪺ ꪩꪺꪉ ꪭꪴ ꪋꪱꪉ ꪻꪬ ꪝꪉꪳ ꪶꪓꪥ ꪪꪙꪸ, ꪎꪚꪳ ꪔꪱꪣ ꪕꪒꪷ ꪜꪙꪴ, ꪕꪱ ꪄꪴ ꪈꪱꪥ ꪒꪲ ꪻꪬ ꪶꪓꪥ ꪪꪙ ꪸ꫃ꪥꪒ ꪫꪀꪸ ꪼꪫ ꫃ꪜꪙ ꫛ ꫃ꪥꪒ ꪫꪀꪸ ꫄ꪬꪉ ꪭꪲ ꪻꪬ ꫄ꪀ ꫄ꪎ.

                                                                   ꪮꪱꪙ ꪁꪙꪸ - ꪵꪭꪉ ꪥꪀꪲ

Chấp năm Dự án 600 Phó Chủ tịch xã phổng Tây bắc

5 pi cài ma, tênh mết mi 182 côn hụ xiêng nóm căm, mi luông hụ xiêng ép lẹo đại học cọ đảy tuyển lựa pên đội viên dự án cánh đảy àu pảy dệt Phó Chủ tịch Ủy ban dân mương xã nẳng 21 huỵên cặt khong 5 tỉnh Tây Bắc hôm mi Lai Châu, Điện Biên, Sơn La, Lao Cài cánh Yên Bái. Phân lai pưng đội viên Dự án cắp pặc hanh nóm căm, hăng chàư văn dọc cọ nhẳn danh đảy luông chang uôn pa, quản lý cắp trách nhiệm lỏ Phó Chủ tịch Uỷ ban dân mương xã; lai luông dệt xủ khoa học công nghệ xùng sáư vịa dệt dượn xương luông tảnh liệng tô lườn nẳng Nặm Nhun, tỉnh Lai Châu, púk nó Bát độ nẳng Trấn Yên tỉnh Yên Bái, luông púk co Tam Thất nẳng Mản Thẩn, Si Ma Cai - Lao Cài, đảy cấp uỷ, chính quyên cánh dân mương địa phương biên mai, nhẳn danh xùng.

Hák va, cuông dan chấp năm Dự án, chăm va mi luông hụ chang ma tang chuyên môn, hák va hê mi lai kinh nghiệm dệt vịa, báu hụ quam chựa nọi côn, hê hụ khâng, cánh chang ngắm pun cuông vịa mả khày pưng luông dệt, pưng đề án, luông hụ chang vạy cóp thỏi hôm quam xo vay, cuông pưng vịa dệt nẳng địa phương xương nặn vịa chóng hanh hảu pưng xã cặt cung khong pưng Đội viên hê đảy lài.

Nẳng pang họp, lai Đội viên cọ vạu khửn lang mon khong chảu, é àu pặc hanh nóm căm xứp tam chóng hanh hảu địa phương, xòng ma mong cong é mi vịa dệt tẹt tiêng, đảy khảu biên chế vạy yên chàư dệt vịa.

Vịa hảu pi nọng nóm căm mi luông hụ xiêng pày cá phổng pọ lai dạk cha lỏ cận hà. Dan pày nả, pưng cấp mi chức quyên cận xứp tam tủm pua luông hụ chang hảu pưng đội viên, xứp tam tặt pun, tạk khu ngai đì hảu đội viên dệt vịa vạy pên côn dệt vịa hâng hy hảu cơ sở./.   

                                      An Kiên - Hạnh dịch