Lăm le-Dệt pẹk xằư chủm mú cán bộ

          Toi pưng đại biểu, vịa lăm le nả vịa cán bộ cuồng dan khạy nị lỏ khù cận hà. Pưa nạn len chức, len quyên, len nhại chiên pày dệt vịa bón đì cọ dệt họn hưn cuồng bản mương, dệt hại họt luông tin chưa Đảng cánh luông tin chưa khòng dần mương cắp pưng cơ quàn hươn nước. Pưa xương nặn, tổng kiểm tra lăm le lỏ vịa dệt men luông, cựt tóp đảy lang áo khòng côn dần. Xòng ma, hẳư dặng xìa pưng côn báu mi luông hụ xiêng cuồng vịa dệt.

Khù nưng cuồng pưng khù  đảy pưng đại biểu pồng chằư cuồng vịa lăm le nả vịa cán bộ,  ặn lỏ vịa xủ băng cấp khòng cán bộ cồng chức, viên chức. Pưa va khu ni tẹ hẳư hền, cọ mi côn đảy hụ hền ók xủ băng cấp báu men tặt pùn, báu xư mình. Vịa xủ băng cấp giả báu chư hịa hền ók nẳng địa phường nưng hư hền ók nẳng lài bón, lài cấp. Pưa xương nặn, ặn nị chí lỏ luông pùn nưng đảy pồng chằư lăm le. Va hụ hền phít thứk cuồng vịa xủ băng cấp hư đảy lăm le lau tênh mết luông kìn dú khòng cán bộ nặn va mi phít thứk hư tàm toi mức phít thứk vạy phạt mằư.

          Vạy chấp năm đì vịa lăm le, dệt hẳư chủm mú cán bộ pẹ xằư hằn hanh, mi luông hụ xiêng vạy quản lý uồn pa nả vịa đảy giào, pưng đại biểu va hịa, cận giào hẳư bàn tổ chức Trung ương cạt kiên cắp Bộ giáo dục đào tạo kiểm tra, lăm le lau tênh mết pưng băng cấp khòng cán bộ mi chức, mi quyên. Xòng ma nhọng nho côn dần, cán bộ cồng chức chôm hặp pứt pưởi vạu ók côn dệt phít thứk.

          Pưng đại biểu cọ xò vay, lằng chơ kiểm tra lăm le, đối cắp pưng côn dệt phít thứk, cận vạu ók hẳư côn dần hụ. Dệt đảy xương nặn, chắng vạu khửn đảy luông xư mình khòng chuông máy hươn nước, khòng vịa quản lý cánh tủm pua luông tin chưa khòng côn dần đối cắp tổ chức thanh tra khạy nị./.

TTT-Huyền dịch

ꪩꪾ ꪵꪩ-꫃ꪥꪒ ꪵꪝꪀ ꪻꪎ ꪋꪺꪉ ꪼꪢ ꪀꪱꪙ ꪶꪛ

          ꪕꪮꪥ ꪝꪉꪳ ꪒꪱꪥ ꪚꪫꪸ ꪫꪀꪸ ꪩꪾ ꪵꪩ ꪘꪱ ꪫꪀꪸ ꪀꪱꪙ ꪶꪛ ꪀꪺꪉ ꪥꪱꪙ ꪼꪅ ꪙꪲ ꪨꪷ ꪄꪴ ꫄ꪁꪙ ꪬꪱ. ꪹꪝ ꪙꪱꪙ ꪵꪩꪙ ꪊꪀꪳ ꪵꪩꪙ ꪁꪫꪙꪸ ,ꪵꪩꪙ ꪑꪱꪥ ꪋꪙꪸ ꪚꪮꪙ ꫃ꪥꪒ ꪫꪀꪸ ꪚꪮꪙ ꪒꪲ ꪁꪷ ꫃ꪥꪒ ꪭꪮꪙ ꪭꪙꪳ ꪀꪺꪉ ꪚꪱꪙ ꪹꪣꪉ ,꫃ꪥꪒ ꪭꪱꪥ ꪭꪮꪒ ꪩꪺꪉ ꪕꪙꪲ ꪹꪋ ꪄꪮꪉ ꪒꪱꪉ ꪵꪀꪉ ꪩꪺꪉ ꪕꪙꪲ ꪹꪋ ꪄꪮꪉ ꫄ꪥꪙ ꪹꪣꪉ ꪀꪚꪾ ꪝꪉꪳ ꫄ꪀ ꪀꪫꪱꪙ ꪹꪭꪙ ꪹꪢꪀ. ꪹꪝ ꪹꪏꪉ ꪙꪽ ,ꪫꪀꪸ ꪶꪔꪉ ꪀꪣꪸ ꪋꪱ ꪩꪾ ꪵꪩ ꪨꪷ ꪫꪀꪸ ꫃ꪥꪒ ꪵꪣꪙ ꪩꪺꪉ ꪁꪒꪳ ꪕꪮꪚ ꪼꪒ ꪩꪱꪉ ꪮꪱꪫ ꪄꪮꪉ ꫛ ꫄ꪤꪙ. ꪎꪮꪉ ꪣꪱ ꪻꪬ ꪤꪉꪰ ꪎꪸ ꪝꪉꪳ ꫛ ꪹꪚꪱ ꪭꪴ ꪏꪉꪸ ꪀꪺꪉ ꪫꪀꪸ ꫃ꪥꪒ.

          ꪄꪴ ꫜ ꪁꪺꪉ ꪝꪉꪳ ꪄꪴ ꪼꪒ ꪒꪱꪥ ꪚꪫꪸ ꪶꪜꪉ ꪻꪊ ꪀꪺꪉ ꪫꪀꪸ ꪩꪾ ꪵꪩ ꪘꪱ ꪫꪀꪸ ꪀꪱꪙ ꪶꪛ ,ꪯꪽ ꪨꪷ ꪫꪀꪸ ꪎꪴ ꪚꪉꪰ ꫄ꪀꪚ ꪄꪮꪉ ꪀꪱꪙ ꪶꪛ ꪶꪀꪉ ꪊꪀꪳ ,ꪪꪙꪸ ꪊꪀꪳ. ꪹꪝ ꪫꪱ ꪄꪴ ꪣꪲ ꪵꪕ ꪻꪬ ꫃ꪬꪙ ,ꪁꪷ ꪣꪲ ꫛ ꪼꪒ ꪭꪴ ꫃ꪬꪙ ꪎꪴ ꪚꪉꪰ ꫄ꪀꪚ ꪹꪚꪱ ꪵꪣꪙ ꪕꪒꪰ ꪜꪙꪴ ,ꪹꪚꪱ ꪏꪳ ꪢꪉꪲ. ꪫꪀꪸ ꪎꪴ ꪚꪉꪰ ꫄ꪀꪚ ꪤꪱ ꪹꪚꪱ ꪋꪳ ꪭꪀꪸ ꫃ꪬꪙ ꪮꪮꪀ ꪘꪉꪰ ꪒꪸ ꪹꪠꪉ ꫜ ꪭꪳ ꫃ꪬꪙ ꪮꪮꪀ ꪘꪉꪰ ꪨꪱꪥ ꪚꪮꪙ ,ꪨꪱꪥ ꫄ꪀꪚ. ꪹꪝ ꪹꪏꪉ ꪙꪽ ,ꪯꪽ ꪙꪲ ꪋꪲ ꪨꪷ ꪩꪺꪉ ꪜꪙꪴ ꫜ ꪼꪒ ꪶꪜꪉ ꪻꪊ ꪩꪾ ꪵꪩ. ꪫꪱ ꪭꪴ ꫃ꪬꪙ ꪮꪮꪀ ꪠꪒꪲ ꪖꪀꪳ ꪀꪺꪉ ꪫꪀꪸ ꪎꪴ ꪚꪉꪰ ꫄ꪀꪚ ꪭꪴ ꪼꪒ ꪩꪾ ꪵꪩ ꪹꪩꪱ ꫃ꪕꪉ ꫃ꪢꪒ ꪩꪺꪉ ꪀꪙꪲ ꪤꪴ ꪄꪮꪉ ꪀꪱꪙ ꪶꪛ ꪙꪽ ꪫꪱ ꪣꪲ ꪠꪒꪲ ꪖꪀꪳ ꪭꪴ ꪔꪱꪣ ꪕꪮꪥ ꪢꪀꪳ ꪠꪒꪲ ꪖꪀꪳ ꪼꪫ ꪡꪱꪒ ꪻꪢ.

          ꪼꪫ ꫄ꪊꪚ ꪙꪾ ꪒꪲ ꪫꪀꪸ ꪩꪾ ꪵꪩ ꫃ꪥꪒ ꪻꪬ ꪊꪣꪴ ꪢꪴ ꪀꪱꪙ ꪶꪛ ꪵꪝꪀ ꪻꪎ ꪬꪽ ꪵꪭꪉ ,ꪣꪲ ꪩꪺꪉ ꪭꪴ ꪏꪉꪸ ꪼꪫ ꪀꪫꪱꪙ ꪨꪷ ꪮꪺꪙ ꪝꪱ ꪘꪱ ꪫꪀꪸ ꪼꪒ ꪤꪱꪫ ,ꪝꪉꪳ ꪒꪱꪥ ꪚꪫꪸ ꪫꪱ, ꫄ꪁꪙ ꪤꪱꪫ ꪻꪬ ꪚꪱꪙ ꪶꪔ ꪊꪀꪳ ꪊꪉꪴ ꪹꪮꪉ ꪁꪱꪒ ꪁꪙꪸ ꪀꪚꪾ ꪶꪛ ꪤꪱꪫ ꪥꪴꪀ ꪒꪱꪫ ꪔꪱꪫ ꪀꪣꪸ ꪋꪱ ,ꪩꪾ ꪵꪩ ꪹꪩꪱ ꫃ꪕꪉ ꫃ꪢꪒ ꪚꪉꪰ ꫄ꪀꪚ ꪄꪮꪉ ꪀꪱꪙ ꪶꪛ ꪣꪲ ꪊꪀꪳ ꪢꪲ ꪁꪫꪙꪸ. ꪎꪮꪉ ꪣꪱ ꪑꪮꪉ ꪑꪷ ꫛ ꫄ꪤꪙ ,ꪀꪱꪙ ꪶꪛ ꪶꪀꪉ ꪊꪀꪴ ꪶꪋꪣ ꪭꪚꪾ ꪜꪒꪴ ꪹꪜꪥ ꪹꪫꪱ ꪮꪮꪀ ꫛ ꫃ꪤꪒ ꪠꪒꪲ ꪖꪀꪳ.

          ꪝꪉꪴ ꪒꪱꪥ ꪚꪫꪸ ꪀꪷ ꪎꪷ ꪼꪫ ,ꪨꪉꪰ ꫄ꪋ ꪀꪣꪸ ꪋꪱ ꪩꪷ ꪵꪩ ꪶꪒꪥ ꪀꪚꪾ ꪝꪉꪳ ꫛ ꫃ꪥꪒ ꪠꪒꪲ ꪖꪀꪳ ꫄ꪁꪙ ꪹꪫꪱ ꪮꪮꪀ ꪻꪬ ꫛ ꫄ꪤꪙ ꪭꪴ. ꫃ꪥꪒ ꪼꪒ ꪹꪏꪉ ꪙꪽ ꪊꪉꪰ ꪋꪲ ꪹꪫꪱ ꪄꪙꪳ ꪼꪒ ꪩꪺꪉ ꪏꪳ ꪢꪉꪲ ꪄꪮꪉ ꪋꪺꪉ ꪼꪢ ꪹꪭꪙ ꪹꪘꪀ ꪀꪺꪉ ꪫꪀꪸ ꪀꪫꪱꪙ ꪨꪷ ꪵꪀꪉ ꪔꪣꪴ ꪝꪺ ꪩꪺꪉ ꪕꪙꪲ ꪹꪋ ꪄꪮꪉ ꫛ ꫄ꪤꪙ ꪶꪒꪥ ꪀꪚꪾ ꪶꪔ ꪊꪀꪴ ꪵꪖꪉ ꪊꪱ ꪼꪅ ꪙꪲ.

ꪹꪩꪉ ꪬꪫꪙꪸ ꪥꪲꪀ