Chủ tịch Quốc hội Nguyễn Thị Kim Ngân

Báu vạy Điện Biên cặt cung đảy

          Toi Bí thư tỉnh Điện Biên Trần Văn Sơn, Điện Biên lỏ tỉnh đìn pu bưởng Bắc khòng bản mương mi tang đèn mương hy cài 400 cày số dú tó cắp mương bạn Lao cánh Trung Quốc. Tênh cá tỉnh mi 10 đơn vị hành chính cấp huyện; 130 xã, phường, thị trấn, cuồng nặn 110 xã pọ dạk cha cánh dú tó đèn mương; mi 19 chựa côn kìn dú.

          Tênh mết thù ngần sách khòng địa phường pì 2016 cựt đảy 7.425 tỷ mằn, pộn cài 10% dự toán giào. Ăn nị cọ men pì cốc khoẹ tỉnh Điện Biên cựt đảy mức thù ngần sách cài păn nưng tỷ mằn.

          Bí thư tỉnh Điện Biên Trần Văn Sơn xò vay chủ tịch Quốc hội pồng chằư, lăm le số ngơn cốc nhăng đút thiếu cài 596 tỷ mằn vạy tỉnh Điện Biên dòm xắư tẳng tánh mộm lẹo pưng dự án cốc chính nẳng phổng nhại dần thuỷ điện Sơn La; lăm le vịa chấp năm uồn pa khòng Thủ tướng Chính phủ ma tang vịa hẳư côn dần nhai pày pai ma khảu mưa dú nẳng huyện Mương Nhé; Quốc hội nghiên cứu xỏm pành nho mức nhọng nho, choi dừa cuồng chính sách púc chuân pưng chảu dòm ngơn cốc đối cắp pưng tỉnh Tày Bắc; nho cấp phiềng xè bìn Điện Biên Phủ.

          Tiện tô nẳng chu dệt vịa, Bộ trưởng Bộ Nông nghiệp mả pe bản na Nguyễn Xuân Cường bánh pằn pưng khù dạk cha, hương chôm mâng pưng lang đì khòng tỉnh Điện Biên cựt đảy.

          Tiện tô khót nang nẳng chu dệt vịa, Chủ tịch Quốc hội Nguyễn Thị Kim Ngân nhẳn danh xùng pưng lang đì khòng tỉnh Điện Biên cựt đảy. Chủ tịch Quốc hội va hịa, khạy nị Điện Biên đàng mi số chua hươn cặt lài nhất mương, cốc ngươn sính khòng đút thiếu, hák va Điện Biên cọ mi luông hăng hanh vạy mả khày, lưn xưa lỏ nả vịa du lịch. Điện Biên mi xương cặt ma tang kinh tế, hák va báu cặt ma tang vằn hoá, khù đáng pồng chằư  tỉnh nị hê mi luông pùn vạy chự mẳn, pếnh khày ngươn lang vằn hoá riềng nị.

          Cắp lang mon khòng chu chựa dần mương kìn dú nẳng nị àu Điện Biên mả khày lài xưa mắư, chủ tịch Quốc hội va hịa, Việt Nàm cọ mi bón biền mài Điện Biên Phủ điều hư báu vạy Điện Biên cặt cung hầng hy đảy.

          Ma tang pưng quam xò vay khòng phủ uồn pa tỉnh Điện Biên, chủ tịch Quốc hội cọ tặt pùn hẳư pưng bộ, ngành mi nuống pan, pưng Uỷ bàn khòng Quốc hội mi trách nhiệm nghiên cứu, tóp quam thàm hẳư men chủ trương, luông tang, chính sách. Pâng xắư vịa chấp năm quam khót nang khòng pưng đồng chí uồn pa Đảng cánh hươn nước dệt vịa, uồn pa nẳng Điện Biên.

          Chu dệt vịa cắp phủ uồn pa tỉnh Điện Biên cọ đốp muộn chu dệt vịa khòng chủ tịch Quốc hội cánh đoàn cồng tác nẳng 2 tỉnh đìn pu bưởng bắc ặn lỏ Lai Châu cánh Điện Biên./.

                          ꪊꪴ ꪕꪀꪲ ꪀꪺꪀ ꪶꪭꪥ ꪈꪫꪙꪸ ꪖꪲ ꪁꪣꪲ ꫄ꪉꪙ: ꪹꪚꪱ ꪼꪫ ꪓꪙꪸ ꪚꪙꪸ ꪁꪒꪰ ꪁꪴꪉ ꪼꪒ

ꪕꪮꪥ ꪚꪲ ꪖꪳ ꪔꪉꪲ ꪓꪙꪸ ꪚꪙꪸ ꫄ꪊꪙ ꪪꪽ ꫄ꪎꪙ ,ꪓꪙꪸ ꪚꪙꪸ ꪨꪷ ꪔꪉꪲ ꪒꪙꪲ ꪝꪴ ꪕꪱꪉ ꪹꪚꪉ ꪚꪀꪰ ꪄꪮꪉ ꪚꪱꪙ ꪹꪣꪉ ꪣꪲ ꪕꪱꪉ ꪵꪒꪙ ꪹꪣꪉ ꪭꪲ 400 ꪼꪀ ꪶꪎ ꪤꪴ ꪔꪷ ꪹꪣꪉ ꪚꪱꪙ ꪩꪱꪫ ꪵꪀꪉ ꪋꪴꪉ ꪀꪺꪀ. ꫃ꪕꪉ ꪀꪱ ꪔꪉꪲ ꪣꪲ 10 ꫄ꪒꪙ ꪫꪲ ꪵꪬꪉ ꪊꪉꪲ ꫄ꪀꪚ ꪭꪫꪙꪸ; 130 ꪎꪱ, ꪹꪠꪉ ,ꪖꪲ ꫄ꪊꪙ ,ꪀꪺꪉ ꪙꪽ ꪣꪲ 110 ꪎꪱ ꪝꪷ ꪥꪱꪀ ꪋꪱ ꪵꪀꪉ ꪤꪴ ꪔꪷ ꪵꪒꪙ ꪹꪣꪉ; ꪣꪲ 19 ꪹꪋ ꫛ ꪀꪙꪲ ꪤꪴ.

          ꫃ꪕꪉ ꫃ꪢꪒ ꪖꪴ ꫄ꪈꪙ ꪵꪎꪀ ꪄꪮꪉ ꪒꪸ ꪹꪠꪉ ꪜꪲ 2016 ꪁꪒꪳ ꪼꪒ 7425 ꪔꪲ ꪢꪽ, ꪶꪝꪙ ꪀꪱꪤ 10% ꪤꪳ ꪔꪫꪱꪙ ꪤꪱꪫ. ꪮꪽ ꪙꪲ ꪁꪷ ꪵꪣꪙ ꪜꪲ ꪶꪀꪀ ꪵꪅꪫ ꪓꪙꪸ ꪚꪙꪸ ꪁꪒꪳ ꪼꪒ ꪢꪀꪳ ꪖꪴ ꫄ꪈꪙ ꪵꪎꪀ ꪀꪱꪥ ꪝꪽ ꫜ ꪔꪲ ꪢꪽ.

          ꪚꪲ ꪖꪳ ꪓꪙꪸ ꪚꪙꪸ ꫄ꪊꪙ ꪪꪽ ꫄ꪎꪙ ꪎꪷ ꪼꪫ ꪊꪴ ꪕꪀꪲ ꪀꪺꪀ ꪶꪭꪥ ꪶꪜꪉ ꪻꪊ, ꪩꪣꪾ ꪵꪩ ꪶꪎ ꫄ꪉꪙ ꪶꪀꪀ ꪑꪉꪰ ꪒꪴꪒ ꪖꪫꪸ ꪀꪱꪥ 596 ꪔꪲ ꪢꪽ ꪼꪫ ꪓꪙꪸ ꪚꪙꪸ ꪤꪮꪣ ꪻꪎ ꪔꪉꪰ ꪵꪔꪉ ꪶꪣꪣ ꪵꪩꪫ ꪝꪉꪳ ꪥꪳ ꪮꪱꪙ ꪶꪀꪀ ꪊꪉꪲ ꪘꪉꪰ ꪶꪠꪉ ꪑꪱꪥ ꫄ꪤꪙ ꪖꪫꪸ ꪓꪙꪸ ꫄ꪎꪙ ꪨꪱ; ꪩꪣꪾ ꪵꪩ ꪫꪀꪸ ꫄ꪊꪚ ꪙꪣꪾ ꪮꪺꪙ ꪝꪱ ꪄꪮꪉ ꪖꪴ ꪹꪔꪉ ꪊꪉꪲ ꪠꪴ ꪣꪱ ꪕꪱꪉ ꪫꪀꪸ ꪻꪬ ꫛ ꫄ꪤꪙ ꪑꪱꪥ ꪼꪜ ꪝꪱꪥ ꪣꪱ ꪹꪄꪱ ꪹꪣ ꪤꪴ ꪘꪉꪰ ꪭꪫꪙꪸ ꪹꪣꪉ ꪵꪐ; ꪀꪺꪀ ꪶꪭꪥ ꪈꪙꪸ ꪀꪫꪲ ꪎꪮꪣ ꪵꪜꪉ ꪑꪷ ꪢꪀꪳ ꪑꪮꪉ, ꪋꪮꪥ ꪹꪤ ꪀꪺꪉ ꪊꪉꪲ ꪵꪎꪀ ꪜꪴꪀ ꪋꪺꪙ ꪝꪉꪳ ꪹꪊꪱ ꪤꪮꪣ ꫄ꪉꪙ ꪶꪀꪀ ꪶꪒꪥ ꪀꪚꪾ ꪝꪉꪳ ꪔꪉꪲ ꪼꪔ ꪚꪀꪰ; ꪑꪷ ꫄ꪀꪚ ꪠꪉꪸ ꪵꪎ ꪚꪙꪲ ꪓꪙꪸ ꪚꪙꪸ ꪠꪴ.

          ꪕꪙꪸ ꪶꪕ ꪘꪉꪰ ꪋꪴ ꫃ꪥꪒ ꪫꪀꪸ, ꪶꪛ ꪹꪊꪉ ꪶꪛ ꪶꪘꪉ ꪉꪚꪸ ꪢꪱ ꪵꪝ ꪚꪱꪙ ꪙꪱ ꪵꪚꪉ ꪜꪽ ꪝꪉꪳ ꪄꪴ ꪥꪱꪀ ꪋꪱ, ꪹꪭꪉ ꪶꪋꪣ ꫄ꪣꪉ ꪝꪉꪳ ꪩꪱꪉ ꪒꪲ ꪄꪮꪉ ꪔꪉꪲ ꪓꪙꪸ ꪚꪙꪸ ꪁꪒꪳ ꪼꪒ.

          ꪕꪙꪸ ꪶꪕ ꪄꪮꪒ ꪙꪱꪉ ꪘꪉꪰ ꪋꪴ ꫄ꪥꪒ ꪫꪀꪸ, ꪊꪴ ꪕꪀꪲ ꪀꪺꪀ ꪶꪭꪥ ꪈꪫꪙꪸ ꪖꪲ ꪁꪣꪲ ꫄ꪉꪙ ꪐꪽ ꪵꪥꪉ ꪎꪴꪉ ꪝꪉꪳ ꪩꪱꪉ ꪒꪲ ꪄꪮꪉ ꪓꪙꪸ ꪚꪙꪸ ꪁꪒꪳ ꪼꪒ. ꪊꪴ ꪕꪀꪲ ꪀꪺꪀ ꪶꪭꪥ ꪫꪱ ꪭꪀꪸ, ꪼꪅ ꪙꪲ ꪓꪙꪸ ꪚꪙꪸ ꪒꪱꪉ ꪣꪲ ꪶꪎ ꪋꪺ ꪹꪭꪙ ꪁꪒꪰ ꪨꪱꪥ ꫄ꪐꪒ ꪹꪣꪉ ,ꪶꪀꪀ ꪹꪉꪙ ꪎꪉꪲ ꪄꪮꪉ ꪐꪉꪰ ꪒꪴꪒ ꪖꪫꪸ, ꪭꪱꪀ ꪫꪱ ꪓꪙꪸ ꪚꪙꪸ ꪁꪷ ꪣꪲ ꪩꪺꪉ ꪭꪉꪰ ꪵꪭꪉ ꪼꪫ ꪢꪱ ꪼꪄ ,ꪩꪙꪳ ꪹꪏ ꪨꪷ ꪫꪀꪸ ꫃ꪥꪒ ꪤꪴ ꪩꪲꪀ. ꪓꪙꪸ ꪚꪙꪸ ꪣꪲ ꪹꪏꪉ ꪁꪒꪰ ꪁꪴꪉ ꪣꪱ ꪔꪱꪉ ꪀꪉꪲ ꫃ꪔ, ꪭꪱꪀ ꪫꪱ ꪹꪚꪱ ꪁꪒꪰ ꪁꪴꪉ ꪣꪱ ꪕꪱꪉ ꪪꪽ ꪬꪫꪱ, ꪄꪴ ꪒꪱꪉ ꪶꪜꪉ ꪻꪊ ꪔꪉꪲ ꪙꪲ ꫃ꪭ ꪣꪲ ꪩꪺꪉ ꪜꪴꪙ ꪼꪫ ꪋꪳ ꪢꪽ, ꫃ꪜꪉ ꪼꪄ ꪹꪉꪙ ꪩꪱꪉ ꪪꪽ ꪬꪫꪱ ꪤꪉꪸ ꪙꪲ.

          ꪀꪚꪾ ꪩꪱꪉ ꪣꪮꪙ ꪄꪮꪉ ꪋꪴ ꪹꪋ ꫄ꪤꪙ ꪹꪣꪉ ꪀꪙꪲ ꪤꪴ ꪘꪉꪰ ꪙꪲ ꪹꪮꪱ ꪓꪙꪸ ꪚꪙꪸ ꪢꪱ ꪼꪄ ꪹꪏ ꪻꪢ ,ꪊꪴ ꪕꪀꪲ ꪀꪺꪀ ꪶꪭꪥ ꪫꪱ ꪭꪀꪸ, ꪫꪀꪸ ꪘꪱꪣ ꪁꪷ ꪣꪲ ꪚꪮꪙ ꪚꪙꪲ ꪢꪱꪥ ꪓꪙꪸ ꪚꪙꪲ ꪠꪴ ꪒꪫꪸ ꪭꪳ ꪹꪚꪱ ꪼꪫ ꪓꪙꪸ ꪚꪙꪸ ꪁꪒꪰ ꪁꪴꪉ ꫄ꪬꪉ ꪭꪲ ꪼꪒ.

          ꪣꪱ ꪕꪱꪉ ꪁꪫꪱꪣ ꪎꪷ ꪼꪫ ꪄꪮꪉ ꪠꪴ ꪮꪺꪙ ꪝꪱ ꪔꪉꪲ ꪓꪙꪸ ꪚꪙꪸ, ꪊꪴ ꪕꪀꪲ ꪀꪺꪀ ꪶꪭꪤ ꪕꪒꪰ ꪜꪴꪙ ꪻꪬ ꪝꪉꪳ ꪶꪛ ꪵꪈꪉ ꪣꪲ ꪘꪺꪉ ꪝꪱꪘ ,ꪝꪉꪳ ꪮꪫꪲ ꪚꪱꪙ ꪄꪮꪉ ꪀꪺꪀ ꪶꪭꪥ ꪣꪲ ꪵꪊꪉ ꪐꪣꪸ ꪈꪫꪙꪸ ꪀꪫꪲ, ꪕꪮꪚ ꪁꪫꪱꪣ ꪖꪱꪣ ꪻꪬ ꪵꪣꪙ ꪊꪴ ꪹꪊꪉ, ꪩꪺꪉ ꪕꪱꪉ, ꪊꪉꪲ ꪵꪎꪀ. ꫄ꪝꪉ ꪻꪎ ꪫꪀꪸ ꫄ꪊꪚ ꪙꪣꪾ ꪁꪫꪱꪣ ꪄꪮꪒ ꪙꪱꪉ ꪄꪮꪉ ꪝꪉꪳ ꪶꪒꪉ ꪂꪲ ꪮꪺꪙ ꪝꪱ ꪒꪱꪉ ꪵꪀꪉ ꪹꪭꪙ ꪹꪘꪀ ꫃ꪥꪒ ꪫꪀꪸ, ꪮꪺꪙ ꪝꪱ ꪘꪉꪰ ꪔꪉꪲ ꪓꪙꪸ ꪚꪙꪸ.

          ꪋꪴ ꫃ꪥꪒ ꪫꪀꪸ ꪀꪚꪾ ꪠꪴ ꪮꪺꪙ ꪝꪱ ꪔꪉꪲ ꪓꪙꪸ ꪚꪙꪸ ꪁꪷ ꪶꪒꪚ ꪣꪺꪙ ꪋꪴ ꫄ꪥꪒ ꪫꪀꪸ ꪄꪮꪉ ꪊꪴ ꪕꪀꪲ ꪀꪺꪀ ꪶꪭꪥ ꪵꪀꪉ ꪒꪫꪱꪙ ꪶꪀꪉ ꪔꪱꪀ ꪘꪉꪰ 2 ꪔꪉꪲ ꪒꪙꪲ ꪝꪴ ꪵꪚꪉ ꪚꪀꪰ ꪯꪽ ꪨꪷ ꪨꪱꪥ ꪹꪊꪱ ꪵꪀꪉ ꪓꪙꪸ ꪚꪙꪸ.

                                                                                                  ꪬꪫꪙꪸ ꪥꪀꪲ