Vạy thông tuyến bảo hiểm y tế cấp tỉnh sam khảu puồng kìn đơi dú

          Pì cài cài ma, 11 păn cơ sở y tế tuyến huyện, xã cọ đảy thông tuyến( Tư va chơ pày khám BHYT báu đảy àu chỉa giới thiệu chiên hươn dà), tạ khù ngai đì hẳư côn dần cuồng vịa khám dàu dà bệnh. Lằng chơ thông tuyến, số chu khám dàu dà bệnh nẳng trạm y tế xã dón lông lài. Tênh cá mương mi 38 tỉnh dón té 10 họt 30% số vặt khám dàu dà bệnh nẳng trạm y tế xã. Khù nị dệt ngơn khám dàu dà bệnh lưn khửn pưa số vặt khám dàu dà bệnh nẳng tuyến tênh lài khửn hák va ngơn phí nẳng tuyến xã cọp báu dón lông. Pưa đảy thông tuyến xương nặn lài côn dần é pày khám dàu dà bệnh nẳng tuyến tênh lài xưa.

          Toi dan họt pì 2021, chí chấp năm thông tuyến tỉnh nẳng 572 cơ sở y tế cuồng cá mương. Hák va, bảo hiểm xã hội Việt Nàm danh đù chí cướt sình oak vịa mi lài côn ma non dàu dà cánh ngơn phí y tế cọ chí lài khửn.

          Thông tuyến khám dà bệnh lỏ chủ trương chọp men. Hák va vịa chấp năm thông tuyến cọ nhăng mi lài khù klhắt klhỏng dạk cha. Khù nị báu chự hịa dệt dạk cha họt chính sách khòng hươn nước ặn lỏ cọm pày xú y tế cơ sở, lẹo nhăng chí dệt lưn khửn ngơn khám dà bệnh.

          Toi lung Thân Đức Lại-giám đốc bản hiểm xã hội tỉnh bắc Giang, vạy kẻ cặm pưng khù khắt khỏng dạk cha nị, xòng ma viện ník xìa vịa mi lài côn mưa khám dà bệnh cá tuyến tênh , cơ sở y tế chu địa phường  cận mi luông pùn púc cuân côn chấp dàu dà nẳng tuyến huyện, xã. Pọm cắp nả vịa nặn, cơ quàn bảo hiểm xã hội cánh sở y tế pưng tỉnh vạu nừa mi luông quản lý đì chơ mi luông piến mắư chính sách vạy báu đảy kẻ cặm lằng chơ chính sách sam khảu puồng kìn đơi dú.

          Thông tuyến khám dà bệnh bảo hiểm y tế chăm va nhăng lài khù pọ dạk cha, hák va ăn nị lỏ chủ trương chọp men pưa quyên lợi khòng côn dần. Pưa xương nặn, chính phủ cằm quyết thông tuyến tỉnh cón dan 2021 xương pùn ók cuòng luật BHYT pì 2014./.

                                                                TTT-Huyền dịch

                          ꪶꪖꪉ ꪔꪫꪙꪸ ꪚꪱꪫ ꪬꪣꪸ ꪮꪲ ꫃ꪔ ꫄ꪀꪚ ꪔꪉꪲ ꪏꪱꪣ ꪹꪄꪱ ꪜꪺꪉ ꪀꪙꪲ ꫄ꪓꪥ ꪤꪴ

          ꪜꪲ ꪀꪱꪥ ꪣꪱ 11 ꪝꪽ ꫄ꪀ ꫄ꪎ ꪔꪫꪙꪸ ꪭꪫꪙꪸ ,ꪎꪱ ꪁꪷ ꪼꪒ ꪶꪖꪉ ꪔꪫꪙꪸ (ꪕꪳ ꪫꪱ ꫄ꪋ ꪼꪜ ꪄꪱꪣ ꪚꪱꪫ ꪬꪣꪸ ꪮꪲ ꫃ꪔ ꪹꪚꪱ ꪼꪒ ꪹꪮꪱ ꪊꪸ ꫄ꪤꪥ ꪖꪫꪸ ꪋꪙꪸ ꪹꪭꪙ ꪤꪱ) ꪕꪱ ꪄꪴ ꪉꪱꪥ ꪒꪲ ꪻꪬ ꫛ ꫄ꪤꪙ ꪀꪺꪉ ꪫꪀꪸ ꪄꪱꪣ ꪤꪱ ꫃ꪛꪉ. ꪨꪉꪰ ꫄ꪋ ꪶꪖꪉ ꪔꪫꪙꪸ ꪶꪎ ꫛ ꪄꪱꪣ ꪤꪱ ꫃ꪛꪉ ꪘꪉꪰ ꪋꪱꪣ ꪮꪲ ꫃ꪔ ꪎꪱ ꪤꪮꪙ ꪶꪩꪉ ꪨꪱꪥ. ꫃ꪕꪉ ꪀꪱ ꪹꪣꪉ ꪣꪲ 38 ꪔꪉꪲ ꪤꪮꪙ ꪵꪔ 10 ꪭꪮꪒ 30% ꪶꪎ ꪫꪒꪰ ꪄꪱꪣ ꪤꪱ ꫃ꪛꪉ ꪘꪉꪰ ꪋꪱꪣ ꪮꪲ ꫃ꪔ ꪎꪱ. ꪄꪴ ꪙꪲ ꫃ꪥꪒ ꫄ꪉꪙ ꪄꪱꪣ ꪤꪱ ꫃ꪛꪉ ꪩꪙꪳ ꪄꪙꪳ ꪹꪝ ꪶꪎ ꪫꪒꪰ ꪄꪱꪣ ꪤꪱ ꪘꪉꪰ ꪔꪫꪙꪸ ꫃ꪕꪉ ꪨꪱꪥ ꪄꪙꪳ ꪭꪱꪀ ꪫꪱ ꫄ꪉꪙ ꪄꪱꪣ ꪤꪱ ꪘꪉꪰ ꪔꪫꪙꪸ ꪎꪱ ꪁꪷ ꪹꪚꪱ ꪒꪮꪙ ꪶꪩꪉ. ꪹꪝ ꪼꪒ ꪶꪖꪉ ꪔꪫꪙꪸ ꪨꪱꪥ ꫛ ꫄ꪤꪙ ꪵꪮ ꪼꪜ ꪄꪱꪣ ꪤꪱ ꫃ꪛꪉ ꪘꪉꪰ ꪔꪫꪙꪸ ꫃ꪕꪉ ꪨꪱꪥ ꪹꪏ.

          ꪕꪮꪥ ꪥꪱꪙ ꪭꪮꪒ ꪜꪲ 2021 ꪋꪲ ꫄ꪊꪚ ꪙꪣꪾ ꪶꪖꪉ ꪔꪫꪙꪸ ꪔꪉꪲ ꪘꪉꪰ 572 ꫄ꪀ ꫄ꪎ ꪮꪲ ꫃ꪔ ꪀꪺꪉ ꪀꪱ ꪹꪣꪉ. ꪭꪱꪀ ꪫꪱ ꪚꪱꪫ ꪬꪣꪸ ꪎꪱ ꪶꪭꪥ ꪫꪒꪲ ꪘꪱꪣ ꪵꪥꪉ ꪒꪴ ꪋꪲ ꪵꪀꪒ ꪎꪉꪲ ꪮꪮꪀ ꪫꪀꪸ ꪣꪲ ꪨꪱꪥ ꫛ ꪣꪱ ꪙꪮꪙ ꪹꪤꪱ ꪤꪱ ꪵꪀꪉ ꫄ꪉꪙ ꪹꪤꪱ ꪤꪱ ꪋꪲ ꪨꪱꪥ ꪄꪙꪳ.

          ꪶꪖꪉ ꪔꪫꪙꪸ ꪄꪱꪣ ꪤꪱ ꫃ꪛꪉ ꪨꪷ ꪊꪴ ꪹꪊꪉ ꪋꪮꪚ ꪵꪣꪙ. ꪭꪱꪀ ꪫꪱ ꪫꪀꪸ ꫄ꪊꪚ ꪙꪣꪾ ꪶꪖꪉ ꪔꪫꪙꪸ ꪁꪷ ꪑꪉꪰ ꪣꪲ ꪨꪱꪥ ꪄꪴ ꪄꪒꪰ ꪄꪮꪉ. ꪄꪴ ꪙꪲ ꪁꪷ ꫃ꪥꪒ ꪥꪱꪀ ꪋꪱ ꪭꪮꪒ ꪊꪉꪲ ꪵꪎꪉ ꪹꪭꪙ ꪯꪽ ꪨꪷ ꪁꪮꪣ ꪼꪜ ꪎꪴ ꪮꪲ ꫃ꪔ ꫄ꪀ ꫄ꪎ ꪵꪩꪫ ꪑꪉꪰ ꫃ꪥꪒ ꪩꪙꪳ ꪄꪙꪳ ꫃ꪉꪙ ꪄꪱꪣ ꪤꪱ ꫃ꪛꪉ.

          ꪕꪮꪥ ꪩꪴꪉ ꫄ꪖꪙ ꪒꪀꪳ ꪩꪱꪥ ꪤꪱꪣ ꪶꪒꪀ ꪚꪱꪫ ꪬꪣꪸ ꪎꪱ ꪶꪭꪥ ꪔꪉꪲ ꪚꪱꪀ ꪤꪱꪉ ꪼꪫ ꪵꪀ ꪼꪄ ꪝꪉꪳ ꪄꪴ ꪄꪒꪰ ꪄꪮꪉ ꪙꪲ, ꪎꪮꪉ ꪣꪱ ꪼꪫ ꫃ꪫꪙ ꪙꪀꪲ ꪎꪸ ꪫꪀꪸ ꪣꪲ ꪨꪱꪥ ꫛ ꪹꪣ ꪀꪱꪣ ꪤꪱ ꫃ꪛꪉ ꪘꪉꪰ ꪔꪫꪙꪸ ꫃ꪕꪉ , ꫄ꪀ ꫄ꪎ ꪮꪲ ꫃ꪔ ꪋꪴ ꪒꪸ ꪹꪠꪉ ꫄ꪁꪙ ꪢꪲ ꪩꪺꪉ ꪜꪴꪙ ꪜꪴꪀ ꪋꪺꪙ ꫛ ꫃ꪊꪚ ꪹꪤꪱ ꪤꪱ ꪘꪉꪰ ꪔꪫꪙꪸ ꪭꪫꪙꪸ ꪎꪱ. ꪝꪮꪣ ꪀꪚꪾ ꪘꪱ ꪫꪀꪸ ꪙꪽ ꫄ꪀ ꪀꪫꪱꪙ ꪚꪱꪫ ꪬꪣꪸ ꪎꪱ ꪶꪭꪥ ꪵꪀꪉ ꫄ꪎ ꪮꪲ ꫃ꪔ ꪝꪉꪳ ꪔꪉꪲ ꪣꪲ ꪩꪺꪉ ꪀꪋꪱꪙ ꪨꪲ ꪒꪲ ꫄ꪋ ꪣꪲ ꪩꪺꪉ ꪜꪙꪸ ꪻꪢ ꪊꪉꪲ ꪵꪎꪀ.

          ꪶꪖꪈ ꪔꪫꪙꪸ ꪄꪱꪣ ꪤꪱ ꫃ꪛꪉ ꪚꪱꪫ ꪬꪣꪸ ꪮꪲ ꫃ꪔ ꪋꪣꪾ ꪫꪱ ꪐꪉꪰ ꪣꪲ ꪨꪱꪥ ꪄꪴ ꪄꪒꪰ ꪄꪮꪉ , ꪬꪱꪀ ꪫꪱ ꪯꪽ ꪙꪲ ꪨꪷ ꪊꪴ ꪹꪊꪉ ꪋꪮꪚ ꪵꪣꪙ ꪹꪝ ꪁꪫꪙꪸ ꫄ꪨꪥ ꪄꪮꪉ ꫛ ꫄ꪤꪙ. ꪹꪜ ꪹꪏꪉ ꪙꪽ ꪊꪉꪲ ꪠꪴ ꪀꪣꪾ ꪀꪫꪒꪸ ꪶꪖꪉ ꪔꪫꪙꪸ ꪔꪉꪲ ꪀꪮꪙ ꪥꪱꪘ 2021 ꪹꪏꪉ ꪜꪴꪙ ꪮꪮꪀ ꪀꪺꪉ ꪩꪺꪒ ꪚꪱꪫ ꪬꪣꪸ ꪎꪱ ꪶꪭꪥ ꪜꪲ 2014.

                                                                                   ꪹꪩꪉ ꪬꪫꪙꪸ ꪥꪀꪲ