꫄ꪎꪙ ꪨꪱ ꪼꪜ ꪘꪱ ꪋꪲ ꫃ꪤꪒ ꪭꪉꪰ ꪵꪔ ꪀꪰ ꪢꪱꪀ ꪩꪫ ꪲꪹꪋ

        ꪹꪣ ꪭꪮꪒ ꪎꪱ ꪶꪠꪉ ꪨꪱꪥ, ꪭꪫꪙꪸ ꪗꪺꪙ ꪹꪊꪱ ꪥꪱꪘ ꪙꪲ, ꪁꪪꪱꪣ ꪶꪕ ꫄ꪩꪉ ꪼꪒ ꪝꪲ ꪙꪮꪉ ꪝꪰ ꪼꪭ ꪵꪣ ꪙꪱ ꪘꪉꪰ ꪘꪲ ꪶꪕ ꪭꪮꪒ ꪨꪰ ꪩꪾ ꪒꪴ ꪀꪰ ꪢꪱꪀ ꪩꪫꪲ ꪹꪋ. ꪼꪅ ꪀꪱ ꪎꪱ ꪣꪲ 19 ꪋꪍ ꪹꪭꪙ ꪶꪋꪣ ꪭꪚꪾ ꪹꪄꪱ ꫄ꪭꪚ ꪔꪱꪀ ꪎꪱ ꪜꪀꪴ ꪢꪱꪀ ꪩꪫꪲ ꪹꪋ ꪀꪚꪾ ꪔꪱ ꪒꪙꪸ ꪜꪀꪴ ꪋꪲ ꪮꪱꪫ ꪭꪮꪒ 20 ꪵꪬꪀ ꪕꪱ. ꪀꪰ ꪢꪱꪀ ꪩꪫꪲ ꪹꪼꪋꪒ ꪶꪀꪉ ꪕꪲ ꪶꪀ ꫄ꪠꪙ ꪙꪱ ꪠꪒꪴ ꪼꪔ ꪚꪀꪰ ꪤꪮꪣ ꫄ꪉꪙ ꪻꪎ ꪵꪔ ꪹꪋ ꪡꪽ, ꪀꪲ ꪗꪺꪒ ꪜꪀꪴ, ꪩꪾ ꪒꪴ ꪭꪮꪒ ꪄꪱꪥ ꪹꪋꪉ ꪭꪱꪉ ꫃ꪥꪒ ꪮꪮꪀ. ꪋꪾ ꪫꪱ ꪨꪰ ꪔꪱꪉ ꪀꪰ ꪻꪢ ꪬꪉꪲ ꪹꪮꪱ ꪣꪱ ꪜꪀꪴ ꪘꪉꪰ ꪓꪸ ꪹꪠꪉ ꪙꪲ, ꪬꪱꪀ ꪫꪱ ꪋꪺ ꪹꪭꪙ ꪹꪮꪥ ꪭꪫꪱꪉ ꪖꪲ ꪎꪣꪸ ꪤꪴ ꪚꪱꪙ ꪶꪣ ꪶꪀꪉ ꪁꪰ ꪤꪮꪣ ꪮꪮꪀ ꪤꪱꪫ 30 ꪋꪫꪥꪸ ꪢꪽ ꪼꪫ ꪎꪱꪉ ꪶꪎꪣ 5 ꪝꪽ ꪹꪖꪀ ꪶꪣꪙ ꪒꪙꪲ ꪼꪭ ꪄꪮꪉ ꪹꪊꪱ ꪼꪫ ꪜꪀꪴ ꪢꪱꪀ ꪩꪫꪲ ꪹꪋ.

          ꪼꪅ ꪙꪲ ꪭꪫꪙꪸ ꪗꪺꪙ ꪹꪊꪱ ꪁꪰ ꫄ꪊꪚ ꪙꪾ ꪼꪄ ꪀꪫꪱꪉ ꪔꪱ ꪒꪙꪲ ꪜꪀꪴ ꪢꪱꪀ ꪩꪫꪲ ꪹꪋ ꪄꪙꪳ 50 ꪵꪬꪀ ꪕꪱ; ꪔꪱꪉ ꪀꪰ ꪙꪲ ꪁꪽ ꪶꪜꪉ ꪋꪽ ꪄꪙꪳ ꪫꪽ ꪵꪀꪉ ꪔꪉꪰ ꪶꪀꪀ ꫃ꪜꪙ ꪢꪱꪀ ꪼꪒ ꪜꪒꪲ ꪄꪱꪥꪌ ꪀꪺꪉ ꪤꪱꪛ ꫄ꪊꪚ ꪙꪾ , ꪡꪮꪉ ꪶꪘꪉ ꪉꪚꪸ ꪁꪷ ꪁꪱꪒ ꪁꪙꪸ ꪀꪚꪾ ꪝꪉꪳ ꪡꪮꪉ ꪛꪱꪙ ꪊꪫꪙꪸ ꪶꪣꪙ ꪋꪙꪸ ꪜꪱꪫ ꪭꪮꪒ ꪝꪉꪳ ꪋꪺ ꪹꪭꪙ ꫄ꪤꪙ, ꪎꪮꪉ ꪣꪱꪁꪱꪒ ꪁꪙꪸ ꪀꪚꪾ ꪶꪀꪉ ꪕꪲ ꪙꪱ ꪠꪒꪴ ꪼꪔ ꪚꪀꪰ ꪊꪲ ꪚꪮꪀ ꪝꪲ ꪙꪮꪉ ꪀꪲ ꪗꪺꪒ ꪜꪀꪴ, ꪩꪾ ꪒꪴ ꪀꪰ ꪢꪱꪀ ꪩꪫꪲ ꪹꪋ ꪵꪀꪉ ꪊꪱꪫ ꪵꪭꪙ ꪁꪱꪒ ꪁꪙꪸ ꫄ꪭꪚ ꪶꪓꪉ ꪀꪚꪾ ꪝꪉꪳ ꪋꪺ ꪹꪭꪙ ꫄ꪤꪙ ꪣꪱ ꪕꪱꪉ ꪏꪳ ꪹꪋꪉ ꪭꪱꪉ ꫃ꪥꪒ ꪮꪮꪀ , ꪁꪱ ꪁꪮꪙ ꪏꪳ ꪄꪱꪥ ꪋꪲ ꪎꪮꪣ ꪵꪜꪉ ꪕꪮꪥ ꪁꪱ ꪁꪮꪙ ꪘꪉꪰ ꫄ꪋ ꪩꪱꪒ; ꪀꪺꪉ ꪙꪽ ꪁꪱ ꪖꪀꪴ ꫄ꪐꪒ ꪨꪰ 4.500 ꪢꪽ ꪢꪮꪥ ꫄ꪀꪙ.

          ꪵꪔ 5 ꪵꪬꪀ ꪔꪱ ꪹꪣ ꪵꪅꪫꪀ ꪜꪀꪴ ꪖꪳ ꫄ꪚꪉ ꪘꪉꪰ ꪒꪙꪸ ꪶꪣꪀ ꪹꪊꪱ, ꪭꪮꪒ ꪼꪅ ꪀꪱ ꪔꪉꪲ ꫄ꪎꪙ ꪨꪱ ꪁꪽ ꪣꪲ ꪋꪲ ꪮꪱꪫ ꪭꪮꪒ 700 ꪵꪬꪀ ꪕꪱ ꪜꪀꪴ ꪣꪱ ꪩꪫꪲ ꪹꪋ ꪘꪉꪰ ꪝꪉꪳ ꪭꪫꪙꪸ ꪶꪣꪀ ꪹꪊꪱ, ꫄ꪫꪙ ꪶꪬ ꪖꪺꪙ ꪹꪊꪱ ꪢꪱꪥ ꫄ꪎꪙ..ꪼꪅ ꪙꪲ ꪁꪰ ꪣꪲ ꪭꪱꪉ ꪬꪮꪥ ꪋꪺ ꪹꪭꪙ ꫄ꪤꪙ ꪒꪉꪰ ꪀꪲ ꪜꪀꪴ ꪢꪱꪀ ꪩꪫꪲ ꪹꪋ ꪀꪚꪾ ꪧꪋ ꪄꪮꪉ ꪶꪁꪉ ꪕꪲ ꪶꪀ ꫄ꪠꪙ ꪙꪱ ꪠꪒꪴ ꪼꪔ ꪚꪀꪰ.

          ꪼꪫ ꪼꪄ ꪀꪫꪱꪉ ꪶꪠꪉ ꪋꪉꪳ ꪜꪀꪴ ꪝꪉꪳ ꪔꪱꪉ ꪀꪰ ꪜꪀꪴ ꪶꪚꪉ ꪼꪎ ꫄ꪬꪉ ꪭꪲ, ꪝꪽ ꫄ꪀꪚ ꪻꪬ ꪹꪭꪙ ꪼꪢ ꫃ꪊ ꪚꪙꪸ ꪢꪱꪀ ꪩꪫꪲ ꪹꪋ ꫄ꪋ ꪹꪭꪙ ꪼꪢ ꪙꪲ ꪋꪲ ꪹꪄꪱ ꫃ꪤꪒ ꪫꪀꪸ ꪀꪺꪉ ꪬꪺ ꪜꪲ 2018, ꪔꪉꪲ ꫄ꪎꪙ ꪨꪱ ꪁꪰ ꪔꪣꪳ ꪵꪕꪙ ꪹꪮꪱ ꪹꪄꪱ ꪕꪒꪰ ꪜꪙꪴ, ꪊꪮꪉ ꪵꪭꪉ ꪭꪮꪒ ꪜꪲ 2021 ꪀꪱ ꪔꪉꪲ ꪁꪰ ꪣꪲ 5 ꪝꪽ ꪵꪬꪀ ꪕꪱ ꪒꪙꪲ ꪜꪀꪴ ꪢꪱꪀ ꪩꪫꪲ ꪹꪋ. ꪶꪭꪥ ꪶꪓꪉ ꫄ꪤꪙ ꪹꪣꪉ ꪔꪉꪲ ꫄ꪎꪙ ꪨꪱ ꪁꪰ ꪜꪙꪴ ꪮꪮꪀ ꪉꪲ ꪀꪫꪒꪸ ꪶꪎ 57 ꪢꪱ ꪔꪱꪉ ꪊꪉꪲ ꪵꪎꪀ ꪋꪮꪥ ꪹꪥ ꪢꪱ ꪼꪄ ꪝꪉꪳ ꪔꪱꪉ ꪁꪰ ꪜꪀꪴ ꪶꪚꪉ, ꪶꪔ ꪵꪔꪉ ꪩꪉꪸ, ꪶꪔ ꪜꪱ ꪶꪔ ꪀꪉꪴ ꪘꪉꪰ  ꪔꪉꪲ ꫄ꪎꪙ ꪨꪱ, ꪤꪱꪘ ꪵꪔ ꪜꪲ 2017 – 2020, ꪀꪺꪉ ꪙꪽ ꪣꪲ ꪀꪰ ꪢꪱꪀ ꪩꪫꪲ ꪹꪋ. ꪝꪉꪳ ꪊꪉꪲ ꪵꪎꪀ ꪑꪮꪉ ꪑꪰ ꪙꪲ ꪄꪮꪉ ꪔꪉꪲ ꪁꪰ ꪒꪱꪉ ꪕꪱꪀ ꪄꪴ ꪉꪱꪥ ꪒꪲ ꪻꪬ ꪝꪉꪳ ꪵꪥꪫꪉ ꪉꪚꪸ, ꫄ꪭꪚ ꪔꪱꪀ ꪎꪱ, ꪩꪙꪸ ꪭꪚꪸ ꫄ꪭꪚ ꪔꪱꪀ ꪎꪱ ꪒꪉꪰ ꪀꪲ ꪶꪋꪣ ꪭꪚꪾ ꪢꪱ ꪼꪄ ꪫꪀꪸ ꫃ꪤꪒ ꪹꪥꪙ ꪁꪱ ꪄꪱꪥ ꫃ꪊ ꪚꪙꪸ ꪹꪋꪉ ꪼꪭ ꪄꪮꪉ ꪙꪱ ꪹꪫꪱ ꪊꪉꪴ ꪵꪀꪉ ꪢꪱꪀ ꪩꪫꪲ ꪹꪋ ꪹꪫꪱ ꪤꪉꪸ.

          ꪨꪱ ꪹꪚꪙ 11 ꪋꪮꪣ ꪀꪱꪥ ꪣꪱ, 2 ꫄ꪔꪙ ꪢꪱꪀ ꪩꪫꪲ ꪹꪋ ꪶꪀꪀ ꪵꪅꪫꪀ ꪄꪮꪉ ꫄ꪎꪙ ꪨꪱ ꪁꪽ ꪼꪒ ꪄꪱꪥ ꪼꪜ ꫄ꪋ ꪨꪱꪒ ꪹꪣꪉ ꪠꪱꪚ ꪀꪱꪥ ꪕꪱꪉ ꪵꪎ ꪚꪙꪲ. ꪯꪽ ꪅꪀꪰ ꪅꪰ ꪨꪽ ꪫꪀꪸ ꪚꪙꪲ ꪢꪱꪥ ꪀꪺꪉ ꪫꪀꪸ ꪎꪴ ꪶꪀꪉ ꫃ꪻꪉꪎ ꪫꪀꪸ ꫃ꪥꪒ ꪹꪥꪙ ꪄꪮꪉ ꪵꪈꪉ ꪶꪘꪉ ꪉꪚꪸ ꫄ꪎꪙ ꪨꪱ, ꪁꪰ ꪵꪣꪙ ꪤꪱꪙ ꪼꪫ ꪋꪙꪸ ꪜꪱꪫ, ꫄ꪤꪥ ꪗꪫꪥꪸ ꪣꪱ ꪕꪱꪉ ꪋꪳ ꪎꪉꪸ ꪝꪉꪳ ꪔꪱꪉ ꪹꪋꪉ ꪼꪭ ꪄꪮꪉ ꪙꪱ ꪄꪮꪉ ꪓꪸ ꪹꪠꪉ.

                                                                   ꪶꪭꪉ ꪫꪒꪸ - ꪵꪭꪉ ꪥꪀꪲ

Sơn La: pày nả chi dệt hăng té co mák liu chưa

          Mưa họt xã Phỏng Lái, huyện Thuận Châu dan nị, quam tô lâng đảy pi nọng po hay me na nẳng nỉ tô họt lỏ lăm đù co mák liu chưa. Khạy cá xã cọ mi 19 chua hươn chôm hặp khảu Hợp tác xã púk mák liu chưa, cắp ta đin púk chi áo họt 20 héc ta. Co mák liu chưa đảy công ty Cổ phần Na Phút Tây Bắc dom ngơn sáư té chựa phăn, kỹ thuật púk, lăm đù họt khài chương hang dệt ók. Chăm va lỏ tang co máư hính àu ma púk nẳng địa phương nị, hák va chua hươn ưởi Hoàng Thị Xiêm dú bản Mô Cổng cọ dom ók dáo 30 triệu mằn vạy sảng xôm 5 păn thứa môn đin hay khòng chảu vạy púk mák liu chưa.

          Khay nị, huyện Thuận Châu cọ chấp năm khày quảng ta đin púk mák liu chưa khửn 50 héc ta; tàng cọ nị cọ pông chăn khửn văn cánh tẳng cốc pên mák đảy pít khài. Cuông dan chấp năm, phòng Nông nghiệp cọ cạt kiên cắp pưng phọng ban chuyên môn chiên páo họt pưng chua hươn dân, xong ma cạt kiên cắp công ty cổ phần Na Phút Tây Bắc chík bók pi nọng kỹ thuật púk, lăm đù co mák liu chưa cánh chao hẹn cạt kiên hợp đông cắp pưng chua hươn dân ma tang sự chương khong dệt ók, ca con sự khài chi xỏm panh toi ca con nẳng chợ lạt; cuông nặn, ca thúk nhất lỏ mỏi cân 4.500.

          Té 5 héc ta púk mưa khọe púk thử bấng nẳng đin Mộc Châu, họt khạy, cá tỉnh Sơn La cọ mi chi áo họt 700 héc ta ta đin púk mák liu chưa nẳng pưng huyện Mộc Châu, Vân Hồ, Thuận Châu, Mai Sơn...Khay nị, cọ mi hạng họi chua hươn dân đăng ký púk mák liu chưa cắp chựa khong Công ty cổ phần Na Phút Tây Bắc.

          Vạy khày quảng  phổng chưng púk pưng tàng co púk bông đảy hâng hy, po cấp hảu hươn máy chế biến mák liu chưa chơ hươn máy nị chi khảu dệt vịa cuông hùa pi 2018, tỉnh Sơn La cọ tứm ten, àu khảu tặt pun, chóng hanh họt pi 2021 cá tỉnh cọ mi 5 păn héc ta ta đin púk mák liu chưa. Hội đông dân mương tỉnh Sơn La cọ pun ók Nghị quyết số 57 ma tang chính sách choi dừa  mả khày pưng tàng co púk bồng, tô tảnh liệng, tô pà tô củng nẳng tỉnh Sơn La, dan té pi 2017- 2020, cuông nặn mi co mák liu chưa. Pưng chính sách nhọng nho nị khong tỉnh cọ đang tạk khu ngai đì hảu pưng doanh nghiệp, Hợp tác xã, liên hiệp Hợp tác xã đăng ký chôm hặp mả khày vịa dệt dượn, khài, chế biến chương hay khong na vạu chung cánh mák liu chưa vạu riêng.

          Lả bươn 11 chọm cài ma, 2 tấn mák liu chưa cốc khoẹ khòng Sơn La cọ đảy khài pày chợ lạt mương Pháp cài tang xe bìn. Ặn khặc khọ lỏ vịa biên mài cuông vịa xủ công nghệ sáư vịa dệt dượn khong ngành nông nghiệp Sơn La, cọ men dan vạy chiên páo, giới thiệu ma tang chư xiêng pưng tang chương hay khong na khong địa phương.

                                                                   Hồng Việt - Hạnh dịch