Vàng A Lai chựa côn Mông hụ dệt hăng ngày nẳng bản khòng chảu

          Ók pì 1984, hák va Vàng A Lai, dú bản Sin Suối Hồ cọ đảy lài côn hụ họt pưa xắc mắn dệt dượn, chang ngắm pùn cuồng vịa mả khày kinh tế. Nẳng tà đìn xuần quảng dáo 4 păn thứak môn, ai cọ pắc pằn tẳng tánh cọk bâng tảnh liệng chọp xồm, dòm ngơn cốc tảng liệng mù nọi cánh liệng cáy pói nẳng pá. Pằn pâng pày mỏi pì ai khài 2 chu mù nhứa, dáo 4 tấn mù hời cánh dáo tấn cáy nhứa nưng, thù đảy cài 300 triệu mằn. Xịa xìa chu tàng ngơn, ai nhăng đảy mả dáo 150 triệu mằn.

          Vàng A Lai hẳư hụ: cón chơ tẳng cốc tảnh liệng, ai cọ chôm hặp lài lớp tập huấn đảy địa phường tổ chức, cọ xương khâng xáo hụ ép học cài pặp xừ, báo ma tang kỹ thuật tảnh liệng mù, liệng cáy. Mưa khoẹ ai cọ liệng 3 tồ mù me cánh kỉ xíp tồ cáy me, vạy toi ók tồ chưa, lằng nặn ai liệng khửn tứm hạng kỉ xíp tồ mù me cánh hạng họi tồ cáy sáy.

          Pọm cắp vịa tảnh liệng mù, liệng cáy, chua hươn ai cọ dòm ngơn cốc púk bók xảo chan, tàng bók cựt ma thù nhập xùng hẳư côn dần nẳng nị. Pưa chọp xồm cắp nặm đìn nẳng nị, bók xảo chan cọ mả pe văn, bók nẳng nị chăn báu pék xương nẳng bón ứn. Mỏi pì cứ họt chiềng chiên lang, chua hươn ai khài ók chơ lạt dáo 100 xỏng bók xảo chan, thù đảy cài 300 triệu mằn.

          Cắp luông dệt chang trại toi lài luông, mỏi pì chua hươn ai Vàng A Lai cựt đảy dáo 500 triệu mằn cánh cựt pền ven xanh dệt kinh tế giỏi khòng địa phương. Luông dệt khòng ai cọ cựt pền bón ma bấng le khòng lài đoàn po hay me na đảy chính quyên địa phường tổ chức. Lài chua hươn po hay me na cuồng bản cánh cuồng phổng cọ ép năm dệt toi.

          Báu chư hịa hụ dệt kinh tế giỏi lạ, ai Vàng A Lai nhăng lỏ ven xanh pộn dỏn cuồng chu há phong khòng bản, khòng xã. Cắp luông dệt kinh tế khòng chảu, ai cọ đảy chu cấp chu ngành nẳng địa phường biền mài cắp hạng 10 chỉa khèn, băng khèn cánh đảy côn dần cuồng bản cuồng xã tin chưa quí panh.

K Kiên-Huyền dịch

ꪪꪱꪉ ꪯꪱ ꪩꪱꪥ ꪹꪋ ꫛ ꪶꪣꪉ ꪭꪴ ꫃ꪤꪒ ꪭꪉꪰ ꪼꪈ ꪘꪉꪰ ꪚꪱꪙ ꪄꪮꪉ ꪹꪊꪱ

          ꪮꪮꪀ ꪜꪲ 1984 ,ꪬꪱꪀ ꪫꪱ ꪯꪱꪥ ꪪꪱꪉ ꪯꪱ ꪩꪱꪥ ꪤꪴ ꪚꪱꪙ ꪏꪙꪲ ꪎꪺꪥ ꪶꪬ ꪁꪷ ꪼꪒ ꪨꪱꪥ ꫛ ꪭꪴ ꪭꪮꪒ ꪹꪝ ꪎꪀꪰ ꪢꪽ ꫃ꪥꪒ ꪹꪥꪙ ,ꪋꪱꪉ ꪈꪣꪾ ꪜꪙꪴ ꪀꪺꪉ ꪫꪀꪸ ꪢꪱ ꪼꪄ ꪀꪉꪲ ꫃ꪔ. ꪘꪉꪰ ꪔꪱ ꪒꪙꪲ ꪎꪺꪙ ꪀꪫꪱꪉ ꪤꪱꪫ 4 ꪝꪽ ꪵꪖꪀ ꪶꪣꪙ ꪯꪱꪥ ꪁꪷ ꪜꪀꪰ ꪜꪽ ꪔꪉꪰ ꪵꪔꪉ ꪀꪮꪀ ꫄ꪚꪉ ꪵꪔꪉ ꪩꪉꪸ ꪋꪮꪚ ꪶꪎꪣ ,ꪤꪮꪣ ꫄ꪉꪙ ꪶꪀꪀ ꪵꪔꪉ ꪩꪉꪳ ꪢꪴ ꪵꪀꪉ ꪩꪉꪸ ꪼꪀ ꪜꪮꪥ ꪘꪉꪰ ꪎꪺꪙ. ꪜꪽ ꫄ꪛꪉ ꪼꪜ ꪢꪮꪥ ꪜꪲ ꪯꪱꪥ ꪄꪱꪸ 2 ꪋꪴ ꪢꪴ ꪹꪐ , ꪤꪱꪫ 4 ꫄ꪔꪙ ꪢꪴ ꫄ꪬꪥ ꪵꪀꪉ ꪤꪱꪫ ꫃ꪔꪙ ꪼꪀ ꪹꪐ ꫜ, ꪖꪴ ꪼꪒ ꪀꪱꪥ 300 ꪋꪫꪸ ꪢꪽ. ꪏꪲꪀ ꪎꪸ ꪋꪴ ꪔꪱꪉ ꫄ꪉꪙ ꪯꪱꪥ ꪑꪉꪰ ꪼꪒ ꪢꪱ ꪤꪱꪫ 150 ꪋꪫꪸ ꪢꪽ.

          ꪪꪱꪉ ꪯꪱ ꪨꪱꪥ ꪻꪬ ꪭꪴ: ꪀꪮꪙ ꫄ꪊ ꪔꪉꪰ ꪶꪀꪀ ꪵꪔꪉ ꪩꪉꪸ ,ꪯꪱꪥ ꪁꪷ ꪶꪋꪣ ꪭꪚꪾ ꪨꪱꪤ ꫄ꪨꪚ ꫄ꪕꪚ ꪬꪺꪙ ꪼꪒ ꪒꪸ ꪹꪠꪉ ꪶꪔ ꪊꪀꪳ ,ꪁꪷ ꪹꪏꪉ ꪎꪱꪫ ꪭꪴ ꪵꪮꪚ ꪭꪮꪀ ꪘꪉꪰ ꪚꪱꪫ ꪒꪱꪥ ꪢꪱ ꪔꪱꪉ ꪀꪲ ꪵꪖꪒ ꪵꪔꪉ ꪩꪉꪸ ꪢꪴ ꪩꪉꪸ ꪼꪀ. ꪹꪢ ꪵꪅꪀ ꪯꪱꪥ ꪁꪷ ꪩꪉꪸ 3 ꪶꪔ ꪢꪴ ꪵꪣ ꪵꪀꪉ ꪀꪲ ꪎꪚꪲ ꪶꪔ ꪼꪀ ꪵꪣ ,ꪨꪉꪰ ꪙꪽ ꪮꪱꪤ ꪩꪉꪸ ꪔꪣꪳ ꪄꪙꪳ ꪭꪱꪉ ꪀꪲ ꪎꪚꪲ ꪶꪔ ꪢꪴ ꪵꪣ ꪵꪀꪉ ꪭꪱꪉ ꪭꪮꪥ  ꪶꪔ ꪼꪀ ꪼꪎ.

          ꪝꪮꪣ ꪀꪚꪾ ꪫꪀꪸ ꪵꪔꪉ ꪩꪉꪸ ꪢꪴ ꪩꪉꪸ ꪼꪀ ꪋꪺ ꪹꪭꪙ ꪮꪱꪥ ꪁꪷ ꪤꪮꪣ ꫄ꪉꪙ ꪶꪀꪀ ꪜꪴꪀ ꪚꪮꪀ ꪎꪱꪫ ꪋꪱꪙ ꪔꪱꪉ ꪚꪮꪀ ꪁꪒꪳ ꪢꪱ ꪖꪴ ꫄ꪑꪚ ꪎꪴꪉ ꪻꪬ ꫛ ꫄ꪤꪙ. ꪹꪝ ꪋꪮꪣ ꪶꪎꪣ ꪘꪚꪷ ꪙꪣꪾ ꪒꪙꪲ ꪘꪉꪰ ꪘꪲ ꪚꪮꪀ ꪎꪱꪫ ꪋꪱꪙ ꪁꪷ ꪢꪱ ꪵꪝ ꪫꪽ , ꪚꪮꪀ ꪘꪉꪰ ꪘꪲ ꪋꪽ ꪹꪏ ꪚꪮꪙ ꪮꪙꪳ. ꪢꪮꪥ ꪜꪲ ꪭꪮꪒ ꪊꪉꪲ ꪋꪙꪸ ꪩꪱꪉ ,ꪶꪋ ꪹꪭꪙ ꪯꪱꪥ ꪄꪱꪥ ꪮꪮꪀ ꫄ꪋ ꪩꪱꪒ ꪤꪱꪫ 100 ꪎꪮꪉ ꪚꪮꪀ ꪎꪱꪫ ꪋꪱꪙ ,ꪖꪴ ꪼꪒ ꪤꪱꪫ 300 ꪋꪫꪸ ꪢꪽ.

          ꪀꪚꪾ ꪩꪺꪉ ꫃ꪥꪒ ꪊꪱꪉ ꪊꪱꪥ ꪕꪮꪥ ꪨꪱꪥ ꪩꪺꪉ ,ꪢꪮꪥ ꪜꪲ ꪶꪋ ꪹꪭꪙ ꪯꪱꪥ ꪩꪱꪥ ꪁꪒꪳ ꪼꪒ ꪤꪱꪫ 500 ꪋꪫꪸ ꪢꪽ ꪵꪀꪉ ꪁꪒꪴ ꫃ꪜꪙ ꪵꪫꪙ ꪵꪏꪉ ꫃ꪥꪒ ꪀꪉꪲ ꫃ꪔ ꪤꪮꪥ ꪄꪮꪉ ꪒꪸ ꪹꪠꪉ. ꪩꪺꪉ ꫃ꪥꪒ ꪄꪮꪉ ꪮꪱꪥ ꪁꪒꪴ ꫃ꪜꪙ ꪚꪮꪙ ꪣꪱ ꫄ꪛꪉ ꪵꪩ ꪄꪮꪉ ꪨꪱꪥ ꪒꪫꪱꪙ ꪝꪷꪷ ꪼꪭ ꪵꪣ ꪙꪱ ꪼꪒ ꪊꪈꪲ ꪁꪫꪙꪸ ꪒꪸ ꪹꪠꪉ ꪶꪔ ꪊꪀꪳ. ꪨꪱꪥ ꪋꪺ ꪹꪭꪙ ꪜꪷ ꪼꪭ ꪵꪣ ꪙꪱ ꪀꪺꪉ ꪚꪱꪙ ꪵꪀꪉ ꪀꪺꪉ ꪶꪠꪉ ꪁꪷ ꪵꪮꪚ ꪙꪣꪾ ꫃ꪥꪒ ꪕꪮꪥ.

          ꪹꪚꪱ ꪋꪴ ꪭꪀꪸ ꪬꪴ ꫃ꪥꪒ ꪀꪉꪲ ꫃ꪔ ꪤꪮꪥ ꪩꪱ ꪮꪱꪤ ꪪꪱꪉ ꪯꪱ ꪨꪱꪥ ꪑꪉꪰ ꪨꪷ ꪵꪫꪙ ꪵꪏꪉ ꪄꪮꪉ ꪚꪱꪙ ,ꪄꪮꪉ ꪎꪱ.ꪀꪚꪾ ꪩꪺꪉ ꫃ꪥꪒ ꪀꪉꪲ ꫃ꪔ ꪄꪮꪉ ꪹꪊꪱ ꪯꪱꪥ ꪁꪷ ꪼꪒ ꪋꪴ ꫄ꪀꪚ ꪋꪴ ꪵꪈꪉ ꪘꪉꪰ ꪒꪸ ꪹꪠꪉ ꪚꪙꪸ ꪢꪱꪥ ꪀꪚꪾ ꪭꪱꪉ 10 ꪊꪲ ꪵꪄꪙ ,ꪛꪉꪰ ꪵꪄꪙ ꪵꪀꪉ ꪼꪒ ꪝꪲ ꪙꪮꪉ ꪀꪺꪉ ꪚꪱꪙ ꪕꪙꪲ ꪹꪊ ꪀꪫꪲ ꪵꪝꪉ.

ꪬꪫꪙꪸ ꪤꪲꪀ