Khảm pộn dạk cha dệt hăng té vịa púk mák kiểng nẳng bản pi nọng chựa côn Dạo

------------------------

Cón nị 4 pì, chơ Triệu Văn Mừng àu pưng cốc mák kiểng cốc khoẹ ma púk nẳng phổng đìn bản Khe Lành nị, báu mi phằư ngắm ai Mừng chi púk đảy lang đì. Pưa báu chắc té đằư ma, côn Dạo nẳng bản nị cọ hụ to cò khảu li, măn cò. Nẳng phổng đìn nị, khù xằng cọ dạk cha, bản cặt cung, lang ngắm chằư pùn cọ báu đảy to đằư, tang pày ma dạk cha, phằư cọ va hịa ai Mừng hao dệt, dám vang ók số ngơn nhắư nưng púk tàng cò báu hê mi phằư púk sắc tưa. Cò mák kiểng cọ lựa đìn, đảy lăm đù xương làn nọi. Hák va Triệu Văn Mừng cọ tin chưa, cắp nặm đìn nẳng nị cọ pék xương pưng phổng púk mák kiểng ứn, phủ kèo nẳng Mương Thải, Mương Cời dệt đảy, chảu cọ chi dệt đảy. Luông tin chưa khòng Triệu Văn Mừng nhương mự nhương đảy tủm pua pưa chơ nặn chương trình 135 khòng huyện cọ dòm ngơn cốc sắư vịa púk mák kiểng nẳng tà đìn pu chăn hẳư cài 10 chua hươn nẳng cuồng bản cắp cài păn nưng cốc cò chựa, hôm mi mák kiểng Vinh cánh mák kiểng đường canh, cuồng nặn mi chua hươn ai. Pưa xương nặn, Triệu Văn Mừng cọ quyết định dòm ngơn cốc púk 1.400 cốc mák kiểng Vinh, mák kiểng đường canh nẳng tà đìn quảng cài héc ta nưng cón nị púk khảu li báu cự đảy lang đì:

Pưa đảy lăm đù đì, xuần mák kiểng cựt đảy toi luông pùn Việt Gáp khòng chua hươn ai Mừng khảu mua mák xúc lường xang, cò đằư cò nặn pôi to mák, danh đù pì nị chua hươn ai chi thù đảy 15 tấn mák, thù nhập 250 triệu mằn lằng chơ xịk xìa ngơn cốc xòm sắư. Báu xuấn to khài mák kiểng hẳư chợ lạt cuồng huyện, Triệu Văn Mừng nhăng khài mák kiểng cài phong điện In tơ nét họt lài địa phường cuồng mương.

Cuồng pưng mự nị, phùa mia ai Mừng cọ lâng chơ mi nả nẳng xuần mák vạy thù pít cánh lăm đù tà đìn hay mák kiểng vạy khài cuồng dan chiềng chiên lang. Dám ngắm dám dệt cánh luông sắc chọng khòng Triệu Văn Mừng cọ xồm đáng vạy hẳư thành niền cánh côn dần cuồng bản ép năm dệt toi./.

ꪹꪥꪸꪒ ꪭꪉꪰ ꪵꪔ ꪫꪀꪸ ꪜꪀꪴ ꪢꪱꪀ ꪀꪉꪸ ꪘꪉꪰ ꪚꪱꪙ ꪝꪲ ꪙꪮꪉ ꪹꪋ ꫛ ꪥꪱꪫ

------------------------

ꪀꪮꪙ ꪙꪲ 4 ꪜꪲ, ꪹꪋꪷ ꪋꪫꪸ ꪪꪽ ꪢꪥꪴ ꪹꪮꪱ ꪝꪉꪳ ꪶꪀꪀ ꪀꪷ ꪢꪱꪀ ꪀꪉꪸ ꪶꪀꪀ ꪵꪅꪫ ꪣꪱ ꪜꪀꪴ ꪘꪉꪰ ꪶꪠꪉ ꪒꪲꪙ ꪚꪱꪙ ꪵꪅ ꪵꪨꪉ ꪙꪲ , ꪹꪚꪱ ꪣꪲ ꪻꪠ ꪈꪾ ꪯꪱꪥ ꪋꪲ ꪜꪀꪴ ꪁꪒꪳ ꪼꪒ ꪩꪱꪉ ꪒꪲ . ꪹꪝ ꪹꪚꪱ ꪊꪀꪰ ꪵꪔ ꪻꪒ ꪣꪱ , ꫛ ꪥꪱꪫ ꪘꪉꪰ ꪘꪲ ꪁꪷ ꪭꪴ ꪕꪷ ꪀꪷ ꪹꪄꪱ ꪩꪲ , ꪣꪽ ꪀꪷ . ꪘꪉꪰ ꪶꪠꪉ ꪒꪙꪲ ꪙꪲ ꪄꪴ ꪎꪉꪰ ꪁꪷ ꪥꪱꪀ , ꪚꪱꪙ ꪁꪒꪰ ꪁꪉꪴ , ꪩꪱꪉ ꪈꪾ ꪻꪊ ꪜꪙꪴ ꪄꪮꪉ ꫛ ꪹꪤꪷꪙ ꪹꪚꪱ ꪼꪒ ꪕꪷ ꪻꪒ , ꪕꪱꪉ ꪼꪜ ꪣꪱ ꪥꪱꪀ ꪋꪱ ,ꪻꪠ ꪁꪷ ꪫꪱ ꪯꪱꪥ ꪢꪉꪳ ꪭꪱꪫ ꪹꪥꪸꪒ , ꪤꪱꪣ ꪫꪱꪉ ꪮꪮꪀ ꪶꪎ ꪹꪉꪷꪙ ꪻꪐ ꫜ ꪜꪴꪀ ꪔꪱꪉ ꪀꪷ ꪹꪭꪸ ꪣꪲ ꪻꪠ ꪜꪀꪴ ꪎꪀꪰ ꪹꪕ . ꪀꪷ ꪢꪱꪀ ꪀꪉꪸ ꪁꪷ ꪹꪩꪀ ꪒꪙꪲ ꪼꪒ ꪩꪾ ꪒꪴ ꪹꪏꪉ ꪨꪱꪙ ꪙꪮꪥ . ꪬꪱꪀ ꪫꪱ ꪋꪫꪸ ꪪꪽ ꪢꪥꪴ ꪁꪷ ꪕꪙꪲ ꪹꪋ , ꪀꪚꪰ ꪶꪠꪉ ꪙꪾ ꪒꪙꪲ ꪘꪉꪰ ꪘꪲ ꪁꪷ ꪵꪜꪀ ꪹꪏꪉ ꪶꪠꪉ ꪜꪀꪴ ꪢꪱꪀ ꪀꪉꪸ ꪮꪙꪳ , ꪠꪴ ꪵꪀꪫ ꪘꪉꪰ ꪹꪣꪉ ꪖꪱꪥ , ꪹꪣꪉ ꪹꪀꪷꪥ ꪹꪥꪸꪒ ꪼꪒ ꪹꪊꪱ ꪁꪷ ꪋꪲ ꪹꪥꪸꪒ ꪼꪒ. ꪩꪺꪉ ꪕꪙꪲ ꪹꪋ ꪄꪮꪉ ꪯꪱꪥ ꪋꪫꪸ ꪪꪽ ꪢꪥꪴ ꪹꪑꪉ ꪼꪒ ꪔꪣꪴ ꪝꪺ ꪹꪋꪷ ꪹꪊꪉ ꪊꪉꪲ 135 ꪄꪮꪉ ꪭꪫꪙꪸ ꪁꪷ ꪤꪮꪣ ꪹꪉꪷꪙ ꪶꪀꪀ ꪻꪎ ꪫꪀꪸ ꪜꪴꪀ ꪢꪱꪀ ꪀꪉꪸ ꪘꪉꪰ ꪒꪙꪲ ꪝꪴ ꪋꪽ ꪻꪬ 10 ꪋꪺ ꪹꪭꪙ ꪀꪺꪉ ꪚꪱꪙ , ꪀꪺꪉ ꪙꪽ ꪣꪲ ꪋꪺ ꪹꪭꪙ ꪯꪱꪥ . ꪹꪝ ꪹꪏꪉ ꪙꪽ ꪯꪱꪥ ꪢꪉꪳ ꪁꪷ ꪀꪫꪒꪸ ꪒꪉꪲ ꪜꪴꪀ 1.400 ꪶꪀꪀ ꪢꪱꪀ ꪀꪉꪸ ꪫꪉꪲ ꪵꪀꪉ ꪢꪱꪀ ꪀꪉꪸ ꪹꪒꪉ ꪵꪁꪉ ꪘꪉꪰ ꪔꪱ ꪒꪙꪲ ꪀꪫꪱꪉ ꪀꪱꪥ ꪵꪬꪀ ꪕꪱ ꫜ.

ꪹꪝ ꪼꪒ ꪩꪾ ꪒꪴ ꪒꪲ ꪎꪺꪙ ꪢꪱꪀ ꪀꪉꪸ ꪁꪒꪳ ꪼꪒ ꪕꪮꪥ ꪩꪺꪉ ꪜꪙꪴ ꪫꪒꪸ ꪇꪱꪚ ꪄꪮꪉ ꪹꪋꪱ ꪹꪭꪙ ꪯꪱꪥ ꪢꪉꪳ ꪹꪄꪱ ꪣꪺ ꪢꪱꪀ ꪎꪀꪴ ꪹꪩꪉ ꪏꪱꪉ , ꪀꪷ ꪻꪒ ꪁꪷ ꪶꪝꪥ ꪕꪮꪥ ꪢꪱꪀ , ꪵꪤꪉ ꪒꪴ ꪜꪲ ꪙꪲ ꪋꪺ ꪹꪭꪙ ꪯꪱꪥ ꪋꪲ ꪖꪴ ꪼꪒ 15 ꪹꪔꪷꪙ ꪢꪱꪀ , ꪖꪴ ꪹꪑꪷꪚ 250 ꪋꪫꪸ ꪢꪽ ꪨꪉꪰ ꪹꪋꪷ ꪏꪀꪲ ꪎꪸ ꪹꪉꪷꪙ ꪶꪀꪀ . ꪹꪚꪱ ꪎꪺꪙ ꪕꪷ ꪄꪱꪥ ꪘꪉꪰ ꪹꪋꪷ ꪩꪱꪒ ꪀꪺꪉ ꪭꪫꪙꪸ , ꪯꪱꪥ ꪢꪉꪳ ꪑꪉꪰ ꪄꪱꪥ ꪢꪱꪀ ꪀꪉꪸ ꪀꪱꪥ ꪡꪮꪉ ꪒꪙꪸ ꪭꪮꪒ ꪨꪱꪥ ꪒꪸ ꪹꪠꪉ ꪀꪺꪉ ꪹꪣꪉ.

ꪀꪺꪉ ꪝꪉꪳ ꪣꪳ ꪙꪲ ꪠꪺ ꪣꪸ ꪮꪱꪥ ꪁꪷ ꪹꪩꪷꪉ ꪣꪲ ꪘꪱ ꪘꪉꪰ ꪎꪺꪙ ꪼꪫ ꪜꪒꪲ ꪢꪱꪀ ꪵꪀꪈ ꪩꪾ ꪒꪴ ꪎꪺꪙ ꪢꪱꪀ ꪼꪫ ꪄꪱꪥ ꪀꪺꪉ ꪥꪱꪙ ꪊꪉꪸ ꪋꪙꪸ ꪩꪱꪉ. ꪤꪱꪣ ꪈꪾ ꪤꪱꪣ ꪹꪥꪸꪒ ꪵꪀꪉ ꪩꪺꪉ ꪎꪀꪰ ꪋꪮꪉ ꪄꪮꪉ ꪋꪫꪸ ꪪꪽ ꪢꪉꪳ ꪁꪷ ꪶꪎꪣ ꪒꪱꪉ ꪼꪫ ꪻꪬ ꪵꪖꪉ ꪘꪙꪸ ꪵꪀꪉ ꫛ ꪹꪤꪷꪙ ꪀꪺꪉ ꪚꪱꪙ ꪵꪮꪚ ꪙꪾ ꪹꪥꪸꪒ ꪕꪮꪥ.

                                                ꪵꪖꪉ ꪥꪀꪲ