Tơbleăng a rôh pơxiâm hôp, pôa Lưu Văn Trung, Kăn hnê ngăn Hô̆i đong Kuăn pơlê kong pơlê Lâm Đồng, tối, tơkâ luâ hên xơpá, pơloăng mơnúa hơnăm 2025 cheăng kâ kong pơlê Lâm Đồng pơtối rak a kơlo tâk hên ƀă châ 16/19 tơdroăng pơkâ ki châ ƀă luâ tơdroăng pơkâ; tâi tâng kơxô̆ liăn xo nâp ăm liăn ngân Tơnêi têa tung kong pơlê riân châ lối 31.200 rơtal liăn, tâk châ 11% tiô pơkâ dêi kong pơlê pơcháu ƀă tâk 17% tâng vâ pơchông ƀă pơkâ Xiâm tơnêi têa pơcháu pêi chiâk pơtối mơhno hnoăng cheăng ki kal cho trăng ki xiâm kum mơnhông cheăng kâ dêi kong pơlê ƀă lối 107.000ha tơnêi pêi chêak deăng xúa kơmăi ki dâi lĕm ƀă vâ chê 150.000ha tơnêi pê kâ tơniăn; mâu kơvâ cheăng ‘na on tơhrik ‘mâi pro, hngêi kơmăi bauxite nhôm alumin pơtối pro xiâm ki kal tung tơdroăng pro tâk tơdjuôm dêi kong pơlê...

A rôh hôp má 7, Hô̆i đong Kuăn pơlê dêi kong pơlê Lâm Đồng hneăng 10 tơkŭm tơpui tơno, pơkâ ƀă 32 hlá mơ-éa chêh tơbleăng ƀă 21 tơdroăng hbrâ chêh pơkâ, tung mê ai hên pơkâ vâ pêi, ki pêi ton hơnăm.

-A bêng Pleiku, Hneăng hôp má 5 Hô̆i đong kong pơlê Gia Lai hneăng má XII, kơ-êng ‘na tơdroăng hbrâ ví têa lân lu, pôu râng hnoăng pơkuâ, tơdroăng troăng mơ’no têa lân ƀă mâu troăng tơniăn ton xŏn tung pơla kong prâi pro ôh tá tơniăn rế hía rế hên hiăng mơhnhôk tơdroăng tơmâng dêi kuăn pơlê.

Tiâ rơkong kơ-êng, pôa Cao Thanh Thương – Kăn pơkuâ Khu pơkuâ ‘na pêi chiâk deăng ƀă Kong prâi Gia Lai – mơnhên ôh tá ai ôh tơdroăng mơ’no têa lân lu a têa kroăng Hà Thanh. Kơpong kố ôh tá ai rơchôa hdoăng têa; péa long têa kân a peăng mâ hâi Lo dêi kong pơlê cho Núi Một ƀă Định Bình tung roh têa lân lu pơla kố nah pơrá hdoăng pêng têa ƀă tơdroăng mơ’no têa plế long têa bu tơdjâk troh têa kroăng Côn.

Pôa Cao Thanh Thương xuân tối tơdroăng ki ôh tá tơniăn tung mơ’no têa lân lu môi tiah tơdroăng mơjiâng pro tơmeăm hdi hâng lông têa kroăng, pêt loăng keo kơpong mơ’no têa lân lu pro kơdroh troăng têa hiu; môi kơpong tíu kâng têa Hà Thành hiăng tơhnâp chât met xua têa hên ƀă pro xôi hâng lông. ‘Na mơnhên troăng prôk ton xŏn, mâu cheăm bêng thế séa ngăn troăng xĕn kuăn pơlê tiô rêm râ kong prâi pro.