Tiô tối tơbleăng a rôh Hôp, hơnăm 2025, tơdroăng cheăng mâu lêng - lêng kong pơlê châ rêm râ, kơvâ cheăng ƀă mâu lêng tơplâ tung kong pơlê tơbleăng pêi tâi tâng; kơpong hbrâ rơnáu pơtối châ ‘mâi mơnhông; ivá vâ hbrâ tơrŭm, hbrâ ví xía vâ ƀă tơplâ mơdât mâu tơdroăng châ mơdêk pêi pro. Tung rôh khía mơhot kân 13 plong mot ƀă rôh kong mêi kân kố nah, mâu lêng kong pơlê Dak Lak hiăng teăm troh amê vâ veăng kum kuăn pơlê lăm ối tíu ê, tŏng xo mâu ngế trâm xía vâ, mơ-eăm tơkâ luâ xơpá, mơhno um méa ki lĕm tung hiâm mơno kuăn pơlê.

Mơhé ti mê, ki khât ăm hlo kong prâi ôh tá tơniăn hiăng pro ivá khu hbrâ mơdât xía vâ ƀă mâu lêng amê a mâu cheăm, bêng hâi rơdêi, ôh tá hâi ‘nâi hbrâ rơnáu hdrối, ối tơvâ tơvân tung tơdroăng hbrâ ví xiá vâ. Ki tơƀrê hnoăng rak ngăn tơnêi têa ‘na cheăng lêng a mâu kong pơlê cheăm ối pá, hâi tơƀrê; tơdroăng tăng ‘nâi plĕng vâ rĕng tối ăm râ kơpêng tung pơkâ ƀă tơrŭm mơnhông tơƀrê cheăng kâ- pơlê pơla bă cheăng lêng xuân hâi tơdâng tơ’mô.

Ing mê, kong pơlê Dak Lak pơkâ thế mâu cheăm bêng ƀă mâu lêng tơplâ mơ-eăm tơkâ luâ mâu tơdroăng pá hâi pêi pro tơƀrê ki hiăng mơhno tung rôh kong mêi têa lân lu kố nah, malối a mâu lêng ki hbrâ rơnáu tung kuăn pơlê cheăm. 

Tối nhên tơdroăng pơkâ mê, pôa Đào Mỹ, Phŏ kăn hnê ngăn Vi ƀan kuăn pơlê kong pơlê Dak Lak ăm ‘nâi:

 “Tung pơla hdrối kố nah, kong hlối ai khía mơhot kân 13 plong mot ƀă kong mêi têa lu kố nah ai tŭm tơdroăng vâ tối ki pá hlối hmâ dêi Khu pơkuâ hbrâ rơnáu rêm râ. A pâ thế Kơ koan lêng hnê mơhno, tăng ngăn tối nếo, kum Vi ƀan vâ ai hnê mơhno trâu tâ, ăm mâu lêng mơngế lăm troh tơtro ƀă mâu rơxế, kế tơmeăm thế rôe, hbrâ môi tiah lâi. Ôh tá ai môi tơdroăng pâ ki nhên mê Vi ƀan kong pơlê ôh tá chiâng mơjiâng kơpong hbrâ rơnáu a cheăm kô ôh tá kâi rơdêi”.

Hơnăm 2026, Dak Lak pơkâ pơtối mơdêk hnê hriâm ‘na lêng- kring tơniăn; pêi klêi mâu pơkâ rơtế ƀă cheăng kâ - rêh ối cheăng lêng, hbrâ tro hriâm rơnáu ƀă hbrâ rơnáu tung kuăn pơlê; mơdêk pêi pro tro luât lêng; mơjiâng mâu lêng tơplâ kong pơlê rơdêi, hbrâ vâ ai tiô tơdroăng kal vâ drêng trâm xiá vâ.