Vâ ngăn bai môi tiê a kố:

https://vov4.vov.vn/xodang/todroang-neo-ai-pole-pola-thoi-su-xa-hoi/khu-bai-pohleh-kan-tung-rah-xo-ia-monge-pro-pokua-meamonua-a-on-pa-puat-monua-kan-bo-bai-1-mau-vai-kodrai-mo-eam-cheang-pa-ngia-486789.vov4

Ki tơtrŏng má môi, ƀă Tây Nguyên, mâu tơdroăng pá puât môi tiah ki lĕm ro dêi tơdroăng rêh, xua hên kăn ƀô̆ dế pôu râng hnoăng cheăng hiăng tơkâ hluâ tơdroăng pơloăng mơnúa kố. Mê cho mâu kăn ƀô̆ hơnăm ối nếo chôa ‘lâng lo ing Dak Lak troh pơlê kong krâm Gia Nghĩa, tơring Dak Nông 20 hơnăm hdrối nah. Hiâm mơno tơrŭm môi tuăn ƀă tơdroăng ki khŏm mơ-eăm dêi vâi hiăng kum mơjiâng kơpong 6 tơring peăng hdroh dêi Dak Lak ton, mơjiâng kong pơlê Dak Nông ai kơlo tơtêk, tơdroăng kơdroh kơtiê rĕng má môi Tây Nguyên; mơjiâng pơlê kân ki ối to kong kế chiâng tíu kơdrâm kuăn pơlê rêh ối tê mơdró kơdrâm reăng mêa Gia Nghĩa pêng tơdroăng mơnhông tơtêk. Mê cho tơdroăng rêh ối ki lĕm tro, mơjiâng ivá vâ hiâm mơno kăn ƀô̆, ki khên tơnôu mơngế đảng viên pơtối châ mơnhông tung tơdroăng pơhlêh rah xo bro lế lĕm tro mơngế pêi cheăng tơnêi têa rế iâ, tơkŭm po thâ. Ƀai ki má péa dêi khu ƀai ‘’Mêa mơnúa a on, tơdroăng pá puât mơnúa hiâm mơno kăn ƀô̆’’, ngin tối ‘na tơdroăng ki ai khât kố.

Lối 20 hơnăm hdrối, hâi lơ 1/1/2004, kong pơlê Dak Nông hiăng mơjiâng drêng klâ ing kong pơlê Dak Lak tiô Pơkâ dêi Kuô̆k hô̆i.  Tơdroăng pơkâ drêng mê nah cho vâ mơnhông tơƀrê kơpong Tây Nguyên, mơnhông pêi cheăng tơƀrê tung rak ngăn pro hlá mơ-éa ƀă tơniăn ‘na cheăng lêng. La a kơpong tơnêi “rối trĭng ai châi chó ôh tá tơ’mô ƀă khía Dak Nông”, kơtiê ‘na tơmeăm khoăng tơnêi têa, tơdroăng rêh ối pơlê pơla ối pá puât, mâu ngế ki apoăng pêi cheăng tung khu kăn hiăng pơxiâm pêi cheăng xua rah xo to mâu kăn ƀô̆ hơnăm ối nếo ki kơhnâ vâ khât ƀă tơdroăng cheăng. Tơmeăm khoăng vâi djâ lăm cheăng cho xâk kơđô pôu a rŏng ƀă hiâm tuăn vâ mơ-eăm. Ôh tá ai tíu pêi cheăng, vâi mung hngêi kuăn pơlê.  Ôh tá ai on tơhrik, têa, vâi hriăn tăng pro xêh ti lâi vâ ai. Ôh tá ai tŭm mơngế pêi cheăng, vâi “hlối pêi hlối hnê”.

Mâu rơkong hơ’muăn tối dêi mâu kăn ƀô̆ dế mê nah, cho plâ to lâi hơnăm pá puât ôh tá ai ki klâi, la ai hiâm mơno ƀă tuăn loi khât:

“Rêm kơxo hâi môi a 4 chôu 30 phut la hiăng prôk. Troh a kố ối pêi cheăng 1 măng tĭng klêi mê vêh ƀă kơdrâi kuăn 1 hdrôh. Troh akố ối pú hên, kơxê kâ hmê tơdjuôm, rêh ối tơdjuôm pú hên. Klêi mê mâu nhŏng o xuân mơhnhôk dêi rơpó thế mơ-eăm vâ pê klêi hnoăng cheăng pơcháu”.

Sap mâu khế hơnăm pá puât, hâi kố Dak Nông hiăng hên tơdroăng pơ’lêh. Pơlê kong kơdrâm Gia Nghiã rế lĕm, tơmeăm khoăng hiăng ai, mâu kơvâ hnê hriâm, ‘na pơkeăng pơlât, túa lĕm tro, ôm hyô xuân hiăng hlo tơbrê. Tơdroăng kố châ pôa Ngô Thanh Danh, Kăn pơkuâ hnê ngăn Đảng kong pơlê Dak Nông tối:  

“Kơ’nâi 20 hơnăm pơtối mơjiâng kong pơlê, Dak Nông hiăng hluăn ing tơdroăng dêi 1 kong pơlê kơtiê hâi châ mơnhông ƀă mâu tơdroăng hdró tơƀrê. Ki mơdêk tơƀrê cheăng kâ châ a kơlo ki hên, pơkâ tâi tâng tơmeăm pêi lo châ 12 hdroh, tâi tâng kơxô̆ liăn ‘no mơjiâng pro ƀă mơnhông tâi tâng pơlê pơla tâk luâ 20 hdroh, kơxô̆ liăn pê lo riân rêm ngế châ luâ 13 hdroh tâng vâ pơhông ƀă hơnăm 2004”.

Ôh ta xê to mâu kơxô̆! Mê cho hnoăng pêi cheăng dêi môi rơxông kăn ƀô̆ hiăng ‘’pôu a kơxah’’ tá mâu hơnăm ki pơxiâm pêi cheăng, ing ôh tá ai troh chiâng ai. Nôkố, troăng hơlâ tơ’mot tơdjuôm Dak Nông a Lâm Đồng châ tơbleăng, mâu kăn ƀô̆ Dak Nông pơxiâm pêi mâu tơdroăng cheăng nếo, hlối hên tơdroăng tơngah hlối ôh tá tô tuăn, xua kố ôh tá xê to rôh ki pơ’lêh dêi mâu ngế cheăng ăm tơnêi têa ối cho rôh pơ’lêh dêi plâ rơxông. Nâ Lê Thị Huệ, kăn ƀô̆ Khu tơrŭm cheăng Đảng kong pơlê ăm ‘nâi:

“Ngin tối ro nôkố 1 tơdroăng rêh ối 5 pơlê. Ngin xuân loi khât a troăng hơlâ luât pơkâ dêi Đảng, tơngah xuân ai mâu tơdroăng ki nếo, troh a tíu pêi cheăng ki nếo. Ngin xuân kô pơtối pleăng hnoăng cheăng tơná”. 

Nâ Nguyễn Thị Quy, Ngế pơkuâ ƀơrô Thời sự, mơ’no Rơ’jíu  ƀă Um tơvi kong pơlê Dak Nông tối:

“Drêng mê á prôk ƀă tơdroăng vâ dêi hơnăm ối nếo, ôh tá tơvâ tơdroăng klâi ‘na rơpŏng hngêi. Rôh kố xuân ƀă hiâm mơno vâ hbrâ la thế ai hbrâ rơnáu krê. Môi tiah on veăng rơpŏng hngêi kuăn ‘nĕng ối kŭm thế hriâm alâi, pêi ki klâi... tŭm tơdroăng pin thế tăng ‘nâi plĕng hdrối, hriăn tơmiêt hdrối ƀă hlối hbrâ rơnáu’’.

Tâng 20 hơnăm hdrối, mâu kăn ƀô̆ dêi kong pơlê Dak Lak lo ing pơlê kong kơdrâm Buôn Ma Thuột troh a Gia Nghiã ƀă hiâm tuăn vâ mơ-eăm pêi cheăng dêi rơxông ối nếo, mê rôh kố, vâi lo ing Gia Nghiã lăm pêi cheăng a Đà Lạt ƀă hiâm tuăn chân krá dêi mơngế hiăng ‘nâi hiăng trâm. Jâ Nguyễn Thị Thu Hường, Phŏ Khu tơrŭm cheăng Đảng kong pơlê Dak Nông tối, mơhé tô tuăn la kăn ƀô̆ Dak Nông xuân vâ mơ-eăm tá tuăn hiâm tơkâ luâ xơpá ƀă vâ pleăng hnoăng tơná:

“Lối 20 hơnăm veăng ‘no hnoăng mơjiâng kong pơlê Dak Nông, ngin hâk vâ lăm ƀă hiăng ‘nâi nhên dêi tơná vâ pêi. Ƀă rôh kố kô pơtối tơ’mot tơdjuôm kong pơlê, ngin kô pơtối pêi cheăng ƀă hiâm tuăn vâ  dêi kăn ƀô̆ đảng viên. Hlối mơhnhôk mâu kăn ƀô̆, đảng viên pơtối mơ-eăm mơnhông rơdêi hiâm tuăn chân krá ƀă hbrâ lăm pêi cheăng”.

Tơdroăng tơ’mot tơdjuôm Dak Nông - Lâm Đồng - Bình Thuận ôh tá xê to rah xing xoăng pro rế lĕm tơnêi tíu. Ƀă mâ ngăn ton hơnăm, kố cho rôh vâ mơnhông kơpong cheăng kâ ki xiâm peăng Hdroh Tây Nguyên, tíu 3 kơpong ai túa lĕm tro Dak Nông - Lâm Đồng - Bình Thuận kô châ tơrŭm, mơhno tơbleăng ăm dêi rơpó. Pôa Lê Thành Hiệp, Ngế pơkuâ Tíu xiâm ngăn Túa lĕm xup um Dak Nông loi khât:

“Drêng 3 kong pơlê châ tơ’mot tơdjuôm chiâng môi kong pơlê Lâm Đồng, ki hôm cho mơnhông kơpong cheăng kâ nếo, tung mê vâ tối cho mơhno túa lĕm tro, ‘na kuăn ngo hơdruê rơngê dêi 3 kơpong kô pơ’lêh rế tơbrê pơtối trâm mâ châ hriâm ing dêi rơpó vâ hlê tơ’nôm hên túa vêa vong dêi 3 kơpong vâ mơnhông túa lĕm tro, ôm hyô ƀă mơnhông cheăng kâ tơdjuôm ăm kong pơlê Lâm Đồng’’.

Péa châ hơnăm hdrối, mâu kăn ƀô̆ a Dak Lak hơngế dêi on veăng rơpŏng hngêi, mơjiâng kong pơlê nếo Dak Nông, Péa chât hơnăm kơ’nâi, vâi lo ing Dak Nông hiăng hlê hên tơdroăng cheăng ƀă ai tuăn chân krá. Mâu kăn ƀô̆ Dak Nông hâi kố pơtối cho hlá cờ ki djâ troăng ahdrối, răk tuăn loi ki pơxúa dêi mâu tơdroăng pơ’lêh pêi cheăng ki Đảng, Tơnêi têa ƀă kuăn pơlê pin hiăng ƀă dế pêi pro; loi khât tung la ngiâ mê bú ai to hiâm tuăn vâ mơ-eăm kô kâi tơkâ luâ xơpá kô kâi mơjiâng.