Mâu hâi apoăng khế 6 kố, kơxô̆ tơmối troh Đà Lạt, kong pơlê Lâm Đồng tâk hên. A mâu troăng kân tíu xiâm môi tiah Trần Phú, lơ rơtâ tá kơpong long têa Hồ Xuân Hương... troh nôkố mâu kơdrum kân rơdâ kĭng pơlê kong kơdrâm Lạc Dương, Tà Nung, pơrá ai kơdrâm tơmối. Ngoh Nguyễn Khắc Hoàng Lâm, kuăn pơlê rêh ối ton hơnăm a bêng 4, tối:

‘’Mot a rơnó pơtê hriâm, pơlê kong kơdrâm pin kơdrâm phiu ro ‘nâng. Kuăn pơlê Đà Lạt ngin đi đo hbrâ tơdah tơmối ƀă rơkong tó têm rơpiât, plâi kâ krúa lĕm ƀă mâu tơdroăng hơ’muăn ‘na kơphô̆ ngo. Á xuân hâk vâ cha trâm, tơpui tơno ƀă tơmối hơngế, tối ăm vâi mâu tíu troh ki ối iâ mơngế ‘nâi ƀă mâu kơpong ôm hyô nếo dêi kong pơlê pin’’.

Klêi kơ’nâi hneăng tơ’noăng mot lâm 10 râ  phôh thong, ki hên hok tro hiăng tah lôi tơdroăng ki tô tuăn tơ’noăng, Đà Lạt thăm tơdah hên rơpŏng, ki hên mámôi cho ing Hà Nội, Hồ Chí Minh, Vũng Tàu ƀă mâu kong pơlê peăng mâ hâi Luô. Nâ Thùy Dương, tơmối ing pơlê kong kân Hồ Chí Minh, tối ăm ‘nâi:

‘’Roh prôk roh kố, ngin rah tíu ối a môi kơpong pơtê kĭng long têa Tuyền Lâm, tíu ai kong kế lĕm, triăn hơniâp ƀă lĕm mơnâ mâ ngăn. Ki rơhêng vâ tối, kơchâi kâ Đà Lạt đi đo po ăm ngin hâk vâ xua xú hŏm lĕm, phá tơ-ê. Pakĭng mê, ki dâi lĕm mơdró rơkê rơtế kơlo yă tơtro thăm pro hneăng pơtê thăm chiâng tŭm têk ƀă tơxâng pâ hên tâ’’.

Tơdroăng ki hâk vâ dêi ôm hyô Đà Lạt ối châ mơdêk râ kơnôm tung tơdroăng mơ-eăm dêi mâu khu tê mơdró kong pơlê tung tơdroăng pro nếo mơdró ƀă mơdêk ki dâi lĕm châ tâ. Nâ Bùi Lê Giáng Tiên, Pơkuâ Dalat Edensee Lake Resort Ƀă Spa tối ăm ‘nâi:

‘’Ngin hiăng pêi pro hên tơdroăng mơdró tơdjêp hlối pơtê ƀă mâu tơdroăng ki pơxúa ƀă tơ’lêi hlâu môi tiah spa, kơchâi kâ a tíu troh lơ mâu tour lăm ngăn iâ hâi a Đà Lạt. Pakĭng pơtê tơmối kô châ tâ tâi tâng mâu tơdroăng mơdró dêi kong pơlê Lâm Đồng ƀă kơlo yă tơtro tâ’’.

Ƀă pôa Đinh Văn Dôn, Kăn pơkuâ Kŏng ti pêi cheăng tiô rơnó Ôm hyô Happy Day mê tối:

‘’Ngin dế pêi pro hên tơdroăng ôm hyô ăm tơmối, tơmiât troh tơdroăng châ tâ pêi chiâk deăng kŏng ngê̆ rơxông nếo, xua nôkố tơmối tơmâng troh mâu tơmeăm pêi lo ing chiâk deăng, ki má lối cho kơphế, pơtê, massage xah hêi ƀă mâu tơdroăng mơdró ôm hyô ki má môi ki ê’’.

Ƀă kong prâi rơngiâp, kong kế lĕm mơnâ mâ ngăn, tê mơdró ôm hyô lĕm tro, pơlê kong kơdrâm Đà Lạt, kong pơlê Lâm Đồng ôh tá xê mơhnhôk tơmối tung tơnêi têa mê ối cho tíu troh ki má môi dêi tơmối ôm hyô lâp plâi tơnêi. Apoăng rơnó pơtê hriâm kố, a Đà Lạt hiăng tơkŭm po tơdroăng trâm mâ, tơpui tơno ‘’Tơdjêp khôi túa lĕm tro, Khu tơrŭm cheăng Ôm hyô pơla Lâm Đồng ƀă Khu tơrŭm cheăng Hàn Quốc’’.

Pôa Nguyễn Tiến Hải, Phŏ Kăn pơkuâ Khu pơkuâ khôi túa lĕm tro, Tơ’noăng ivá ƀă Ôm hyô kong pơlê Lâm Đồng tối ăm ‘nâi, tơnêi tơníu rơlối vâ mơhnhôk tơmối Hàn Quốc troh Lâm Đồng ối kân vâ pêi pro pơkâ hiăng pơkâ mơ’no:

‘’Đà Lạt – Lâm Đồng ai kong prâi rơngiâp lĕm, ai hên tơdroăng xah hêi, khôi túa lĕm pơlâ ki má môi ƀă hên môn tơ’noăng ivá ôm hyô môi tiah golf, tơnêi tơníu ăm tơmối Hàn Quốc troh lăm ngăn, pơtê’’.

Ƀă pôa Trần Hải Linh, Kăn hnê ngăn Khu tơrŭm Khu tê mơdró ƀă Mơ’no liăn cheăng Việt Nam – Hàn Quốc (VKBIA) tối, tơdroăng tơdjêp khôi túa lĕm tro ƀă tơrŭm ôm hyô pơla Lâm Đồng ƀă mâu khu tơrŭm cheăng Hàn Quốc ôh tá xê to kơnâ ‘na cheăng kâ, mê ối kum pro krá tơdroăng nhŏng o, tơrŭm ton xŏn pơla kuăn pơlê péa tơnêi têa.

‘’Tung la ngiâ, Lâm Đồng kô tơmot chiâng môi pái kong pơlê, kô chiâng tối kố cho môi tung mâu troăng prôk kum Lâm Đồng tơrŭm ƀă mơnhông nếo ƀă mâu khu tơrŭm Hàn Quốc. Ki rơhêng vâ tối cho tung péa kơvâ ki xiâm ôm hyô ƀă tê mơdró. Hâi kố, ai 35 khu tê mơdró pêi cheăng tung kơvâ ôm hyô ƀă pêi tơdroăng djâ prôk ôm hyô châ ngin djâ tung tơdroăng trâm mâ, pơkâ ki xiâm cho pro ti lâi vâ pêi pro mâu tơdroăng ôm hyô a Lâm Đồng mơnhông ó rơdêi tâ nếo’’.

Roh kố, teăng mâ mâu tíu pêi cheăng Hàn Quốc ƀă Việt Nam hiăng kĭ mơ-éa chôu vế tơrŭm cheăng, po roh tơ’lêi mơ’no liăn cheăng a mâu kơvâ cheăng môi tiah ôm hyô pơtê, pêi chiâk deăng hưh cơ, kơmăi kơmok uâ mơdiê krúa lĕm kong prâi ƀă logistics ôm hyô... Mâu khu tê mơdró Hàn Quốc pói tơngah kô pơtối châ tŏng gum hên ‘na troăng hơlâ, hngêi trăng, troăng klông, mơngế pêi cheăng ƀă tíu mơ’no liăn cheăng phuâng lĕm.

VKBIA tơkêa ai hnoăng tơdjêp, tơrŭm tơkŭm po mơhnhôk tê mơdró, khôi túa lĕm tro ƀă ôm hyô rêm hneăng, djâ Lâm Đồng chiâng tíu xiâm tơdjêp Việt Nam – Hàn Quốc.