Pơxiâm po “Hâi rơpŏng hngêi Việt Nam hơnăm 2025”
Thứ sáu, 05:00, 27/06/2025
Tơplôu: Katarina Nga/VOV Tây Nguyên
Tơplôu: Katarina Nga/VOV Tây Nguyên
VOV.Xơ Đăng - Ƀă inâi “Rơpŏng hngêi hơniâp ro – Tơnêi têa kro mơdrŏng”, Hâi mơdĭng Rơpŏng Việt Nam hơnăm kố po a Tíu xiâm mơhno túa lĕm tro – ôm hyô kong pơlê Dak Lak ing hâi lơ 25/6 troh tâi hâi lơ 29/6, ƀă tơdroăng ki veăng ai mâ dêi 7 to kong pơlê, pơlê kong kân, cho Sơn La, Tuyên Quang, Lạng Sơn, Ninh Bình, Thanh Hóa, Huế ƀă Dak Lak.
Tung hâi po mơdĭng ai hên tơdroăng pêi pro môi tiah: tơdroăng ngê̆ thuât chal nếo, hơdruê xoăng kuăn pơlê, trâm mâ ƀă ô eăng mâu ngế ki rơkê tung tơdroăng “rak vế hơniâp lĕm tung rơpŏng hngêi”. Mơđah tơbleăng ki lĕm túa lĕm tro tung rơpŏng hngêi, tơdroăng hbrâ mơdât xiăn pâm tung rơpŏng hngêi, mơjiâng rơpŏng hngêi phâi hơtô, tơdâng tơ’mô, tơrŭm, hơniâp ro.
Mơđah tơbleăng hlá mơ-éa ƀă tê mâu tơmeăm OCOP, tơmeăm xúa, malối tơmeăm kơpong tơnêi ki dâi lĕm dêi mâu kong pơlê. Kố cho tơdroăng pêi pro túa lĕm tro koh hâk hâi Rơpŏng hngêi Việt Nam 28/6. Ing mê mơdêk ki hlê plĕng dêi mâu kơvâ cheăng, rêm râ ƀă pơlê pơla ‘na tíu ối, hnoăng tung rơpŏng Việt Nam tung chal ki mơ-eăm tơná dêi hdroâng mơngế.
Viết bình luận