Hneăng cheăng hiăng hluâ, tung pơla tơdroăng lâp plâi tơnêi, kơpong ƀă têa kơxĭ Biển Đông ai mâu tơdroăng ki rĕng, ôh tá tơniăn; pơreăng kân COVID -19 xông tâ tú, laga mâu kăn ƀô̆, mâu lêng tung tâi tâng Đảng ƀô̆ Khu xiâm pơkuâ mô đô̆i kong pơlê xuân pêi tiô tơdroăng nôkố, pêi pro châ tơƀrê rêm hnoăng cheăng châ Khu xiâm pơkuâ lêng, Kuân khu 5 ƀă Tỉnh ủy Dak Lak pơcháu.

Ki nhên, khu lêng châ mơjiâng tiô troăng “rah xo bro lế lĕm tro, rơdêi’’; mâu khu râ kăn pơkuâ hnê ngăn cheăng Đảng, khu pú hên cheăng Đảng tung tâi tâng Đảng ƀô̆ đi đo tơtrŏng mơjiâng khu cheăng ó rơdêi ‘na kal kí hiâm tơmiêt; kăn pơkuâ, hnê mơhno pêi pro châ tơƀrê mâu tơdroăng mơnhông, pro lĕm tro ‘na ƀiên chê̆ rah xo iâ mơngế, rơdêi; thăm xúa khoa hok kŏng ngê̆, pơhlêh xúa kŏng ngê̆ kơxô̆.

Tung hneăng cheăng, Đảng ƀô̆ Khu pơkuâ Mô đô̆i kong pơlê Dak Lak hiăng teăm tơdrêng mơjiâng, pơhlêh tíu pêi cheăng, tơmot chiâng môi khu pêi cheăng Đảng môi tuăn ƀă tơkŭm po ƀiên chê̆ dêi kơ koan, tíu pêi cheăng; tơbleăng, ‘mâi rơnêu, tơ’nôm ƀă pêi pro kơtăng pơkâ pêi, tơdroăng rêh ối, tơdroăng pêi cheăng Đảng a mâu râ. Mâu troăng pêi ‘’Đảng ƀô̆ a kơ koan pêi cheăng pŭn lĕm’’, ‘’Chi ƀô̆ pŭn lĕm, pái ôh’’ châ pêi pro châ tơƀrê.

Veăng hneăng hôp, Đăi tă Trần Minh Trọng – Phŏ Chính ủy Quân khu V mơnhên, kheăn kơdeăn mâu tơdroăng châ tơƀrê ki Đảng ƀô̆ Khu pơkuâ Mô đô̆i kong pơlê Dak Lak châ tung hneăng hiăng hluâ; xuân môi tiah tơdroăng hbrâ hneăng hôp ƀă tơkŭm po châ tơƀrê 12 hneăng hôp Đảng ƀô̆ ối tung hneăng hơnăm 2025 – 2030 ƀă mơjiâng Tơdroăng pơkâ Hneăng hôp hneăng cheăng kố.

Vâ pêi pro châ tơƀrê Tơdroăng pơkâ hiăng mơ’no, ki rơhêng vâ tối tung pơla tơmot chiâng môi mâu kơ koan, tíu pêi cheăng tơnêi têa, Phŏ Chính ủy Kuân khu V pơkâ thế Đảng ƀô̆ Khu pơkuâ mô đô̆i kong pơlê tơkŭm a mâu hnoăng cheăng ki xiâm châ tơƀrê hluâ pơkâ kơ’nâi kố:

‘’Tơkŭm pơkuâ, hnê mơhno mơdêk ivá hbrâ rơnáu tơplâ dêi khu lêng kong pơlê; rak kơtăng tơdroăng hbrâ tơplâ, tơxâng pơkâ hnoăng cheăng tung rêm tơdroăng. Tơrŭm krá tơniăn ƀă mâu khu cheăng tung pơlê ‘nâi tơdroăng, tối hdrối, mơnhên tro tơdroăng ƀă teăm tơdrêng tơplâ châ tơƀrê ƀă mâu ngế ki xôi, rak krá tơniăn pơlê pơla. Tơkŭm po pơtâp hbrâ mơdât kơpong hbrâ mơdât dêi xivil mâu râ krá tơniăn; kêi đeăng pơkâ pêi tâi tâng mơnhông cheăng kâ – rêh ối pơlê pơla tơdjêp tơrŭm cheăng hbrâ mơdât ƀă gâk kring tâi tâng kuăn pơlê’’.

Pôa Nguyễn Đình Trung, Kăn pơkuâ hnê ngăn cheăng Đảng, Kăn pơkuâ hnê ngăn Đảng ƀô̆ Khu pơkuâ mô đô̆i kong pơlê Dak Lak tối ăm ‘nâi, Tơdroăng pơkâ dêi Hneăng hôp châ mơnhên ƀă troăng pêi ‘’Kuăn pơlê dêi hnoăng cheăng – Tơrŭm môi tuăn – Tuăn ngôa rơkê – Châ tơƀrê hluâ pơkâ – Mơnhông mơdêk’’ ƀă dó inâi ‘’Mơnhông mơdêk tiô khôi vâi krâ nah khu lêng kong pơlê Dak Lak khên tơnôu; tơkŭm mơjiâng Đảng ƀô̆ krúa lĕm, krá tơniăn; khu lêng kong pơlê krá rơdêi tâi tâng, djâ troăng ahdrối, kơhnâ rơkê; khŏm mơ-eăm kêi đeăng rơkê hnoăng cheăng lêng, gâk kring tơnêi têa, gâk kring krá tơniăn Tơnêi têa Việt Nam xah hô̆i chuh ngiah tung rơxông nếo’’. Pôa Nguyễn Đình Trung pơkâ thế tâi tâng Đảng ƀô̆ rup kŏng tung pêi pro Tơdroăng pơkâ Hneăng hôp.

‘’Tơkŭm pơkuâ, hnê mơhno ƀă ivá tơplâ; rak krá tơniăn hiâm mơno lĕm, tơdroăng rêh ối; mơnhông kuăn pơlê pơkuâ dêi hnoăng cheăng, tơrŭm môi tuăn, môi tuăn sap apoăng troh tá tui lui; tơdjuôm ivá, môi hiâm mơno, khŏm mơ-eăm pêi pro ƀlêi trâng Tơdroăng pơkâ Hneăng hôp hiăng pơkâ mơ’no. Khu pơkuâ hneăng nếo rĕng mơjiâng, pêi pro pơkâ tơkŭm po hriâm tâp, hlê plĕng nhên Tơdroăng pơkâ Hneăng hôp troh tâi tâng kăn ƀô̆, đảng viên, mâu lêng tung khu lêng kong pơlê; mơjiâng tơdroăng pêi pro inhên vâ chôa ‘lâng po rơdâ pêi pro. Mâu khu pêi cheăng thăm mơhnhôk mâu ngế cheăng, đoân viên thăm tơ’noăng, mơ-eăm pêi kêi đeăng lĕm tro mâu pơkâ, tơdroăng pơkâ ki Hneăng hôp hiăng pơkâ mơ’no’’.