Hdrối vâ po mơdĭng, cho hbrâ mâu tơmeăm, rơpŏng hngêi ki ai chiâk krếo krâm nhŏng o ai tŭm tá mâu hiăng krâ troh vâi hdrêng kơdrâi kơnốu tung pơlê vâ veăng kum tơná chói báu. Rơpŏng hngêi ngế ai chiâk hbrâ mâu hdrê: Báu, hdrê alâi, hdrế pía, hdrê tiăn,. hdrê trŏng, hdrê hăng. Mâu tơmeăm vâ xối xeăng mê, ngăn to rơpŏng hngêi ai ki klâi têk pleăng dêi ki mê, chu lơ í, ƀă drôu xiâm. Mơngế tung pơlê troh veăng kum mê râng klŏng vâ tâ hdrê báu vâ chối.

Jâ nôu Nư ối a cheăm Ea Wer, kong pơlê Dak Lak ăm ‘nâi, mơdĭng chối báu chiâk cho môi tơdroăng ki kal tung tơdroăng rêh ối túa lĕm tro dêi mơnế M’Nông, mơhno ki tơrŭm dêi rơpó tung kuăn pơlê:

“Klêi trâ dreăm xok a chiâk mê rơpŏng hngêi kô hbrâ vâ chối báu. Ki hdrối thế hbrâ hdrê báu ki lĕm, klêi mê krếo ăm rêm ngế troh veăng kum tơná chối. Klêi xối xeăng mê ngế kơnốu pơxiâm xo loăng xâng, xâng ăm ai trŭm, mâu kơdrâi tiô pá rŏng chốu báu. Kơ’nâi môi hâi chối báu a chiâk mê rơpŏng hngêi xuân pế hmê krếo mâu ki veăng pêi mê âi kâ, ôu drôu xiâm. Hngêi ki lâi xuân pro môi tiah mê, ngăn dêi pêi drôm. Klêi báu hiăng tum  brôk dêi rơpó lăm xuâ xuân pêi drôm môi tiah mê há”. 

Kơxo má, ngế pơkuâ rơpŏng hngêi rah môi tíu tơnêi ki a ’ngêi tâ tung chiâk, po văng krúa lĕm vâ pro hơpăm vâ ‘măn  mâu hmê kơchâi vâ xối. Pakĭng pong tâ pêng hdrê, ai drôu xiâm hiăng dêa, bêng têa, môi pŭm í hiăng  âp, môi hdro hmê tơxông, ƀă mâu tơmeăm xúa tung pêi chiâk mê cho ‘nêk, loăng xâng, klŏng tâ hdrê báu vâ chối. Ngế pơkuâ rơpŏng hngêi pơxiâm xối rơkâu xeăng. Rơkong rơkâu mê cho vâ tơbleăng tối ăm mâu xeăng ngo, xeăng kong, xeăng chiâk, púi vâ mâu xeăng ăm kong mêi tro tô ‘ló, vâ máu ki chối mê lo xông dâi lĕm, mâu chăm chói, kơnái kơnot oh tá khên kâ ‘nhiê, troh rơnó báu tum ah châ xo hên báu pêng hnôu pêng hneăm.

Klêi xối xeăng, ngế pơkuâ rơpŏng hngêi pơxiâm xo báu tâ tung klŏng, xo loăng xâng mê xâng, ƀă hlối chối báu. Pơtối mê kuăn pơlê tung pơlê troh veăng gum pêi hâi ki mê kô chối báu kơ’nâi. Jâ Nôu Ly, ối a cheăm Ea Wer, kong pơlê Dak Lak ăm ‘nâi, túa tơlá mê dêi mơngế M’Nông ai sap ing nah.

“Nah kuăn pơlê kơnôm ngăn to a kong prâi, ôh tá ai phon rơvât ăm báu, mê kuăn pơlê klêi muih, dreăm, chôu mê nếo chối báu a chiâk, chiâk ki mê pêi dâng 2-3 hơnăm, tơnêi hiăng ôh tá hơpok lĕm xếo vâi lăm muih chiâk tíu ki ê pêi dâng 3 hơnăm, klêi mê lôi lăm ko muih pêi chiâk tíu ê nếo  klêi mê nếo vêh pêi dêi a poh ki ton hdrối nah, vâi ôh tá ko ko muih tơ’nôm kong. Nôkố chiâk xuân pêt alâi, pêt kơtếo, ‘na báu kuăn pơlê hiăng klêi pêi klâng, kuăn pơlê hiăng mơnhông cheăng kâ, pêi pro tro tiô tơnêi têa hnê, ôh tá ko muih kong, la túa tơná xối xeăng hdrối vâ pêi chiâk hdrối vâ troh rơnó mêi vâi xuân ối rak  vế pro môi tiah ton nah”.

Hiăng klêi môi hâi pêi cheăng tơbrêi tơbrêh a chiâk, tá kăn rơpŏng hngêi ƀă mâu ki lăm rơtê kâ ôu veăng pêi mâu tơdroăng ki ro, rơngêi ting ting, mơhno ki tơrŭm dêi rơpó kum dêi rơpó. Nôkố, rêm hơnăm a mâu pơlê dêi mơngế M’Nông ki iâ xuân pro mơdĭng xối xeăng mê a poăng rơnó vâ pơxiâm pêi chiâk, pêt tơmeăm, vâ mơhlo hiâm mơno mơnê kơ xeăng hiăng gum ăm môi rơnó châ xo hên báu alâi.