Rơnó pri hơnăm kố mơnhên 3.508 ƀai tơ’noăng dêi 125 kơ koan chêh hlá tơbeăng. Hên ƀai châ mơnhên cho chêh trâu, xúa châ tơƀrê kŏng ngê̆, chêh tơdroăng ai ti lâi chêh ti mê troăng prôk 80 hơnăm mơjiâng ƀă mơnhông dêi Kuô̆k hô̆i Việt Nam.

Hô̆i đong châm điêm ai 6 khu châ rah xo vâ châm điêm: Hlá tơbeăng in, Hlá tơbeăng điê̆n tưh, Rơ’jíu, Um tơvi, Hlá tơbeăng um ƀă Hlá tơbeăng in mơ’no rêm khế hiăng pêi kêi đeăng tơdroăng châm apoăng ƀă rah xo 90 ƀai ki rơkê má môi tung roh châm điêm má mơ’nui, ai: 15 ƀai hlá tơbeăng in, 20 ƀai hlá tơbeăng điê̆n tưh, 15 ƀai hlá tơbeăng in mơ’no rêm khế, 15 ƀai mơ’no tung rơ’jíu, 15 ƀai mơ’no tung um ƀă 10 ƀai chêh hlá tơbeăng um.

Mâu ƀai chêh ki châ rah ‘mot châm điêm má mơ’nui tơniăn ki dâi rơkê, mơhno lĕm tơdroăng xiâm, tơdroăng pơtâng hnê tối, chêh tối tŭm pái tơdroăng ki xiâm tơdroăng dêi Kuô̆k hô̆i: mơjiâng luât, séa ngăn ki kân má môi ƀă pơkâ mâu tơdroăng ki kal dêi tơnêi têa; tơdrêng amê, pro eăng tơdroăng pơxá 80 hơnăm mơjiâng, mơnhông Kuô̆k hô̆i Việt Nam.