Hâi lơ 4/12, Kuô̆k hô̆i tơpui tơno a hngêi hôp kân ‘na mâu tơbleăng tơdroăng cheăng hneăng hơnăm 2021 - 2025 dêi Kăn xiâm hnê ngăn tơnêi têa, Chin phuh, Kuô̆k hô̆i ƀă mâu kơ koan dêi Kuô̆k hô̆i. Riân tơmeăm Tơnêi têa, Hngêi tơleăng kuăn pơlê ki xiâm ƀă kơ koan xiâm séa ngăn kuăn pơlê râ xiâm. Mâu kăn teăng mâ mơnhên hneăng hơnăm 2021 – 2025 tơkŭm po tung pơla pá puât, pơloăng mơnúa, laga tơnêi têa xuân rak tơniăn, tơtêk cheăng kâ châ rak ƀă ai mâu troăng mơnhông hôm ki kal. Kăn teăng mâ Kuô̆k hô̆i pói vâ tung hneăng la ngiâ, Kuô̆k hô̆i ƀă Chin phuh pơtối rơtế krá tơniăn, mơjiâng ó rơdêi hên tâ ăm mơnhông tơnêi têa.

Hên rơkong tơpui pâ thế dêi Kuô̆k hô̆i mơnhông hnoăng ‘’prôk hdrối môi kơteăng ‘na tơdroăng pơkâ pêi’’, pêi pro rĕng ƀă tơdroăng ki ai khât nôkố, ngăn pơkâ pêi cho ‘’pơhlêh nếo rơdêi dêi pơhlêh nếo rơdêi’’.

Hdrối mê, kơxê lơ 3/12, a Hngêi Kuô̆k hô̆i, pôa Trần Thanh Mẫn, Kăn xiâm hnê ngăn Kuô̆k hô̆i veăng Hôp mơgêi tơdroăng pêi cheăng hneăng má XV dêi Khu kăn teăng mâ Kuô̆k hô̆i pơkuâ dêi pơlê.