Kong mêi kân a kơpong kơnhŏng pro têa kroăng Lũy kơdrâ đik kân, pro lân lu vâ chê 800 toăng hngêi ối a cheăm Lương Sơn, kong pơlê Lâm Đồng ƀă pro troăng kân ăm phêp rơxế kơtâu têi Phan Thiết – Dầu Giây tơkâ hluâ cheăm Tân Lập tro lân rơdâ. Krê tơdroăng ki ôh tá tơniăn tơhnâp a văng Mimosa (Troăng kân tơnêi têa 20), khu cheăng hiăng thâ pơtroh rơxế, troh kơhâi dế lơ 4/12 hiăng rơnêu klêi ƀă ăm rơxế chiâng prôk péa pâ. Kong pơlê Lâm Đồng dế pơtối séa ngăn tơdroăng kong prâi, séa ngăn kơpong ki tơ’lêi hlâu vâ tơniăn ăm kuăn pơlê ƀă rak phuâng troăng prôk a mâu troăng kân ki xiâm.

Kơxo hâi lơ 4/12, têa lu a mâu kroăng Cái Nha Trang pơtối tâk đik kơ’nâi môi măng kong mêi kân, pro hên kơpong kuăn pơlê ối kĭng kroăng tro lu trâu. Têa kroăng hiu ing kơnhŏng kong ngo Khánh Hòa kĕn kung king Nha Trang, ai hên tíu  ki ‘na têa mơ’nok, têa kơtêi ƀă hlối plĕ mot tung hngêi kuăn pơlê. Kuăn pơlê ối péa pâ kĭng kroăng ăm ‘nâi, têa tâk đik rĕng tâ tâng vâ pơchông ƀă hâi hdrối, khŏm thế hên rơpŏng kuăn pơlê djâ mâu hiăng krâ, mâu vâi hdrêng lăm ối tíu ê djâ tơmeăm khoăng, ôtô lăm ối a tíu ki rơnâk.

A bêng Tây Nha Trang, khu lêng Kong an, Dân quân, mâu rơtăm pleăng hnoăng tơná đi đo tơpui  tung loa tơbleăng hdrối, hnê kuăn tối thế pơlê  ngăn nhên vâ ’nâi têa lu ti lâi vâ teăng hbrâ ví. Mâu troăng kân ki a klong hiăng tro têa lu plé pro xơpá tung tơdroăng prôk lăm.