Kơxê lơ 3/12, a Tíu pêi cheăng Xiâm Đảng, pôa Tô Lâm, Kăn xiâm pơkuâ hnê ngăn Đảng pơkuâ roh pêi cheăng ƀă mâu khu xiâm, kơvâ cheăng vâ tơpui tơno troăng rak ngăn, tŏng gum mơngế chó chêng tơvê kŏng. Tơnêi têa pin nôkố ai dâng 7,2% pơ’leăng mâ mơngế chó chêng tơvê kŏng, tơdâng 8 rơtuh ngế, tung mê, lối 1 rơtuh ngế chó chêng tơvê kŏng ki râ ƀă ki rơhêng vâ tối cho râ ó, rơtế dâng 600 rơpâu ngế vâi hdrêng ối tung hên kơlo chó chêng phá tơ-ê dêi pó.

-Pôa Tô Lâm, Kăn xiâm pơkuâ hnê ngăn Đảng pơkuâ roh hôp ‘na troăng rak ngăn ăm mơngế chó chêng tơvê kŏng

Mơgêi roh hôp, pôa Tô Lâm, Kăn xiâm pơkuâ hnê ngăn Đảng tối rơdêi tơdroăng tơdroăng tŏng gum mơngế chó chêng tơvê kŏng ôh tá xê to djâ ki kơnâ rơkê mê ối cho loăng rek ăm tơdroăng rơkê, cho tơdroăng pơkâ dêi mơnhông krá tơniăn ƀă mot tơrŭm lâp plâi tơnêi.

Mâu hơnăm hiăng hluâ, hên troăng pơkâ pêi pro, troăng hơlâ, troăng pêi tŏng gum, rak tơniăn tơdroăng cheăng, hnê hriâm mot tơrŭm, tăng cheăng pêi hiăng mơnhông châ tơƀrê. Kăn xiâm pơkuâ hnê ngăn Đảng pơkâ thế mâu khu xiâm, kơvâ cheăng ƀă kong pơlê pơtối kêi đeăng troăng pêi, mơdêk ivá châ achê tơdroăng khăm pơlât, pơlât ăm lĕm ƀă mâu troăng hơlâ kum rêh ối pơlê pơla tơniăn hnoăng ki pơxúa tơxâng ăm mơngế chó chêng tơvê kŏng.