Tiô Kăn xiâm pơkuâ hnê ngăn Đảng ai tối, hnoăng cheăng ki kal xiâm mê, ôh tá xê to 2 Khu xiâm ngăn ‘na pơkeăng ƀă khăm pơlât, Khu xiâm ngăn ‘na hnê hriâm ƀă hnê mơjiâng tuăn ngôa rơkê, mê cho hnoăng cheăng dêi tâi tâng pơlê pơla, tâi tâng kuăn pơlê athế veăng rak vế, pêi pro. Athế môi tuăn pêi pro, ôh tá bố bối dêi pó, ôh tá pro tơprâ lôi khu xiâm pơkuâ hnê ngăn, xua ki kal má mơ’nui, mê kuăn pơlê cho khu ngế ki châ xúa, châ dâi dêi mâu tơdroăng pơkâ mê.

Pôa Tô Lâm, Kăn xiâm pơkuâ hnê ngăn Đảng tối nhên: kơvâ ngăn hnê hriâm, khăm pơlât ƀă túa lĕm tro cho mâu kơvâ cheăng ki kal xiâm dêi tơnêi têa, rế cho kơvâ cheăng ki vâ pơkâ pêi, rế cho ivá vâ mơjiâng kuăn mơngế - mâu ngế pêi cheăng ki kal má môi dêi tơnêi têa. Kăn xiâm pơkuâ hnê ngăn cheăng Đảng tối tiah kố mâu Tơdroăng pơkâ dêi tơnêi têa tung pơla hdrối nah ối hlo pơkâ hên, ối bô bối, tơprâ tơprŭng mâu ngế pêi cheăng, tá hâi pêi pro nhên tơdroăng pơkâ pêi xiâm ƀă tá hâi tối nhên kơ koan ki chiu pôu râng xiâm.

Ƀă kơvâ khăm pơlât, Kăn xiâm pơkuâ hnê ngăn cheăng Đảng pơkâ thế pơhlêh tơdroăng pêi ki xiâm chiâng rak ngăn pơlât ivá châ chăn apoăng ƀă hbrâ rơnáu hdrối, mơgrúa lĕm kong prâi tơnêi tơníu, têa ôu, rak krúa lĕm kế kâ, cho mâu tơdroăng ki xiâm pro chiâng ai pơreăng. Tâng ôh tá mơdât sap ing xiâm, maluâ ‘no liăn tơ’nôm to lâi hên hngêi pơkeăng xuân ôh tá pêi châ tơdroăng púi vâ.

“Ƀă kơvâ khăm pơlât, ki kal cho pơlât ivá châ chăn rôh apoăng, athế ăm tơdroăng ki hbrâ mơdât hdrối. Mê dế nôkố dế ăm tơdroăng ki khăm pơlât, môi tiah dế hbrâ mơdât xo, xua hbrâ mơdât ôh tá tơƀrê mê pơreăng kô xông rơdêi. Athế mơnhên nhên tơrêm kơvâ cheăng, ki klâi dế ối hlo? 5 hơnăm nếo pin hôm kâi chêl liăn há lơ ôh? Athế pêi pro nhên môi tiah mê. Pơreăng kơ-o lo mơheăm tung lâp plâi vâi hiăng ton ôh tá xúa xếo, pro tâ tú tíu lâi xuân hbrâ mơdât pơlât ‘no liăn hên. Êi kliâm tiah lâi, tú tiah lâi? Á tơmiât tơdroăng tơnêi têa cho athế châ xúa tơƀrê nhên, mâu tơdroăng pơkâ pêi”.

‘Na hnê hriâm, Kăn xiâm pơkuâ hnê ngăn cheăng Đảng tối nhên kal pêi cheăng tro tơdroăng cheăng ki xiâm cho tung mâu hngêi trăng, troăng klông, mâu ngế pêi cheăng, hngêi trung hriâm, xing xoăng mâu hngêi trung lâm hriâm, tơchĕng tơmiât nhên ‘na ƀiên chê̆ tiô kơxô̆ ngế hok tro, mơnhông ki rơkê tro tung mâu thái cô, malối cho tơdroăng ki tơpui nâl Ănglê ƀă tơdroăng hnê mâu môn nâl Ănglê. Kăn xiâm pơkuâ hnê ngăn cheăng Đảng tối nhên mâu troăng hơlâ tŏng gum athế tơmiât troh tơdroăng pơkâ pêi ki má mơ’nui: kuăn pơlê châ pơxúa khât, châ hriâm tâp, châ khăm pơlât, rêh ối tơniăn ƀă rơkê plĕng. Bu drêng mê ah mâu tơdroăng mơjiâng pro nếo ai pơxúa khât.

Ăm rơkong veăng tơpui tối ‘na tơdroăng ‘no liăn pêi pro pơkâ tơnêi têa pêi pro pơhlêh, mơdêk ki rơkê tung hnê hriâm ƀă hnê cheăng hơnăm 2026-2035, pôa Trần Thanh Mẫn, Kăn xiâm hnê ngăn Kuô̆k hô̆i tối tiah kố, tung hneăng nôkố chiu tơdroăng tơdjâk têi dêi kăch măng kơmăi kơmok 4.0, tơdroăng ki xúa hên hĭn dêi tuăn ngoâ kuăn pơlê pro cho AI ƀă tơdroăng kal mâu ngế pêi cheăng rơkê. Xua mê troăng hơlâ ôh tá pơtê a tơdroăng ki hnê rơkê, hriâm rơkê tiô túa ki tiah hmâ mê athế cho môi rôh ki tơmiât pêi rơkê ƀă kế tơmeăm xúa tung hnê hriâm, hnê mơjiâng tuăn ngoâ rơkê:

“Tơdroăng pơkâ pêi pro mê athế ai troăng ngăn ton xŏn, tơbleăng châ troăng tơmiât mơnhông dêi pơlê pơla, kong têa xúa mâu ngế pêi cheăng tung la ngiâ. Tơdroăng pơkâ tơnêi têa mê kal athế pơkâ tơleăng mâu tơdroăng ki kal xiâm kal pêi tơdrêng mơnhông tơƀrê dêi kơvâ hnê hriâm. Tiô á cho tơkŭm tung tơdroăng pơhlêh kơxô̆, hnê cheăng pêi rơkê plĕng lơ hnê hriâm kơpong hngế hngo vâ ai troăng hơlâ kơxô̆ liăn châ xo. Má péa, cho athế rak tơniăn tŭm mâu ngế pêi cheăng châ kâ liăn pơkuâ ngăn, lăm ngăn. Liăn iâ la tiah lâi pro mơ-éa rĕng ‘nâng ‘nâi, rak tơniăn tro tung pơla pêi pro la ôh tá pro mơhrê, ôh tá vâ kơhveăm liăn ngân”.

Tiô kăn xiâm hnê ngăn Kuô̆k hô̆i, klêi kơ’nâi châ Kuô̆k hô̆i pơkâ tơdroăng kal rĕng hbrâ mâu mơ-éa hnê mơhno, klâ xoăng râ nhên tung tơkŭm pêi pro ƀă xing xoăng kơxô̆ liăn teăm tơdrêng. Kố cho tơdroăng ki kal má môi tung tơdroăng ki ai khât. Pakĭng mê kal athế lăm ngăn đi đo. Kăn xiâm hnê ngăn Kuô̆k hô̆i tối nhên, kố cho péa tơdroăng ki tơdjâk tơdrêng troh kuăn pơlê, tâng pêi pro tro kuăn pơlê kô pŭn rơtế mê cho kuăn pơlê ‘nâi, kuăn pơlê tơpui tơno, kuăn pơlê ngăn, kuăn pơlê châ pơxúa.