Hâi lơ 1/12, Leh pêi pro ‘’tơdroăng cheăng thâ rĕng mơjiâng, rơnêu hngêi ăm kuăn pơlê tro mơhot têa kân lân lu’’ kô rơtế châ tơkŭm po a kong pơlê Dak Lak kong pơlê trâm tro lŭp ó má môi tá ‘na mơngế ƀă tơmeăm tung roh têa lân lu sap nah tá chói ai. Tiô tối hdrối cho lối 680 toăng hngêi nếo. Rơtế ƀă Dak Lak, Leh pơxiâm mơjiâng pro, rơnêu hngêi kum kuăn pơlê kơpong têa lân lu tơkŭm po a kong pơlê Gia Lai, Khánh Hòa ƀă kơxô̆ liăn ki vâ iâ 170 rơtuh liăn/môi toăng hngêi.

Leh pơxiâm mơjiâng pro châ pêi pro tiô Mơ-éa ki kal dêi pôa Phạm Minh Chính, Ngế pro xiâm hnê ngăn tơnêi têa ‘na tơdroăng mơhnhôk pêi, po rơdâ pêi pro “Tơdroăng pêi Quang Trung” thâ rĕng vêh mơjiâng, rơnêu ngêi ối ăm mâu rơpŏng ai hngêi tro tơ’nhê xua mâu roh kong prâi pro ôh tá tơniăn pơla kố nah a mâu kong pơlê peăng Tơdế Tơnêi têa.

Tuy An Bắc cho tíu ki Vi ƀan kong pơlê Dak Lak tơrŭm khu lêng tơkŭm po Leh pơxiâm mơjiâng pro tơdroăng thâ mơjiâng, rơnêu hngêi ăm kuăn pơlê tro têa lân lu pơla kố nah. Vi ƀan kong pơlê Dak Lak pơkâ pêi pro mơjiâng nếo 684 toăng hngêi; rơnêu lối 1.500 hngêi ƀă mơjiâng 333 hngêi hôp tơdjuôm hlối pro kơbong hbrâ ví têa lân lu a thôn, pơlê kơpong kơphô̆, ƀă tâi tâng kơxô̆ liăn dâng 800 rơtal liăn.