Tiô riân dêi Khu pơkuâ hnê hriâm ƀă hnê mơjiâng tuăn ngôa rơkê kong pơlê Dak Lak, klêi kơ’nâi têa lân lu ai 183/243 hngêi trung hriâm a mâu cheăm peăng mâ hâi Lo kong pơlê Dak Lak  pơkâ tŏng gum kơxô̆ liăn tâi tâng 535.830 kơxop mơ-éa. Hên khu tơrŭm cheăng hiăng rơtế prôk, diâp tâi tâng kơxô̆ kơxop mơ-éa hriâm kố ăm kơvâ hnê hriâm Dak Lak, ƀă tâi tâng ki kơnâ tŏng gum 8,2 rơtal liăn.

Klêi kơ’nâi tơdah ing mâu tíu tŏng gum, sap hâi lơ 27/11 kơxop mơ-éa hiăng châ pơto a mâu hngêi trung ƀă tiô tối hdrối kô pêi kêi đeăng tâi tâng hdrối hâi lơ 4/12. Tung roh têa kân lân lu ó sap nah tá hâi chói ai sap ing lơ 16 troh lơ 22/11, têa lân lu hiăng lân hên pơlê cheăm peăng mâ hâi Lo kong pơlê Dak Lak, mơhiu hên tơmeăm dêi kuăn pơlê ƀă kơxop mơ-éa chêh, tơmeăm hriâm tâp dêi hok tro.

Tơdroăng Khu pơkuâ hnê hriâm ƀă Hnê mơjiâng tuăn ngôa rơkê kong pơlê Dak Lak dế thâ pơtroh kơxop mơ-éa hnê hriâm troh mâu cheăm bêng ki tro tơdjâk, kô kum hơnăm hriâm rĕng châ po, tơdrêng amê gum kơdroh pá puât ăm mâu rơpŏng, klêi kơ’nâi tâi tâng tơmeăm hiăng tro hía tung têa lân lu.