Troh lăm tŏng gum péa to cheăm ki tro tơdjâk râ ó má môi tung roh têa lân lu pơla kố nah a peăng mâ hâi Lo kong pơlê Dak Lak (kong pơlê Phú Yên ton), khu kăn ƀô̆, nhân viên Kơ koan teăng mâ kơpong Tây Nguyên (VOV Tây Nguyên) rơtế mâu ngế ki lăm tŏng gum hiăng tơlo, diâp phái ăm vâi krâ kuăn pơlê. 200 kơxuô tơmeăm, rêm kơxuô 10 kilô phái, châ pơtroh 200 rơpŏng kuăn pơlê a péa cheăm Hòa Thịnh ƀă Đông Hòa – laga gum ăm mâu rơpŏng tro lŭp ó.

Pôa Lê Hải Sơn, Kăn pơkuâ VOV Tây Nguyên tối ăm ‘nâi, klêi kơ’nâi hên hâi ối chêh ƀai têa kân lu, châ hlo tro lŭp kân dêi kuăn pơlê, kăn ƀô̆ - viên chưk tung kơ koan cheăng hiăng rơtế tơdjuôm ivá, mơhnhôk tăng phái ƀă tŏng gum. Mâu hâi hiăng hluâ, kơnôm tơdroăng veăng gum dêi kuăn pơlê lâp tơnêi têa, tơdroăng rêh ối kuăn pơlê kơpong têa lân lu hiăng tơniăn tâ, ôh tá ai tơdroăng ki kơklêa.

Mơhé ti mê, klêi kơ’nâi hên hâi to kâ xup kơxŏng khăng ƀă ôu têa ki tâ tung kung keo kŭn, kơbố xuân pói vâ ai hmê kâ. Tơdroăng diâp phái roh kố cho hiâm mơno veăng gum, tơdjêp khôi túa lĕm tro ‘’Ngế ki chía hôm iâ kum ngế ki pá tâ’’ dêi hdroâng mơngế Việt Nam.