A cheăm kong ngo Pà Cò, kong pơlê Phú Thọ, pôa Sùng A Chênh, Kăn hnê ngăn Đảng ủy, hlối pro Ngế hnê ngăn Hô̆i đong Kuăn pơlê dêi cheăm ăm ‘nâi: Tơdroăng cheăng kăn ƀô̆ châ Đảng ủy cheăm tối cho tơdroăng cheăng ki kal. Klêi tơ’mot tơdjuôm, cheăm hiăng tí tăng ngăn tâi tâng, tối tăng ngăn nếo kăn ƀô̆ kŏng chưk ƀă troăng hơlâ mơhno tơdroăng cheăng pêi ăm tơtro ƀă ivá ki khât tiô pơkâ thế pêi pro túa pêi cheăng mâu kăn achê kuăn pơlê.

“Vâ ai tiô tơdroăng púi vâ tung la ngiâ ƀă tơniăn tơdroăng cheăng mâu kăn 2 râ pêi cheăng tro tiô pơkâ, tung la ngiâ ƀă mâu cheăm kơpong hơngế hơngo, a mâu tơdroăng cheăng cho kŏng ngê̆ thong tin, tơnêi tíu, túa lĕm tro pơlê pơla..., mê cho mâu tơdroăng ki kong pơlê kal”.

Kơjo ahdrối mê cho hnê mơjiâng mâu kăn ƀô̆ kuăn pơlê hdroâng kuăn ngo ki iâ mơngế, pêi cheăng ai tiô pơkâ pơhlêh nếo tơƀrê ăm mâu kăn ƀô̆ sap ing cheăm cho tơdroăng ki xiâm, tíu pêi cheăng vâ kơpong kong ngo, kơpong hdroâng kuăn ngo kô mơ-eăm tâ nếo tung tơdroăng pêi cheăng tung hneăng la ngiâ.

Pôa Lê Anh Đức - Phŏ pơkuâ Khu xiâm ngăn mơngế pêi cheăng kong pơlê Lào Cai ăm ‘nâi: Ƀă tơdroăng cheăng pêi ki krê xêh dêi kong pơlê kong ngo, tíu tơkăng kong, hên hdroâng kuăn ngo, kong pơlê ‘nâi nhên vâ mơnhông tơƀrê rĕng ƀă krá ton mê môi tung mâu tơdroăng cheăng ki kal tơmâng cho thế mơjiâng mâu kăn ƀô̆, má môi cho kăn ƀô̆ mâu kăn, rak ngăn râ cheăm ki ai tuăn mơno lĕm pêi cheăng krá kak ‘na tơdroăng kal kí, ai tuăn ‘nâi tơmiât vâ pơhlêh nếo, ai ivá rơkê tung pêi cheăng tiô túa nếo, ai tŭm hiâm mơno tơdrăng lĕm, ai ivá rơdêi tuăn rơkê, hên ngế nhuô̆m, khên tơmiêt, khên pêi, khên pôu râng dêi hnoăng cheăng ƀă hlê ‘na tơdroăng a cheăm bêng dêi kong pơlê ki mê.

Pơla hdrối kố nah, Hôp Đảng ƀô̆ kong pơlê Lào Cai rôh má môi, hneăng hơnăm 2025-2030 hiăng tơbleăng ‘na mâu tơdroăng pơkâ pêi, hnoăng cheăng dêi hneăng ki nếo; tung mê, ai troăng hnê mơhno ‘na mơjiâng mâu kăn rêm râ ƀă mâu kăn ƀô̆, đảng viên, mê cho: “Mơjiâng mâu kăn achê kuăn pơlê, hmâ ƀă kuăn pơlê, tơdrăng lĕm, chiâng pêi mâu tơdroăng cheăng, pêi tơƀrê; mâu kăn ƀô̆, mâu kăn ki rơkê tung pơkuâ hnê mơhno, ai tuăn ngôa rơkê tung pêi cheăng, hmâ achê, xua kuăn pơlê pêi cheăng kum kuăn pơlê”.   

Pakĭng mê ‘nâi nhên 1 tung 5 tơdroăng cheăng ki kal má môi cho “Mơjiâng kăn ƀô̆, malối kăn ƀô̆ ki pơkuâ hnê ngăn rêm râ, ngế ối a ko thế ai tŭm tơdroăng ‘na hiâm mơno lĕm, tuăn ngôa rơkê tung pêi cheăng pơkuâ rak ngăn ƀă kuăn pơlê nhoăm, ai tuăn vâ mơnhông tơná ăm rế rơkê, ôh tá êa krếo thế ai tuăn tơmiât hriăn vâ pêi xêh tơdroăng cheăng ƀă tơdroăng pơkâ ki rế pá, tơdâng ƀă tơdroăng cheăng, ki rơkê ƀeăn, hriăn plĕng ki nếo, đi đo ai tuăn vâ pleăng tơná, kơhnâ pêi cheăng, kơhnâ tơmiêt ki nếo, kal thế mơ-eăm tăng ‘nâi plĕng, achê kuăn pơlê, hmâ ƀă kuăn pơlê, xua kuăn pơlê; tăng mâu kăn ƀô̆ hơnăm ối nếo ‘nôi hdrối, kăn ƀô̆ kơdrâi, mâu kuăn ngo”.

Tối ‘na tơdroăng tơbleăng nhên tơdroăng cheăng kố, pôa Lê Anh Đức, ăm ‘nâi:

“Ing mâ ngăn dêi kơ koan, ngin kô tơkŭm ngăn a mâu khu troăng hơlâ ki kal: Má môi cho tơkŭm tăng ngăn, ‘mâi hơ’lêh, tơ’nôm, pơ’lêh nếo, tơdâng tơ’mô mâu pơkâ, tơdroăng cheăng kăn ƀô̆ vâ tơniăn ki môi tuăn, tơdâng, nhên tung tơdroăng pêi pro. Má péa, cho mơdêk  ki tơƀrê  tung tơdroăng pơkâ hdró, rah xo tơkŭm pêi. Má péa, cho mơdêk tơƀrê tơdroăng pơkâ, rah xo ƀă xúa kăn ƀô̆, tơniăn môi tuăn kuăn pơlê, tơbleăng ăm ‘nâi tâi tâng tơdrăng,  xo ki lĕm, ki tơƀrê tơdroăng cheăng ƀă ivá pêi cheăng hdrối cho ki vâ hdró ăm ‘nâi. Hlối mơhnhôk, pro luât ki tơ’mot ƀă pơrâng mâu hơnăm ối nếo, kăn ƀô̆ ki rơkê pâ pêi cheăng”.

Kơxô̆ kuăn pơlê hdroâng kuăn ngo a kong pơlê Lào Cai nôkố dâng 66,2% pơ’leăng mâ mơngế tung lâp kong pơlê. Xua mê, tơdroăng tăng tơ’mot mâu ngế kăn ƀô̆ kuăn ngo châ ngăn cho hnoăng cheăng  ki kal, ton hơnăm ƀă đi đo ai pơxúa malối kal khât tung ‘mâi mơnhông tơdroăng kal kí a cheăm bêng, tơniăn krá ton tung mơnhông kơpong kong ngo, tíu tơkăng kong.