A rôh hôp, kuăn pơlê pêi chiâk, mơdró kâ ƀă khu pêi cheăng tơrŭm kơ-êng 400 tơdroăng, tối tơdrêng troh 25 tơdroăng pâ thế ‘na chêh pro hlá mơéa, mơjiâng kơpong pêt, xúa khoa hok – kong ngê̆, tí tăng xiâm kối, uâ pơliê, tŏng gum ‘na pêi chiâk deăng, kong prâi thôn pơlê ƀă tơdroăng rêh kâ ối pơlê pơla.

Mâu kăn tơpui hên mâu troăng hơlâ ki kal môi tiah kơdroh ki ôh tá mơhúa xua kong mê khía mơhot têa kân lân lu pro, mơnhông pêi chiâk deăng rơkê, po rơdâ kơchơ mơdró – mơdêk ki dâi lĕm ƀă ivá tơxup tê roê tơmeăm pêi lo ing chiâk deăng, mơdêk tơrŭm cheăng - tíu tơrŭm cheăng, pơhlêh châ xúa kơxô̆ liăn mung pêi cheăng kâ, tơnêi tơníu ƀă kơchơ tê mơdró rơkê.

Hên rơkong tối hêng hôu hlo tơdroăng ki lu lêa tung tê mơdró, pơloi inâi tơmeăm pêi lo ing chiâk deăng tối cho dêi Đà Lạt chiâng tơdjâk ‘mêi ăm kuăn pơlê pêi chiâk. Jâ Lương Thị Yến Vân, Kăn pơkuâ Khu pêi cheăng tơrŭm Vườn Nhà Đà Lạt, ăm ‘nâi:

“Môi kg yâu tây ki á pêt xêh mê yă rơpâ má môi xuân cho 100 rơpâu liăn, drêng hiăng têng khăng 10 kg nếo châ 1kg. Riân tơ’nôm liăn on tơhrik, hnoăng vâi pêi mê tâi tâng kơxô̆ liăn hrê cho 1,2 rơtuh liăn môi kg yâu tây kơ-óu khăng. Laga yâu tây ki tê tung kơchơ mơdró môi tiah a kơchơ Đà Lạt vâi tê bu 250 rơpâu liăn môi kg, tung pơla mê ôh ti ai mâu mơ-éa chêh mơnhên xiâm kối, tíu pro la xuân ối châ tâ tung kơ’lo ƀă têa inâi yâu tây kơ-óu têng Đà Lạt. Mê nếo môi tiah plâi hồng ối drêh, roê tá container tê ƀă tĕm tem pêt a Đà Lạt. Á hlo ôh ti ai kơ koan ki lâi tăng ‘nâi vâ rak vế hnoăng pơxúa dêi kuăn pơlê pêi chiâk, ngin hêng hôu khât mâu tơdroăng ki tiah mê”.

Kăn pơkuâ mâu khu râ, tíu pêi cheăng hiăng ai troăng hơlâ pêi pro tơdrêng hên tơdroăng; mâu tơdroăng ki tá hâi chiâng vâ tiâ mơnhên tŭm mê kô châ tơkŭm ƀă vêh tơbleăng ƀă mơ-éa ăm kuăn pơlê.

Tơpui a rôh hôp, pôa Hồ Văn Mười, Kăn hnê ngăn Vi ƀan kong pơlê Lâm Đồng tối nhên tơdroăng ki tiâ mơnhên, pơxâu phâk rĕng. Kong pơlê tơhrâ kô rĕng tiâ mơnhên mâu rơkong tơpui tối ki tro dêi kuăn pơlê; mâu tơdroăng ki kal tơkâ luâ hnoăng pơkuâ kô châ tơbleăng ăm Tơnêi têa. ‘Na tơdroăng dêi tơmeăm tíu ê roê ‘mot vêh akố hêak inâi tơmeăm dêi kong pơlê, pôa Hồ Văn Mười tối rơdêi kô pơxâu phâk kơtăng.

“Klêi kơ’nâi rôh hôp kố, ngin kô pơkâ thế mâu tíu pêi cheăng ki ai tơdjâk, tung mê hnoăng cheăng ki kal dêi khu kŏng an, Khu ngăn kơmăi kơmok ƀă tê mơdró, khu pơkuâ kơchơ mơdró ƀă mâu tíu pêi cheăng ki ê. Tơdroăng kố ôh ti xơpá khât tâng pin pêi kơtăng”.

Rôh hôp châ tơngah pro tơ’nôm ivá vâ kơvâ pêi chiâk deăng Lâm Đồng mơnhông krá tơniăn ton, mơdêk pêi lo liăn ƀă tơdroăng ối ăm kuăn pơlê pêi chiâk tung pơla kong prâi pơhlêh rế hía rế ôh tá tơniăn.