Mot a hneăng nếo, Mât trâ̆n Tơnêi têa Việt Nam kong pơlê pêi pro 6 tơdroăng pêi ki xiâm: Pơhlêh nếo pơtâng hnê tối, pro môi tuăn pơlê pơla; mơdêk pơtâng tối tơdroăng ƀă ‘nâi tơdroăng pơlê pơla tô tuăn; Mơdêk ki dâi lĕm séa ngăn, tiâ tối, pro krá tơniăn troăng pêi kuăn pơlê pơkuâ dêi hnoăng cheăng a pơlê pơla; Pêi pro châ tơƀrê mâu roh mơhnhôk, tơdroăng tơ’noăng krá tơniăn.

Xông tơpui hnê mơhno a Hneăng hôp, pôa Thái Đại Ngọc, Kăn pơkuâ hnê ngăn cheăng Đảng kong pơlê Gia Lai pơkâ Mât trâ̆n kong pơlê tung hneăng la ngiâ pơtối mơnhông hnoăng xiâm tung mơjiâng khu tơrŭm môi tuăn tâi tâng hdroâng mơngế. Hneăng hôp hiăng tơno rak xo 134 ngế kăn, Khu hnê mơhno má môi ai 9 ngế; pôa Nguyễn Ngọc Lương, Phŏ Kăn pơkuâ hnê ngăn cheăng Đảng kong pơlê, Kăn hnê ngăn Viƀan mât trâ̆n Tơnêi têa Việt Nam kong pơlê hneăng hơnăm 2024 – 2029, pơtối châ rah xo pro Kăn hnê ngăn Viƀan mât trâ̆n Tơnêi têa Việt Nam kong pơlê hneăng má I. Hneăng hôp xuân tơno rah xo Khu râ kăn teăng mâ ai 26 ngế veăng hneăng hôp kăn teăng mâ Mât trâ̆n Tơnêi têa Việt Nam hneăng hơnăm 2026 – 2031.