Tung roh lăm pôu pêi cheăng păng ‘nâng a Senegal, pôa Trần Thanh Mẫn, Kăn xiâm hnê ngăn Kuô̆k hô̆i hiăng trâm mâ Kăn xiâm pơkuâ kong têa Senegal Bassirou Diomaye Faye a tíu pêi cheăng Kăn xiâm pơkuâ kong têa. Kăn xiâm hnê ngăn Kuô̆k hô̆i mơnhên Việt Nam nhuô̆m mơnhông mơdêk tơrŭm hên pâ ƀă Senegal, ki rơhêng tối tung mâu kơvâ cheăng kâ, tê mơdró, mơ’no liăn cheăng, pêi chiâk deăng, hyôh măng ƀă khoa hok – kŏng ngê̆.

Kăn xiâm hnê ngăn Kuô̆k hô̆i tối ăm ‘nâi, hên grup pơkuâ kân dêi Việt Nam dế tơmâng ti tăng plĕng roh tơ’lêi hlâu mơ’no liăn cheăng a Senegal. Vâ tŏng gum châ tơƀrê tơdroăng pêi cheăng tơrŭm cheăng, Kăn xiâm hnê ngăn Kuô̆k hô̆i pơkâ thế péa pâ rĕng kêi đeăng tiô tro luât, a ngiâ cho mơdêk tơpui tơno mâu tơdroăng pơkâ xiâm môi tiah Tơdroăng pơkâ Tŏng gum mơ’no liăn cheăng ƀă Tơdroăng pơkâ ví xo hnoăng mơhá péa xôh, pro xiâm ‘na luât tơtro ăm khu tê mơdró péa tơnêi.