A roh tơpui tơno, pôa Lương Cường, Kăn xiâm hnê ngăn tơnêi têa mơnhên tơrŭm nhŏng o, pú hmâ ki xiâm Việt Nam – Angola cho tơmeăm tơdjuôm kơnía, cho xiâm kối krá tơniăn vâ péa tơnêi têa po hneăng mơnhông nếo, pơtối thăm pêi pro ƀă pro trâu hơhngế tâ mê nếo tơrŭm loi tơngah kal kí, tŏng gum dêi pó pơla péa Đảng, péa Tơnêi têa, tơdroăng tơrŭm môi tuăn, tơrŭm ƀă ƀă hlê plĕng dêi pó pơla kuăn pơlê péa tơnêi têa.

Pôa Lương Cường, Kăn xiâm hnê ngăn tơnêi têa pơkâ thế péa pâ thăm tơrŭm tung mâu kơvâ ki xiâm môi tiah gâk kring tơnêi têa, gâk kỉng pơlê pơla, mơnhông ƀă pro hên troăng tơrŭm mâu kơvâ tiô khôi vâi krâ nah môi tiah tơrŭm ‘na mơngế rơkê khăm  pơlât, hnê hriâm, pêi chiâk deăng. Péa kăn xiâm pơkuâ môi tuăn thăm pro krá tơniăn tơdroăng tơrŭm môi tuăn, tơrŭm, loi tơngah pơla péa Đảng, péa tơnêi têa ing rak tơpui tơno mâu roh lăm pôu ƀă trâm mâ khu râ kăn xiâm, tung mâu ƀâng, pêi pro châ tơƀrê troăng tơrŭm cheăng Viƀan Liên chin phuh ƀă mơdêk tơrŭm cheăng tung mâu kơvâ cheăng môi tiah hnê mơjiâng mơngế pêi cheăng, kăn ƀô̆ pơkuâ, tơpui tơno sinh viên.