Kơxo má, drêng ối ai têa ngêa a tơkâng hlá, pôa Rơ Châm Hyă krâ pơlê rơtế ƀă khu tŏn chêng, khu ki xuăng dêi pơlê Dun De, cheăm Ia Grai, kong pơlê Gia Lai, hiăng troh a têa kơneăng dêi pơlê vâ hbrâ pro mơdĭng xối xeăng hdrối vâ chối báu. Mâu kơnốu djâ xiâm drôu, vâi kơdrâi pôu tơmeăm vâ xối xeăng; vâi hdrêng hâk toi tiô dêi nôu pâ, ngăn ngiâ vâi hlo rêm ngế hơniâp ro tó hâk. 

A tơnêi lĭng, kuăn pơlê hiăng mơdâng pro kâng xŏn troh a ‘ngêi rơnuâ lĕm kât ƀă kơxái rái ƀă mâu hlá kong. Tơmeăm vâ xối cho môi xiâm drôu, môi to í pheăng, hơnêh chu ki pheăng ƀă hmê nếo, têk ‘măn i lĕm a xiâm kâng.

Drêng rêm tơmeăm têk pleăng hiăng tŭm, pôa Rơ Châm Hyă krâ pơlê prôk troh a xiâm kâng pơxiâm pro mơdĭng xối xeăng. Pôa têk mŏng ai chuâ drôu xiâm, mâ ‘ngối ngăn ngi plêng, pơchuât tơdroăng rơkâu pâ ngăn krip, krếo Xeăng ngo, Xeăng têa, Xeăng Báu troh veăng mơdĭng, veăng kum kuăn pơlê pêi cheăng châ hên alâi, báu, rêm ngế kuăn pơlê ai hmê kâ phâi, ivá mo lĕm ƀă hên tơdroăng rơkâu pâ ki ê.

 Klêi rơkâu pâ, pôa ôu môi rơlŏn drôu xiâm ki apoăng, klêi mê ăm rêm ngế vâi krâ hdrối klêi nếo troh mâu kuăn pơlê. Drêng drôu xiâm mê hiăng klêi ăm tâ tá rêm ngế, idrâp chêng koăng chuât rơdêng mơhnhôk hvêa prôk kuăn pơlê. Mâu vâi droh Jarai  kơhnhon xuăng tiô idrâp chêng, mâu rơtăm tŏn hơkâ, tŏn chêng chuât rơdêng. Vâi kơhnhon xuăng prôk pro tơvó kân rơtâ tá loăng kâng. Mâu vâi rơtăm pơlê Dun De, krâ pơlê tŏn tâi ƀai chêng kố troh ƀai chêng ki ê; rêm ngế xuăng hên ton to lâi chôu hlối ôh tá pơtê tiô idrâp chêng koăng ki hiăng hmâ tâng.

Nâ Puih Gái, pơlê Dun De, tối: ƀă mơngế Jarai, kloăng báu cho tơdroăng rêh ối. Mơdĭng hdrối rơnó chối báu cho rơkong hnê pơchân rak vế tro tơdroăng ki lĕm vâ mơnê kơ xeăng, hlối vâ thăm tơrŭm pơla kuăn pơlê.

“Hơnăm ki lâi ngin xuân veăng mơdĭng. Kuăn pơlê pơtối tơbâ tơdroăng pro mơdĭng cho vâ pơtối rak vế túa lĕm tro ton nah dêi mơngế Jarai, mê á ‘nâi rơ-rêk xuăng, kơhnhŏn tiô idrâp vâi tŏn chêng. Ngin xuân hnê ăm mâu rơxông nếo, vâ xo ah hmôi vâi pôi tá hiêt lôi túa lĕm tro dêi kuăn ngo  tơná”.

Apoăng rơnó mơdrăng kố, kơvâ ngăn túa lĕm tro Gia Lai nếo tơkŭm po pơtối tơbâ pro mơdĭng hdrối rơnó chối báu vâ kum mâu kuăn pơlê mơngế Jarai pơtối rak vế dêi túa lĕm tro kuăn ngo tơná, vâ hnê mơhno pơtối rak túa lĕm tro - Ôm hyô ai hên túa vêa vong ki lĕm mê. Pôa Nguyễn Văn Đính, Phŏ kăn hnê ngăn Vi ƀan Kuăn pơlê cheăm Ia Grai, tối:

“Cheăm kô pơtối tơbâ pro mơdĭng tung mâu leh mơdĭng ki ê mê cho mơdĭng rơkâu xối ăm kong mêi, mơdĭng kleăng kơneăng têa vâ veăng tơbâ pơtối rak pơtối pro mơdĭng túa ki lĕm ton nah dêi kuăn ngo, vâ thăm tơrŭm ƀă dêi rơpó tung mâu pơlê cheăm, veăng pơtối mơnhông ôm hyô, pro xiâm ki tăng xo tơ’mot liăn ăm kuăn pơlê”.

Jâ  Lê Thị Thu Hương – Phŏ Pơkuâ Tíu xiâm ngăn Túa lĕm tro - Tơ’noăng ivá ƀă Ôm hyô kong pơlê Gia Lai ăm ‘nâi: Ing tơdroăng pơtối tơbâ pro mơdĭng xối xeăng, kuăn pơlê kô ai rôh vâ hvái ngăn tơdroăng ki hên hĭn, hên túa dêi ki kơnía ‘na túa lĕm tro ton nah; hlối vâ thăm tơrŭm krá ƀă dêi rơpó tung pơlê, pơtối râk vế hnoăng cheăng dêi ngế kuăn pơlê pâ nhoăm, hnoăng cheăng dêi krâ pơlê, ngê̆ nhân. Kố xuân cho rôh vâ mơdêk hlê plĕng ăm mâu rơxông nếo tung tơdroăng pơtối rak tơmeăm kơnía túa lĕm tro ton nah dêi hdroâng kuăn ngo.

“Tơkéa vâ tối ing mâu tơdroăng pơtối tơbâ pro, kuăn pơlê hâk vâ khât. Sap hơăm 2023 -2025, kong pơlê hiăng tơkŭm po hên tơdroăng pơtối pro mơdĭng. Nôkố, khu xiâm ngăn túa lĕm tro pơtối tí tăng ‘nâi plĕng ăm Vi ƀan Kuăn pơlê dêi kong pơlê pơtối mơjiâng tơdroăng tơkêa bro pơtối rak chêng koăng pơla hơnăm 2026-2030, tung mê, ai tơdroăng pơtối pro mơdĭng nếo. A tơngah tung la ngiâ túa lĕm tro hdroâng kuăn ngo a Gia Lai kô ai hên ngế ‘nâi tâ”.

Ƀă kuăn pơlê mơngế Jarai, mâu tơdroăng pro mơdĭng tiô chal ton nah ôh ti xê to tơmeăm kơnía ki pâ pôa pin ‘măn ăm, mê ối cho xiâm vâ pơtối rak vế tơdroăng ki lĕm pơla tơdroăng rêh ối tiô chal nếo nôkố. Bú hlâu tê, la ing mâu tơdroăng pro mơdĭng mê hiăng tơdjêp pơla mâu pơlê ƀă pơtối rak ki kơnía git lĕm tro ton nah vâ hnê ăm ing rơxông kô troh rơxông kơ’nâi, ôh tá piu lôi tiô khế hơnăm.