Klêi kơ’nâi 30 hơnăm sap ing pro tơ’lêi hlâu tơrŭm cheăng ƀă 25 hơnăm tơbleăng Tơkêa BTA, tê mơdró pơla péa pâ hiăng mơdêk rơdêi tá túa pơkâ ƀă ki rơkê, chiâng môi ivá mơhnhôk ki kal tung mơdêk cheăng kâ, tăng cheăng pêi ƀă thăm mơnhông tơrŭm cheăng tê mơdró pơla péa tơnêi têa ai tơdroăng tŏng gum dêi pó khât. Nôkố Mih ối má 11 tung kơxô̆ mâu kong têa ‘no liăn pêi cheăng a Viẹet Nam ƀă 1.500 tơdroăng tơkêa ƀă tâi tâng kơxô̆ liăn chêh inâi lối 12 rơtal USD. Tơrôu, Việt Nam ai 266 tơdroăng tơkêa ‘no liăn cheăng a Mih ƀă tâi tâng kơxô̆ liăn chêh inâi pêi cheăng vâ chê 1,4 rơtal USD.

‘Na tê mơdró hơnăm 2025, tâi tâng kơxô̆ liăn châ xo ing tê mơdró lối 140 rơtal USD, tâk vâ chê 300 xôh tâng vâ pơchông ƀă 30 hơnăm hdrối. A Rôh hôp, mkâu kăn hiăng tơpui trâu ‘na cheăng kâ tê mơdró Việt Nam – Mih, tơkŭm ‘na nâp hnoăng liăn mơhá ƀă tơdroăng rak vế tê mơdró, veăng gum pro trâu rơdâ ki hlê plĕng tơdjuôm, mơdêk tơrŭm pơxúa pơla rêm pâ ki ai tơdjâk; ing mê po rơdâ tơnêi tơníu tơrŭm cheăng ƀă ‘mâi mơnhông ivá ăm tơrŭm cheăng kâ tê mơdró Việt Nam – Mih mơnhông tơniăn, krá ton ƀă rơtế ai pơxúa tung hneăng ki pơtối.