Kơxo hâi lơ 10/12, A tíu pêi cheăng Chin phuh, pôa Phạm Minh Chính - Ngế pro xiâm hnê ngăn tơnêi têa pơkuâ hôp Chin phuh tơpui tơno ƀă kuăn pơlê ki pêi chiâk Việt Nam hơnăm 2025 ƀă tơdroăng pơxá: “Xúa khoa hok kơmăi kơmok, pơ’lêh nếo hriĕn plĕng ki nếo ƀă pơ’lêh kơxô̆ tung kuăn pơlê” ƀă 150 ngế kuăn pơlê pêi chiâk deăng, khu pêi cheăng tơrŭm, khu mơdró kâ ƀă mâu ngế rơkê, khu cheăng khoa hok. A rôh tơpui tơno, Ngế pro xiâm hnê ngăn tơnêi têa ƀă mâu kăn mâu khu xiâm, kơvâ cheăng tiâ tơdrêng mâu tơdroăng kuăn pơlê kơ êng.

Pôa Phạm Minh Chính Ngế pro xiâm hnê ngăn tơnêi têa pơkâ thế Khu xiâm khoa hok ƀă kơmăi kơmok tơniăn ai hyôh, ai on tơhrik, ai hyôh 5G, hnê mơhno ăm mâu grup ngăn on tơhrik, hyôh phôn mơ’no ăm hyôh ƀă on tơhrik troh a kuăn pơlê kơpong hơngế hơngo, kơpong klong, kơpong tíu tơkăng kong, chuăn têa kơxĭ, kơpong xơpá, pakĭng mê mơdêk mơjiâng Chin phuh kơxô̆, pơlê pơla kơxô̆, kuăn pơlê kơxô̆. Tơdjâk troh luât pơkâ tê rôe phái, pôa Phạm Minh Chính hnê mơhno ăm Khu xiâm ngăn Liăn ngân; Khu xiâm ngăn pêi chiâk ƀă hyôh kong prâi hbrâ rơnáu hdrối drêng yă pháu dế chu mê Tơnêi têa thế rôe ‘măn vâ kum kuăn pơlê, hlối vâ ’măn kơdĭng phái ăm  tơnêi têa, hlối hbrâ rơnáu vâ ai phái tê ăm kong têa ê, ôh tá ăm kuăn pơlê kơdrâ.