Ki nhên, a kong pơlê Gia Lai ai 674 toăng hngêi tro tơhnâp kal châ pro nếo, ki hên cho xua tơdjâk ing kong mê khía mơhot rôh má 13. Tâi tâng mâu hngêi ki kal pro nếo kố hiăng châ pơxiâm pro. Tung mê, 451 toăng hiăng pro klêi lơ hiăng vâ pro klêi. Kơxô̆ ki u ối cho ối tung mâu kơpong pro pơlê nếo, tơnêi pro vâ pro gá hiăng ai ƀă dế châ tơbleăng vâ pro. Gia Lai tơhrâ kô pro klêi tâi tâng mâu hngêi ki châ pro nếo kố cho a hâi lơ 25/1/2026.

‘Na ‘mêng rơnêu hngêi ối, tung lâp kong pơlê ai 31 rơpâu toăng kal châ ‘mêng. Troh nôkố, vâ chê 90% hiăng klêi ‘mêng rơnêu. U ối kô châ ‘mêng tung khế 12/2025 ƀă kô klêi hdrối hâi lơ 15/0/2026. Tơdroăng ki pro châ mơnhên tối cho rĕng khât. Kăn pơkuâ Vi ƀan kong pơlê Gia Lai ăm ‘nâi tơdroăng kố cho kơnôm ing hbrâ rơnáu klêi kơ’nâi khía mơhot kân rôh má 13, drêng kong pơlê xúa troăng hơlâ têa tah hngêi ối pơtân, xi kơcho ăm mâu rơpŏng ki ai hngêi tro tơ’nhiê, ôh tá hên hâi khế pro nếo.

Kong pơlê Gia Lai ai tŭm mâu liăn ngân ing liăn ngân ‘măn kơdĭng dêi Tơnêi têa hiăng hbru ăm, rơtế ƀă liăn ki veăng tơlo gum ing pơlê pơla dêi mâu khu tơrŭm, mâu ngế krê ing Măt trâ̆n Tơnêi têa Việt Nam ƀă mâu kơxô̆ liăn ki ê hía. Pakĭng mê kơxô̆ liăn khu mố đô̆i ƀă Kŏng an cho ki xiâm tung mơ-eăm pro, pơto chơ mâu prêi xơ mong ƀă hên ki ê.