Rôh tơ’noăng kố tơ’mot ki veăng dêi 41 đô̆i lo ing mâu kong pơlê, pơlê kong kân: Sơn La, Quảng Trị, Đắk Lắk, Lâm Đồng, Hà Nội ƀă Pơlê kong kân Hồ Chí Minh. Ing mâu rôh tơ’noăng rah xo, 8 đô̆i tơ’noăng rơkê má môi hiăng mot tung rôh tơ’noăng má mơ’nui, pơchuât tơbleăng mâu troăng hơlâ tơkŭm tung tơdroăng pêt ngiât, kơdroh mơ’no trếo ‘mêi, cheăng kâ rơkê, pơhlêh kơxô̆ ƀă tơrŭm ki kơnía dêi kơphế. Mâu đô̆i tơ’noăng hiăng mơhno hiâm mơno pơhlêh nếo tơmiât pêi rơkê rơdêi, tro tơniăn khât ƀă ki kơnía dêi kơvâ kơphế.

Hên troăng hơlâ hlo môi tiah tơdroăng ki ai khât, ivá vâ po rơdâ tro tung la ngiâ. Rôh tơ’noăng châ tơngah kô pơtối tơdjâk hiâm mơno pơhlêh nếo tơmiât pêi rơkê, veăng mơdêk tung pơla pơhlêh ngiât ƀă pêt krá tơniăn kơvâ kơphế Việt Nam tung pơla kong prâi pro pơhlêh rế hía rế hên.