Tung roh kong mêi têa lân lu mơ’nui khế 11 pơla kố nah, kơpong ki xiâm pêt kơchâi drêng dêi kong pơlê Lâm Đồng tro lŭp ó. Rơtế ƀă rơpâu hectar kơchâi drêh, plâi pôm dế kriê, lâk tro tơ’nhê tâi tâng cho hngêi hlâm, hngêi nhĕng, tơnêi tro mơhiu pro tơdroăng vêh pêt mơjiâng dêi kuăn pơlê pêt kơchâi drêh hiăng pá thăm pá hên tâ mê nếo. Tơ’nhiê cho péa chư ki tro má môi ăm kơpong ki xiâm pêt hên kơchâi drêh, plâi pôm kĭng têa kroăng Dà Nhim ing hluâ mâu cheăm: D’Ran, Ka Dô, Đơn Dương, Quảng Lập dêi kong pơlê Lâm Đồng.

Rơtế ƀă ƀăng deăng mâu kơchâi drêh dế kriê, tro lŭp hên tâ mê nếo ƀă mơngế ki pêt kơchâi drêh kŏng ngê̆ rơxông nếo a kơpong kố xua hngêi hlâm, hngêi nhĕng ƀă pêt mơjiâng mơ’no liăn ăm 1.000 met karê tâk troh hrĭng rơtuh liăn.

Drêng mâu tơdroăng tro lŭp dêi mơngế pêt kơchâi drêh, kơvâ pêi chiâk deăng ƀă khu râ kăn pơkuâ mâu cheăm kơpong ki xiâm pêt kơchâi drêh dêi kong pơlê Lâm Đồng xuân hiăng pêi pro tơdroăng mơnhôk pêi chiâk deăng, ăm mung liăn pêi chiâk deăng vâ tŏng gum kuăn pơlê kơdo mơ-eăm xông vêh pêt mơjiâng tơmeăm khoăng.’’