Rơnó krí kơphế 2025 – 2026 a Dak Lak dế tơkŭm po tung pơla kong prâi ôh tá tơniăn môi tiah kong mêi ton ƀă têa lân lu. Vâ tơniăn ki dâi lĕm, ki kơnâ dêi kơvâ ki kal má môi dêi kong pơlê, Vi ƀan kong pơlê Dak Lak hiăng tơbleăng Tơdroăng pơkâ ‘na tơdroăng pêt mơjiâng, krí, uâ ƀă tê kơphế rơnó hơnăm 2025 – 2026, vâ tơniăn châ tơƀrê cheăng kâ, ki dâi lĕm tơmeăm ƀă mơnhông kơvâ kơphế tiô troăng krá tơniăn.

Vi ƀan kong pơlê Dak Lak tơmâng hên tối rơdêi pơkâ krí kơphế thế tum, tơniăn ki dâi lĕm, pôi xua xâu kong prâi ôh tá lĕm mê krí kơphế ki ối drêh ngiêt. Mâu cheăm, bêng châ hnê mơhno pơtâng tối, mơhnhôk kuăn pơlê ôh tá krí kơphế drêh ngiêt; pơkuâ krá tơdroăng rôe kơphế, hbrâ mơdât rôe kơphế ối kơbâng, ôh tá ‘nâi xiâm kối, ôh tá tơniăn ki dâi lĕm. Vi ƀan kong pơlê Dak Lak xuân pơkâ khu cheăng kŏng an thăm gâk kring tơniăn ăm rơnó krí kơphế, hbrâ mơdât, tơplâ ƀă mâu tơdroăng tong  kơphế, rak vế tơdroăng ki ‘mêi, pro yă têk chu hmâng vâ.