Kơpong peăng mâ hâi luô kong pơlê Quảng Ngãi nôkố ai 280 tơmeăm OCOP, tung mê, ai 20 tơmeăm 4 hơlŏng, ki ê cho tơmeăm 3 hơlŏng. Hên tơmeăm OCOP cho loăng pơkeăng, kế ki râm tung kơchâi kâ ki hmâ xúa rế hía rế mơhnhôk kuăn pơlê. Ki má môi cho tơmeăm OCOP ƀă sâm Ngọc Linh, tiu... Jâ Lê Thanh Thuý a bêng Kon Tum, kong pơlê Quảng Ngãi tối ăm ‘nâi, ki dâi lĕm tơmeăm OCOP châ pro ing sâm Ngọc Linh a kong pơlê ai kơnâ hên, xua mê, mơngế rôe xúa hâk vâ ‘nâng:

“Á tơmâng troh mâu tơmeăm pro ing sâm Ngọc Linh. Drêng á rah rôe mâu tơmeăm sâm Ngọc Linh mê á rah mâu tíu ki tê loi tơngah, ƀă ki rơhêng vâ tối cho mâu tơmeăm OCOP mê ‘nâi nhên khât cho drêng pin rôe, pin xúa mê kô hmiân tuăn ƀă xuân tơniăn ăm ivá dêi tơná tâ’’.

Mâu tơmeăm OCOP ki phá tơ-ê dêi kơpong peăng mâ hâi Luô Quảng Ngãi tơkŭm a ki tơ’lêi hlâu ‘na ki ai xêh, ki má môi mơtiah sâm Ngọc Linh, sâm kơxái, mâu tơmeăm pro ing pơkeăng. Jâ Lương Thị Mỹ Huệ, Kăn pơkuâ Kŏng ti pêi cheăng tiô rơnó môi khu Pơkeăng Tây Nguyên, a cheăm Đăk Tô, kong pơlê Quảng Ngãi tối ăm ‘nâi, khu tê mơdró dế pơkuâ 9 tơmeăm OCOP, tung mê ai 5 tơmeăm châ plah tiô pơkâ 4 hơlŏng.

Ƀă mơnhên troăng prôk la ngiâ kô mơjiâng mâu tơmeăm ing pơkeăng ki kơnía dêi pơlê gum tơxâng tơdroăng kal vâ rế hía rế hên dêi tơmối, khu tê mơdró hiăng tơtrŏng mơ’no liăn hriăn plĕng, xúa khoa hok kih thuât tung pêt mơjiâng tơmeăm. Jâ Lương Thị Mỹ Huệ tối ăm ‘nâi:

“Má môi cho ngin mơjiâng ƀă po rơdâ kơpong pêt châ tơtro tiô pơkâ lâp plâi tơnêi, la ngiâ tơxâng pơkâ tê ngi kong têa ê. Má péa, kêi đeăng tơdroăng pơkuâ ƀă uâ bro tơmeăm klêi kơ’nâi pôe xo vâ rak ki dâi lĕm, tơniăn lĕm ƀă mơdêk ki kơnâ tơmeăm. Má pái cho ngin tơtrŏng mơ’no liăn cheăng rôe kơmăi kơmok, tơmeăm rơxông nếo ƀă mơdêk hriăn plĕng trâu vâ mơjiâng mâu tơmeăm ki dâi lĕm, tơxâng tơdroăng kal vâ rế hía rế hên dêi mơngế rôe xúa”.

Lâp kong pơlê Quảng Ngãi nôkố ai 642 tơmeăm OCOP ối hâi khế, tung mê, ai 2 tơmeăm OCOP 5 hơlŏng, 46 tơmeăm 4 hơlŏng ƀă 592 tơmeăm 3 hơlŏng. Pakĭng mâu tơmeăm tiô khôi vâi krâ nah ing toih Lý Sơn, loăng hâng Trà Bồng, drêng tơmot chiâng môi kong pơlê Quảng Ngãi ƀă Kon Tum mê pêi chiâk deăng Quảng Ngãi ai hên tơmeăm tơ’lêi hlâu kân vâ mơnhông cheăng kâ pêi chiâk deăng.

‘Na cheăng kâ pêt rak ngăn kong, kong pơlê Quảng Ngãi ai lối 800.000 ha kong, tung mê, ai 500.000 ha kong ki ai xêh ƀă hên kơpong kng kế, nhâ loăng vâ mơnhông pêi chiâk pêi deăng kŏng ngê̆ rơxông nếo ƀă mâu tơmeăm ki má môi mơtiah sâm Ngọc Linh, kơphế kơpong hngíu, mắc ca... Kố cho tơmeăm ki ai hlâu, ki tơ’lêi hlâu kân dêi kong pơlê Quảng Ngãi tung tơdroăng tơkŭm mơnhông pêi chiâk deăng kŏng ngê̆ rơxông nếo ƀă uâ bro trâu ƀă mơdêk ki kơnâ tơtêk ki kơnâ ƀă tơmeăm OCOP dêi kong pơlê. Pôa Hồ Trọng Phương, Kăn pơkuâ ‘na pêi chiâk deăng ƀă Kong prâi kong pơlê Quảng Ngãi tối ăm ‘nâi:

“Ngin ai hên kơpong sinh thái môi tiah Măng Deang, kong prâi tơtro vâ mơnhông pêi chiâk deăng xúa kŏng ngê̆ rơxông nếo. Ngin ai mâu kơpong pêt Kơphế kơpong hngíu, mắc ca, pakĭng mê, ai hên ki tơ’lêi hlâu tơmeăm ki vâ pêt mơjiâng mâu tơmeăm OCOP. Vâ mơnhông pêi chiâk deăng krá tơniăn mê ngin dế séa ngăn, lăm ngăn a tíu pêi mâu tơdroăng pêt mơjiâng vâ tơbleăng ăm Vi ƀan kong pơlê troăng pơkâ pêi, troăng hơlâ mơnhông pêi chiâk deăng krá tơniăn, tung mê, pêt mơjiâng tơmeăm OCOP cho tơdroăng ki xiâm tơbleăng vâ kong pơlê Quảng Ngãi tơkŭm mơ’no liăn cheăng pro ti lâi tơdroăng ki xiâm ƀă kuăn pơlê châ pơxúa ing mâu tơmeăm dêi tơná’’.

Kong pơlê Quảng Ngãi nôkố ai 853 khu loăng pơkeăng ki kơnía, tung mê, ai 30 khu ai tơdroăng kal vâ hên tung kơchơ mơdró ƀă dâng 25 khu hiăng châ pêt, xúa rơdâ ƀă ki kơnâ cheăng kâ. Ki tơtrŏng má môi cho đẳng sâm, đương quy, ngũ vị tử, ki rơhêng vâ tối cho sâm Ngọc Linh – pơkeăng ki xêt ai kơnâ hên tâng pơchông ƀă mâu pơkeăng sâm ki ê.

Hneăng hơnăm 2025 – 2030, kong pơlê Quảng Ngãi mơnhên kơjo mơnhông pêi chiâk deăng hưh cơ ƀă mơjiâng inâi tơmeăm ki má môi kơpong, xo pơkeăng pro ki xiâm. Tung mê, ki xiâm cho sâm Ngọc Linh ƀă mâu pơkeăng ki kơnâ kơnía vâ mơdêk ki kơnâ cheăng kâ, mơnhên inâi kong pơlê.

Pơkâ ki xiâm cho mơjiâng Quảng Ngãi chiâng môi tung mâu kơpong ki xiâm pơkeăng dêi lâp tơnêi têa, gum pêt mơjiâng pơkeăng ăm kơvâ pơkeăng tung tơnêi têa ƀă tê ngi kong têa ê. Kố ôh tá xê to troăng prôk ki tơtro ƀă tơdroăng ki ai dêi kong kế mê ối po roh tơ’lêi mơnhông cheăng kâ krá tơniăn ăm kơpong peăng mâ hâi luô Quảng Ngãi, tíu ki hên cho kuăn pơlê hdroâng kuăn ngo rêh ối. Tơdroăng pêt mơjiâng tơmeăm OCOP ƀă pơkeăng kô po roh tơ’lêi mơnhông cheăng kâ krá tơniăn ăm kuăn pơlê a kong pơlê.