Lâp kong pơlê Dak Lak ai 639 toăng hngêi tro tơhnâp tâi tâng thế mơjiâng pro nếo; 880 hngêi tơ’nhê râ ƀă 5.240 hngêi tơ’nhê iâ, tơtêk kuâ kal rơnêu. Troh nôkố, Dak Lak hiăng pơxiâm mơjiâng pro hngêi nếo 176 toăng hngêi; tiô tối hdrối tung măng tĭng kố kô pơtối pơxiâm mơjiâng pro vâ chê 450 toăng hngêi ƀă dâng 233 toăng hngêi nếo tung măng tĭng pơtối. Krê khu hngêi rơnêu iâ hiăng kêi đeăng tâi tâng; ƀă rơnêu kân, dâng 70% dế a hneăng kêi đeăng, kơxô̆ ki ê – ki hên dêi mâu rơpŏng ôh tá ai kuăn ‘nĕng rak ngăn – kô châ khu kŏng an, mô đô̆i, Quân khu 5 tŏng gum, tơniăn klêi hdrối hâi lơ 31/12./.

Pôa Tạ Anh Tuấn, Kăn hnê ngăn Viƀan kong pơlê Dak Lak tối ăm ‘nâi, pakĭng tơdroăng mơjiâng pro thâ mơjiâng ƀă rơnêu hngêi, kong pơlê dế tơpui ƀă pêi pro 47 ngế pơklât thế xĕn tíu ối nếo xua tíu ối ton ối tung kơpong tơhnâp. Kố cho khu hrá tâ tâng pơchông ƀă tơdroăng tơdjuôm laga xuân ối tung troăng pêi kêi đeăng tiô hnê mơhno dêi Ngế pro xiâm hnê ngăn Chin phuh. Kong pơlê hiăng pơkâ péa kơlo séa ngăn tơdroăng mơjiâng pro, mê cho hdrối lơ 31/12/2025 ƀă hdrối hâi lơ 31/1/2026. Vâ pêi pro rơtế môi xôh, kong pơlê hiăng mơhnhôk lối 200 rơtal liăn ing mâu khu tŏng gum ăm tơdroăng mơjiâng pro nếo ƀă rơnêi hngêi kuăn pơlê. Laga, Dak Lak mơhnhôk tơdroăng mơjiâng dâng 330 hngêi hôp tơdjuôm pơlê pơla ƀă hlối ví têa lân lu, ƀă kơxô̆ liăn dâng 600 rơtal liăn. Kong pơlê pâ thế Chin phuh tŏng gum 500 rơtal liăn; ki ê pơtối châ mơhnhôk ing khu tê mơdró ƀă mâu khu tơrŭm cheăng, mâu ngế ki tŏng gum mơngế pá puât. Pôa Tạ Anh Tuấn, tối ăm ‘nâi:

‘’Khu pơkuâ tơdroăng hiăng hôp tơpui tơno ƀă xing xoăng rêm ngế kăn tung Khu pơkuâ, mâu kăn tung Khu hnê mơhno rêm cheăm, bêng tung tơdroăng mơjiâng hngêi tơhnâp, rơnêu hngêi. Khu kŏng an, khu mô đô̆i ƀă Quân khu 5 xuân dế tŏng gum hên ‘na mơngế vâ kong pơlê pêi pro tơdroăng mơjiâng pro hngêi nếo.’’./.