Hâi lơ 7/8, Khu xiâm ngăn hnê hriâm ƀă hnê mơjiâng tuăn ngôa rơkê tơkŭm po hôp mơ’no tơdrêng tơbleăng mơhnhôk tơ’noăng “Lâp tơnêi têa tơ’noăng pơ’lêh nếo ƀă pơ’lêh kơxô̆” ƀă tơdroăng “Lâm hnê hriâm ‘na kơxô̆”. Hneăng hôp châ tơdjêp troh dâng 600 tíu mơ’no tơdrêng dêi mâu Tíu ngăn hnê hriâm ƀă hnê mơjiâng tuăn ngôa rơkê; mâu hngêi trung đại học ƀă hnê cheăng pêi tung lâp tơnêi têa.

Tơbleăng mơhnhôk tơ’noăng, pôa Nguyễn Văn Phúc, Phŏ ngế xiâm ngăn Hnê hriâm ƀă hnê mơjiâng tuăn ngôa rơkê tối, pơ’lêh kơxô̆ tung kơvâ hnê hriâm po rôh ki hâi chói ai vâ mơnhông ki tơƀrê dêi tơdroăng hnê ƀă hriâm, pơ’lêh nếo troăng hơlâ hnê hriâm,  mơngế mơ-eăm hriâm, po rơdâ rôh pơtối châ hlê ăm rêm ngế kuăn pơlê.

Vâ tơdroăng mơhnhôk mê châ tơƀrê má môi, tâi kơvâ cheăng kô tơkŭm pêi tro 8 tơdroăng ki kal, tung mê mơdêk hnê hlê ‘na tơdrăng rêh ‘na kơxô̆ ƀă mâu tơdroăng tăng ‘nâi plĕng khoa hok ăm hok tro, sinh viên. A hneăng hôp, teăng mâ mâu tíu pêi cheăng hngêi trung, Khu xiâm ngăn hnê hriâm ƀă hnê mơjiâng tuăn ngo rơkê dêi kong pơlê xuân tối ‘na mâu túa cheăng tơbleăng mâu tơdroăng hnê, tơdroăng ‘na pơ’lêh kơxô̆ ƀă “Lâm hriâm hnê ‘na kơxô̆”, hlối pâ thế tối ‘na troăng hơlâ pêi pro péa tơdroăng tơnoăng rế ai pơxúa ƀă tơdroăng hnê hriâm a kong pơlê.