Hâi lơ 7/8, a Tíu pêi cheăng Chin phuh, pôa Phạm Minh Chính, Ngế pro xiâm hnê ngăn Chin phuh pơkuâ roh hôp Chin phuh tiah hmâ khế 7. Hneăng hôp châ mơ’no tơdrêng tung troăng hyôh măng ƀă 34 kong pơlê, pơlê kong kơdrâm ối tung Tơnêi têa. A roh hôp, pôa Phạm Minh Chính, Ngế pro xiâm hnê ngăn tơnêi têa tối rơdêi, lâp tơnêi têa hiăng pêi pro xúa troăng pêi khu râ kăn pơkuâ 2 râ; Mơdêk tơtêk cheăng kâ sap ing 8,3% ƀă hbrâ mơdât ƀă troăng hơlâ hnoăng mơhá nếo dêi kong têa Mih; Khŏm pêi pro  "4 tơdroăng vâ mơnhông tơnêi têa" tiô mâu Tơdroăng pơkâ dêi Khu xiâm kal kí; Hbrâ Hneăng hôp Đảng mâu râ, vâ chêh troh Hneăng hôp Đảng roh má 14; Tơkŭm po leh tơbâ 78 hơnăm Hâi Mô đô̆i rong râ – Hlâ hía ƀă thăm hbrâ ăm Leh kân leh tơbâ 80 hơnăm mơjiâng tơnêi têa...; Hbrâ, ví kong prâi pro ôh tá tơniăn, rak vế châ chăn, tơmeăm khoăng kuăn pơlê, rơnêu kế tơmeăm rĕng má môi mâu tơmeăm ki xua kong prâi pro ôh tá tơniăn.

Tung pơla pá puât, kơnôm tơdroăng mơ-eăm dêi khu cheăng kal kí, tơdroăng cheăng kâ rêh ối pơlê pơla pơtối troăng prôk ki tơtro, khế kơ’nâi lĕm tro tâ khế hdrối, riân tơdjuôm7 khế lĕm tâ rơtế hneăng hơnăm 2024. Laga, Ngế pro xiâm hnê ngăn tơnêi têa xuân tối inhên mâu tơdroăng pá puât pơloăng mơnúa; tơdrêng amê pơkâ mâu khu xiâm, kơvâ kong pơlê pơtối pêi pro mâu troăng pêi nếo mâu ivá tơtêk vâ châ pơkâ sap ing 8,3 – 8,5 tung hơnăm 2025. Mơnhên tơdroăng kơdroh pro mơ-éa, pro tơ’lêi hlâu ăm khu tê mơdró, kuăn pơlê mơnhông cheăng kâ krê.