Hneăng hôp roh má 10 hiăng mơnhên tơdroăng ki má môi ƀă mâu luât, tơdroăng pơkâ châ tơbleăng ăm pêi pro kân má môi sap ing hdrối nah troh nôkố. Tơdroăng mơjiâng luât dêi hneăng hôp má 10 hiăng pêi pro inhên Tơdroăng pơkâ 66 dêi Khu xiâm kal kí ƀă pơkâ tâi hơnăm 2025 kô tah lôi tíu ki kreăng ‘na pơkâ pêi, 2027 pơkâ pêi thế tơniăn pêi pro phuâng lĕm troăng pêi khu râ kăn pơkuâ 2 râ, 2028 kêi đeăng luât ‘na mơ’no cheăng, tê mơdró, gum djâ tíu mơ’no liăn cheăng dêi Việt Nam ối tung khu 3 kong têa ối má môi ASEAN.

‘Na pơkâ pêi tơtêk 2 kơxô̆ ing hơnăm 2026 mơhno tơdroăng ki pói vâ mơnhông tơƀrê hluâ pơkâ, khŏm mơ-eăm hên dêi khu cheăng kal kí tung hneăng mơnhông nếo dêi tơnêi têa. Troăng pêi má môi cho pơtối kơjo mơdêk tơtêk ƀă rak tơniăn cheăng kâ kân, mơjiâng ki châ tơƀrê ‘na tơdroăng pơkâ ƀă mơjiâng châ tíu mơ’no liăn cheăng tê mơdró tơ’lêi hlâu, tơniăn ƀă tơtro. Chin phuh kal mơdêk rĕng tơbleăng mâu mơ-éa hnê mơhno ƀă tơkŭm po pêi pro châ tơƀrê tơdâng tơ’mô ai dâi lĕm luât ƀă tơdroăng pơkâ châ Kuô̆k hô̆i tơbleăng ăm pêi pro, tơniăn mâu troăng pơkâ pêi nếo kô rĕng mot tung tơdroăng rêh ối.