Tơbleăng hnê mơhno a rôh hôp, pôa Tô Lâm - Kăn xiâm pơkuâ hnê ngăn Đảng tơmâng xo mâu tơdroăng veăng hnê tối, tơtro achê tơdroăng ki ai khât dêi mâu kăn, hiăng tối, hiăng khĕn kơdeăn khât mâu tơdroăng châ pêi pro ƀă pâ thế hên troăng hơlâ pêi ki kal vâ tơdroăng hbrâ mơdât kâ kơluâ mơdât mơ’nhiê liăn dêi Đảng, Tơnêi têa rế kâi pê klêi. 

Klêi mơhno nhên mâu tơdroăng ki hâi pêi, pêi hâi tro, Kăn xiâm pơkuâ hnê ngăn Đảng pơkâ thế, tung la ngiâ ôh tá chiâng tơngôu, ôh tá chiâng ngăn tơdroăng pêi pro klêi hiăng hôp mê kal thế tơbleăng pêi kơtăng, khŏm mơ-eăm, ôh tá ai kơpong ki mơdât ƀă 3 tơdroăng pơkâ ƀă 5 tơdroăng ki kal. Mê cho thế  ngăn ki pơxúa dêi tơnêi têa, dêi hdroâng mơngế, ki pơxúa dêi kuăn pơlê mê ahdrối, veăng mơjiâng Đảng ƀă khu cheăng kal kí krúa lĕm krá rơdêi, tơƀrê, pêi tơdrăng, pêi vâ pơxúa ăm kuăn pơlê ƀă mơhnhôk mơnhông tơnêi têa.

Má péa, cho thế khŏm mơ-eăm, đi đo, mô mơnêi, pơxâu kơtăng mâu ki ai xôi, pro tro luât, ôh tá ăm ai kơpong ki mơdât, ki ê. Pơkâ má pái cho thế pơ’lêh hbrâ mơdât, ki kal cho pơtối pêi hnoăng cheăng, ki rơdêi dế mâu khu tơrŭm cheăng Đảng, dêi tơdroăng séa ngăn dêi kuăn pơlê, pôi tá ăm ai xôi kŭn, ah tơkŭm chiâng xôi kân, ôh tá ăm pơtối ai xôi tơdroăng ki ton.