A Gia Lai, mâu tíu tâ tú châ hlo a 29 rơpŏng păn dêi 24 thôn,  pơlê tung 14 to cheăm.  Tâng vâ pơchông ƀă măng tĭng hdrối, kơxô̆ tíu ai pơreăng tâk tơ’nôm 6 cheăm bêng, tung mê ai 5 to cheăm dêi kơpong peăng mâ hâi Lu Gia Lai ƀă 1 to cheăm  a Peăng mâ hâi Lo  Gia Lai mê cho mâu cheăm: Ia Tul, Ia Krái, Ia Grai, Chư Sê, Ia Krêl, Tuy Phước.

Vâ kâi mơdât pơreăng, tung lối 1 khế kô nah, 4 tíu gak  séa ngăn pơreăng dêi mâu kơvâ cheăng a mâu troăng kâ xiâm dêi kong pơlê Gia Lai hiăng séa ngăn vâ chê 900 toăng rơxế chơ kuăn kiâ, pêi pro xôh pơkeăng kơdê pơreăng a tâi tâng rơxê ki mot lo tung kong pơlê. Khu xiâm ngăn pêi chiâk ƀă Hyôh kong prâi kong pơlê Gia Lai pơtối hnê mơhno mâu cheăm bêng séa ngăn kơtăng, xo túa khăm ngăn, prâu tah mâu chu tâ pơreăng, xôk pơkeăng a tíu nếo tâ pơreăng, hlối hnê kuăn pơlê lăm tối ăm mâu kăn tâng hlo chu tâ pơreăng pêi pro tro tiô pơkâ hbrâ mơdât pơreăng.