Sap ing mâu hâi apoăng khế 7 a bêng Xuân Hương – Đà Lạt, kong pơlê Lâm Đồng, rơxông ối nếo bêng hiăng thăm tơkŭm po mâu tơdroăng pêi ‘’Pâ mơnê mơngế ai hnoăng’’, lăm kơ-êng, mơhnhôk rơpŏng ai hnoăng; mơgrúa, chôu nhâng a ilâng kiâ mô đô̆i. Nâ Nguyễn Thị Thúy, Kăn pơkuâ hnê ngăn Chi đoân Tôh kuăn pơlê kơphô̆ 9, tối ăm ‘nâi, ôh tá xê cho tơdroăng pâ mơnê, mê ối cho ƀai hriâm hnê hriâm ‘na hiêm mơno pâ nhuô̆m tơnêi têa ƀă pôu râng hnoăng dêi rơxông ối nếo hâi kố:

‘’Ngin hiăng tơrŭm ƀă Khu pơkuâ dêi tôh kuăn pơlê kơphô̆m ƀă bêng lăm pôu mâu rơpŏng ai hnoăng tơnêi têa a bêng vâ kum ăm mâu pú hmâ droh rơtăm kô mơhno hiêm mơno pâ mơnê troh mâu pôa pâ prôk hdrối. Pakĭng mâu tơdroăng pêi mê mê ngin ối mơgrúa, chôu nhâng a ilâng kiâ mô đô̆i. Mâu roh môi tiah kố rêm hơnăm cho roh lĕm vâ ngin hnê hriâm hiêm mơno pâ nhuô̆m tơnêi têa ƀă hiêm mơno pôu râng hnoăng cheăng ăm mâu pú hma đoân viên droh rơtăm a tíu pêi cheăng dêi ngin’’.

Mơhno hiêm mơno pâ mơnê trâu hơhngế dêi mâu rơxông pôa pâ prôk hdrối xua tơdroăng tơplâ tơleăng lĕm hdroâng mơngế, gâk kring Tơnêi têa ƀă mơjiâng tơnêi têa hâi kố, tung mâu hâi kố Đoân bêng Xuân Hương – Đà Lạt mơhnhôk ivá hơnăm ối nếo tung hên tơdroăng ki pơxúa, troh lâp lu hiêm mơno ‘’Ô têa pâ kơnhŏng’’. Kăn pơkuâ hnê ngăn Đoân bêng Thái Thị Thu Thắm, tối ăm ‘nâi, mâu tơdroăng pêi tơdah châ tơdroăng ki veăng tá hiêm mơno, pôu râng hnoăng cheăng dêi 106 chi đoân ƀă lối 5.000 đoân viên droh rơtăm:

‘’Klăng roh 78 hơnăm hâi Mô đô̆i rong râ – Hlâ hía 100% mâu chi đoân pơla kố nah xuân hiăng pêi pro mâu tơmeăm môi tiah mâu tơdroăng cheăng, môi tiah lo mơgrúa kong prâi, lo lăm kơpui văng Ilâng kiâ mô đô̆i; tơkŭm po mâu tơdroăng kơ-êng mâu rơpŏng mơngế ai hnoăng, rơpŏng ai troăng hơlâ tơnêi têa tŏng gum tung bêng. Pakĭng mê khu đoân droh rơtăm tŏng gum mơngế ai hnoăng châ achê xuân môi tiah tơleăng châ mâu mơ-éa pơkuâ tơnêi têa ki rơpŏng tá hâi châ achê’’.

Mâu tơdroăng pêi ki pơxúa dêi rơxông ối nếo Đoân droh rơtăm bêng Xuân Hương – Đà Lạt tối krê ƀă rơxông ối nếo kong pơlê Lâm Đồng tối tơdjuôm tung mâu hâi khế 7 hiăng djâ ăm tơdroăng phiu ro, rơrêk tung hiêm mơno ăm hên mô đô̆i hneăng hdrối, mô đô̆i rong râ, mơngế hiăng mơdoh plâ rơxông ối nếo ăm hơniêp lĕm dêi tơnêi têa. Pôa Phan Xuân Khanh, 74 hơnăm, mô đô̆i rong râ râ 3/4, rơrêk tung hiêm mơno:

‘’Mâu mêh xuân hiăng krâ hiăng pơtê laga drêng lâi troh hâi lơ 27/7 mê tung hiêm hâk sôk ro xua hâi kố cho hâi lâp tơnêi têa pâ troh ƀă pâ mơnê mâu ngế kuăn hiăng tơplâ hiêt dêi châ ăm tơnêi têa. Ƀă ai hâi kố xuân cho kơnôm tơdroăng ki pleăng mơheăm chá, pleăng hnoăng cheăng dêi mâu ngế khên tơnôu, mâu rơpŏng hiăng hiêt dêi châ tơná tơplâ xua tơniăn krê xua dêi tơnêi têa’’.

Kong pơlê Lâm Đồng ai lối 21.000 mô đô̆i hlâ tung tơplâ xâ, lối 11.000 mô đô̆i rong râ, 2.460 Nôu Việt Nam khên tơnôu (nôkố 17 ngế nôu ối rêh) rơtế chât rơpâu ngế ai hnoăng ƀă kăch măng. Pâ mơnê mâu tơdroăng hía lôi, pleăng mơheăm chá dêi rơxông prôk hdrối, pôa Y Thanh Hà Niê Kđăm, Kăn cheăng tung Tíu xiâm Đảng, Kăn pơkuâ hnê ngăn cheăng Đảng, Kăn pơkuâ Kăn teăng mâ Kuô̆k hô̆i hneăng má XV kong pơlê Lâm Đồng mơnhên, kô pơtối rak ngăn tâi tâng tâ mê nếo ăm mâu rơpŏng ai hnoăng tơnêi têa:

‘’Ngin hlê plĕng mâu tơdroăng ki klâi ki chiâng pêi xuân tá hâi tơxâng tâi mâu tơdroăng hía lôi, pleăng mơheăm chá kân dêi mâu  mô đô̆i ƀă rơpŏng mơngế ai hnoăng. Xua mê, tung la ngiâ, Đảng ƀô̆, khu râ kăn pơkuâ ƀă kuăn pơlê kong pơlê kô pơtối mơ-eăm hên tâ mê nếo vâ mơdêk tơdroăng rêh ối kế tơmeăm, hiêm mơno ăm mơngế ai hnoăng tơnêi têa, ôh tá lôi kơbố ôh tá châ tŏng gum ‘’lôi parŏng’’ tung tơdroăng mơjiâng ƀă mơnhông dêi kong pơlê’’.

Tơdroăng pâ mơnê mâu rơpŏng ai hnoăng tơnêi têa, nhŏng o mô đô̆i hlâ tung tơplâ xâ, mơngế ai hnoăng ƀă kăch măng tung mâu hâi khế 7 a kong pơlê Lâm Đồng ôh tá xê to roh vâ tơbâ troh, mê ối cho vâ mơjiâng pro tung plâi nuih rêm ngế kuăn pơlê a kong pơlê, ki rơhêng vâ tối cho rơxông ối nếo on ki pâ nhuô̆m tơnêi têa, hiêm mơno hâk tơngăm hdroâng mơngế ing mê rêh lĕm tro tâ, ai pơxúa tâ. Mâu troăng hơlâ ki kal tơmiêt troh mâu ‘’tíu pêi cheăng ăm kăch măng tung tơplâ xâ nah’’, môi tiah hngêi ối, rak ngăn ivá, mơjiâng cheăng pêi, tŏng gum tơdroăng rêh ối mâu rơpŏng ai hnoăng tơnêi têa, nhŏng o mô đô̆i rong râ, mơngế ai hnoăng ƀă kăch măng a kong pơlê Lâm Đồng dế veăng rak ƀă pơtối khôi túa vâi krâ nah ‘’Pâ mơnê mơngế ai hnoăng’’, ‘’Ô têa pâ kơnhŏng’’ dêi hdroâng mơngế pin./.