Tơdroăng dêi hneăng cheăng Kuô̆k hô̆i hneăng 15 cho pêi cheăng 'na luât ƀă tơdroăng ki pơhlêh nếo rơdêi ‘na túa tơmiât, ăm troăng hơlâ chiâng ki pơxúa tơxup. Malối cho tơdroăng ki pơhlêh ‘mot tơ’nôm mâu tơdroăng dêi luât hơnăm 2013 pro chiâng tơdroăng ki pơkâ nhên vâ păng ‘nâng xúa túa kăn pơkuâ péa râ, thăm mơnhông klâ xoăng râ, xoăng hnoăng kăn pơkuâ. Mơnhên tối khât tơdroăng ki pêi pro klêi mê, jâ Nguyễn Thị Thủy, ngế ki lo ing Thái Nguyên rơhêng vâ:

“Vâ pơtối pêi pro tơdroăng ki pơhlêh nếo túa tơmiât tung mơjiâng luât ƀă pơkâ thế luât bu pơkâ mâu tơdroăng ‘na túa pro, mâu tơdroăng ki pơkâ pêi, ai hên khât tơdroăng ki ối tung troăng ngăn troăng hơlâ kô ối tung pơkâ dêi Chin phuh. Xua mê, ngin pâ thế Chin phuh tung pơla chêh pro mơéa, ƀă mâu troăng hơlâ ai tơdroăng pơkâ xua tơdjâk kân, pâ thế Chin phuh tơkŭm po xo rơkong tơpui tung lâp lu hdrối vâ pơkâ tơdroăng”.

Tiô pôa Dương Khắc Mai, ngế ki lo ing Lâm Đồng, tung hneăng cheăng la ngiâ, ki kal ôh ti xê cho athế pơkâ hên luât mê kal pơhlêh chiâng tơdroăng ki tơniăn, tơngah, tối pơtâng ƀă liăn ngân ‘no hrê pêi pro tiô luât dêi mâu mơéa luât. Malối, pơkâ thế thăm mơnhông séa ngăn khât châ pơkâ mơ’no, pâ thế séa ngăn kơtăng ƀă tŏng gum troh tui lui.

“Tung la ngiâ ah, tơdroăng ai pơxúa pơkâ cho athế pơtối chêh pro klêi vâ troăng hơlâ tŏng gum séa ngăn, pêi pro kơtăng ƀă vêh séa ngăn tơdroăng pêi pro mâu rôh tơpui mơgêi, pâ thế klêi kơ’nâi séa ngăn. Ki khât ăm hlo, tâng tơdroăng klêi séa ngăn ôh tá châ tơkŭm pêi pro tơdâng, krá tơniăn mê ki xêt tơƀrê tung tơdroăng ki ai khât dêi tơdroăng séa ngăn ối iâ ƀă tá hâi rơdêi. Xua mê, á pâ thế pơchuât tơbleăng kal tối nhên tâ tơdroăng ki kố tung troăng pơkâ tơmiât pêi tung hneăng la ngiâ ƀă ngăn kố cho môi tung mâu tơdroăng ki kal vâ mơdêk ki tơƀrê séa ngăn dêi Kuô̆k hô̆i”.

Tối nhên hneăng cheăng Kuô̆k hô̆i hneăng 15 hiăng ai hên tơdroăng pơkâ pêi ki kal, tơdjâk troh mơnhông cheăng kâ rêh ối pơlê pơla, diâp mâu troăng hơlâ pêi pro ki kal, malối cho tung mơjiâng pro hngêi trăng troăng klông, ăm mâu tơdroăng pơkâ tơnêi têa ƀă tíu pơkâ pêi mâu tơdroăng tŏng gum, troăng hơlâ pêi pro mơnhông 10 to kong pơlê, pơlê kong kân, pôa Tô Ái Vang, ngế ki lo ing Cần Thơ pâ thế:

“Pơcháu ăm Chin phuh pêi pro séa ngăn, mơgêi, mơnhên tối klêi kơ’nâi pêi pro mâu Pơkâ tíu pro ‘na troăng hơlâ tŏng gum ki xiâm, kal pêi pro nhên troăng hơlâ tŏng gum ki lâi gá pro pơxúa tưƀrê khât, pro chiâng tơdroăng ki mơnhông, troăng hơlâ ki lâi tá hâi kâi mơnhông ƀă xiâm kối xua tiah lâi vâ ai pơkâ teăm tơdrêng ăm hneăng ki pơtối, ví tơdroăng ki ôh ti pêi tiô luât lơ pro mơhrê liăn ngân tê kơtê. Tơdroăng ki pơtroh ƀă tơdjêp pơla péa hneăng Kuô̆k hô̆i rak tơniăn tro tơdroăng ki tơrŭm xiâm tung pêi pro mâu Pơkâ, pro mâu ivá mơeăm, troăng hơlâ tŏng gum chiâng ivá mơnhông cheăng kâ rêh ối pơlê pơla khât ăm mâu kong pơlê ƀă lâp tơnêi têa”.

Ƀă mơéa pơchuât tơbleăng tơdroăng cheăng pêi pơla hơnăm 2021-2026 dêi Chin phuh, mâu kăn tối rơdêi, tung pơla tơdroăng cheăng kâ dêi tơnêi têa ƀă kong têa ê ai hên pơhlêh, la ƀă ivá mơeăm khât, pêi cheăng ôh tá pơtê, kơtăng, rơkê tung pơkuâ, Chin phuh hiăng pêi pro klêi hên tơdroăng pơkâ pêi, tơdroăng ki vâ pêi, mâu tơdroăng pơkâ dêi Kuô̆k hô̆i mơ’no. Tơdroăng ‘mâi mơnhông, mơdêk cheăng kâ rêh ối pơlê pơloa, tơ’mot ‘no liăn pêi cheăng châ tơtrŏng, hlối tá tơdroăng ‘mâi mơnhông mâu tơdroăng tơkêa cheăng kâ dêi Tơnêi têa hên hơnăm “pêi cheăng ôh tá klêi tơdroăng” tơngah vâ châ xo liăn tơkâ.

Tối tơdroăng tơngah kố tung hneăng la ngiâ, pôa Trần Hoàng Ngân, ngế ki lo ing pơlê kong kân Hồ Chí Minh tối:

“Mot tung chal ki nếo, tơdroăng pơkâ pêi gá hên khât ƀă kal pêi pro tơdrêng la pin tá hâi ‘nâi ƀlêi chiâng há lp ôh. Á pâ thế Chin phuh tơmâng ngăn tŏng gum pakĭng mơnhông rĕng athế rak tơniăn tro tơdroăng ki krá ton, malối tơtrŏng troh ki tơniăn ‘na cheăng kâ kân ƀă tơdroăng kong prâi pro pơhlêh môi tiah dế nôkố vâ pêi cheăng tơƀrê, tơdjêp troăng klông cheăng kâ rêh ối pơlê pơla tơniăn tơƀrê, rĕng ‘mâi mơnhông, pơhlêh tiô chal nếo nôkố ‘na mâu tơdroăng ki pro troăng rơxế lơ treng”.

Mâu rơkong veăng tơdrăng, pôu râng dêi hnoăng dêi mâu kăn Kuô̆k hô̆i ăm hlo ki khŏm mơeăm pơtối pơhlêh rơdêi tá tơdroăng ki mơjiâng luât, séa ngăn ƀă pơkuâ, vâ pêi pro châ tơniăn tro tâ pơkâ thế mơnhông tơnêi têa tung hneăng ki nếo. Mâu kăn tơngah mâu tơdroăng ki hiăng châ chêh pro tung hneăng cheăng Kuô̆k hô̆i hneăng XV kô châ pơtối châ pơtó, pro klêi ƀă mơnhông, vâ rêm troăng hơlâ gum drêng pơkâ pơrá châ mot tung tơdroăng rêh kâ ối.