Tung 224 tíu pêi cheăng râ cheăm dêi kong pơlê Lâm Đồng ai 113 tíu pêi cheăng chêh inâi kal tơ’nôm mơngế veăng kum pêi cheăng, thăm nếo ai tíu ki ‘nâ kal troh 12 ngế kăn ƀô̆. Tung kơxô̆ lối 400 ngế kăn ƀô̆ ki kong pơlê pơtroh ăm chu lăm pêi cheăng a cheăm, ai  93 ngế kăn ƀô̆ hmâ pêi cheăng ‘na kŏng ngê̆ thông tin; 68 ngế kăn ƀô̆ hmâ cheăng ‘na tơmeăm khoăng hyôh kong prâi; 42 ngế kế toán, 35 ngế kăn ƀô̆ cheăng ‘na kơvâ mơjiâng tơmeăm khoăng ƀă 34 ngế kăn ƀô̆ cheăng ‘na luât - ‘na pro hlá mơ-éa rơpŏng hngêi ƀă hên ki ê tơdrêng ƀă kăn ƀô̆ pêi môi hnoăng cheăng ki hmâ ‘na ki ê.

Tơdroăng pơtroh ăm mâu kăn ƀô̆ chu lăm kum cheăm hiăng tơmiêt hdrối, xua klêi vâ chê 1 khế pêi cheăng mâu kăn kong pơlê 2 râ, hên cheăm bêng tung kong pơlê oh tá tŭm kăn ƀô̆ ki hmâ pêi tơdroăng cheăng mê. Mâu tíu pêi cheăng râ tơring ton hiăng ăm chu lăm pêi cheăng a cheăm ôh tá tơdâng tơ’mô, tíu ki ‘nâ ôh tá tŭm mơngế cheăng, tíu ki ‘nâ rơlối mơnế. Ai tiú ki ‘nâ kăn ƀô̆ ki hmâ pêi môi tơdroăng cheăng pê klêi tơniăn hnoăng cheăng tơná  ki châ pơcháu.