A rôh trâm mâ péa pâ sôk ro hlo mơnhông tơƀrê tơdroăng tơrŭm cheăng pơla Nhuk - Việt Nam ƀă tơngah, rôh trâm mâ drêng kố kô cho rôh ki tro vâ péa pâ mơdêk tâ nếo ƀă pêi cheăng trâu rơdâ tâ nếo tung tơrŭm cheăng a la ngiâ. Peăng tơná, pôa Đỗ Văn Chiến khĕn kơdeăn ki mơnhông tơƀrê oh tá pơtê dêi tơrŭm cheăng péa pâ tung tâi tâng mâu tơdroăng cheăng, ngăn a tơdroăng loi nhoăm kal kí rế hên tâ, tơrŭm cheăng kố hiăng chiâng túa pêi cheăng tơƀrê dêi tơrŭm cheăng péa pâ.

Pôa Đỗ Văn Chiến ăm ‘nâi, Nhuk dế cho kong têa tơrŭm kơxô̆ 1 ‘na tŏng gum mơnhông ODA ƀă pêi cheăng,  ối má 3 ‘na loăng liăn mơjiâng pro tơmeăm khoăng ƀă ôm hyô, ối má 4  ‘na tê mơdró, tung kơxô̆ tơrŭm cheăng ƀă lâp plâi tơnêi dêi Việt Nam.

Kăn xiâm hnê ngăn Vi ƀan tíu xiâm Măt trâ̆n tơnêi têa Việt Nam xuân tơngah tơdroăng tơrŭm cheăng péa pâ tung la ngiâ kô pơtối mơnhông rơdêi tâ nếo tung la ngiâ.