Ngế pro xiâm hnê ngăn tơnêi têa pơkâ mâu khu xiâm, kơvâ, kong pơlê mơnhông hiâm mơno ‘’Pơklât thế pêi pro ing plâi nuih’’, khŏm mơ-eăm kêi đeăng hnoăng cheăng mơjiâng, rơnêu hngêi ối, xing xoăng xĕn tíu ối ăm kuăn pơlê ăm tâi tâng rơpŏng kuăn pơlê ai hngêi tro kơtong, tơhnâp, têa mơhiu xua kong prâi pro hdrối hâi lơ 31/1/2026.

Xông tơpui mơgêi, Ngế pro xiâm hnê ngăn tơnêi têa kheăn kơdeăn tơdroăng mơ-eăm dêi mâu râ, kơvâ cheăng, kong pơlê tung 11 khế apoăng hơnăm, mơnhên mâu tơdroăng châ tơƀrê ki kal châ tung tâi tâng kơvâ cheăng. Chin phuh kô veăng gum pá puât ƀă mâu kong pơlê ki tro tơdjâk xua mơhot têa lân lu, mơnhên hiâm mơno veăng gum dêi pó, hâk vâ dêi pó tâi tâng pơlê pơla ƀă mơhnhôk ‘’Tơdroăng pêi Quang Trung’’ mơhnhôk tâi tâng mơngế pêi cheăng, liăn ngân vâ rơnêu kế tơmeăm khoăng xua kong prâi pro, tơniăn ăm rêm ngế kuăn pơlê ai hngêi ối, tơdah Têt Lo hơnăm nếo Bính Ngọ 2026 tơniăn, phâi hơtô.