Rơtế veăng ƀă Khu ki lăm ai mâu Kăn xiâm hnê ngăn kong pơlê Khánh Hòa ƀă mâu tíu pêi cheăng, khu mơdró rơtế prôk ƀăng. A thôn Xuân Phong, bêng Bắc Nha Trang, khu kố hiăng hbru 350 kơxu tơmeăm, rêm kơxu ai 500 rơpâu liăn cho liăn mâ, ếo tơtô, hơpiâp on ƀă on tơhrik, ki pê rơngiâp ƀă on tơhrik tâi tâng kơnâ lối 500 rơtuh liăn.

Pakĭng mê, VOV Tây Nguyên ối tơdjêp ƀă, mơhnhôk mâu khu mơdró tung kong pơlê Khánh Hòa ƀă Pơlê kong kân Hồ Chí Minh veăng kơjo kum tơ’nôm 175 rơtuh liăn mâ ƀă mâu ếo tơtô kơnâ 100 rơpâu liăn ăm mâu rơpŏng kuăn pơlê ki tro têa lu ó. Hdrối mê, Khu pêi cheăng dêi VOV xuân hiăng tơkŭm pêi hên tơdroăng hbru tơmeăm kơjo kum kuăn pơlê a kơpong tro têa lu a kong pơlê Gia Lai.